بۇل تۋرالى «قاجەت تاكسي» جوباسىنىڭ ستراتەگيالىق ديرەكتورى سادىق شەرىمبەك «Jibek Joly» تەلەارناسىنىڭ «بۇگىن. LIVE» باعدارلاماسىندا ايتتى.
ونىڭ سوزىنشە، پلاتفورمادا قازىر 36 مىڭعا جۋىق جۇرگىزۋشى ۆەريفيكاتسيادان ءوتىپ، راستالعان. ال تىركەلۋگە ءوتىنىش بەرگەن جۇرگىزۋشىلەردىڭ سانى 70 مىڭعا جۋىقتاعان. قۇجاتتاردى تەكسەرۋ جۇمىستارى ءالى دە جالعاسىپ جاتىر.
تاكسي سەرۆيسى باستاپقىدا اۋىل تۇرعىندارىنىڭ قاجەتتىلىگىنەن تۋىنداعان ەكەن.
كومپانيا وكىلدەرى قاپال اۋىلىنا ارناپ جەكە تاكسي قىزمەتىن جاساعان. كەيىن جوبا اۋقىمى كەڭەيىپ، پلاتفورمانى بۇكىل قازاقستانعا ۇسىنۋ تۋرالى شەشىم قابىلدانعان.
- العاشىندا «قاپال تاكسي» سەرۆيسىن اۋىل تۇرعىندارىنا ارناپ ىسكە قوستىق. كەيىن بۇل جوبانى بۇكىل قازاقستانعا ۇسىنۋدى ءجون كوردىك. حالىقتىڭ يگىلىگىنە جاراسىن دەگەن ماقسات بولدى، - دەدى سادىق شەرىمبەك.
ونىڭ ايتۋىنشا، پلاتفورمانى ىسكە قوسقان العاشقى كۇندەرى تاپسىرىس سانى كۇرت وسكەن. ءبىر كۇندە 120 مىڭ ادام كولىككە تاپسىرىس بەرگەن.
- العاشقى كۇندەرى تاپسىرىس وتە كوپ بولدى. ءبىر كۇننىڭ ىشىندە 120 مىڭ ادام كولىككە تاپسىرىس بەرگەن كەز بولدى. ولاردىڭ 70-80 پايىزى سەرۆيستى تەكسەرىپ كورگىسى كەلگەن ادامدار دەپ ەسەپتەيمىز. سول كەزدە كولىك جەتىسپەگەن ساتتەر دە بولدى. قازىر كۇندەلىكتى تاپسىرىس سانى 40 مىڭعا جەتىپ وتىر. ونىڭ ىشىندە كۇنىنە 10 مىڭعا جۋىق تاپسىرىس تولىق ورىندالادى، - دەدى ول.
جۇرگىزۋشىلەردەن كوميسسيا الىنبايدى
جوبا وكىلىنىڭ ايتۋىنشا، پلاتفورمانىڭ بيزنەس- مودەلى باسقا اگرەگاتورلاردان وزگەشە. سەرۆيس ءار ساپاردان كوميسسيا المايدى.
فوتو: كابار
- ءبىز ءاربىر ساپاردان اقشا المايمىز. بولاشاقتا پلاتفورمانى پايدالانعانى ءۇشىن ون كۇندە نەمەسە ايىنا ءبىر رەت بەلگىلى ءبىر سوما الۋدى قاراستىرىپ وتىرمىز. بۇل تولەم قازىرگى شەتەلدىك اگرەگاتورلار الاتىن سومادان 70-80 ەسە تومەن بولادى دەپ جوسپارلاپ وتىرمىز، - دەدى سادىق شەرىمبەك.
سپيكەر سوزىنشە، قازاقستاندا تاكسي جۇرگىزۋشىسى بولىپ شامامەن 500 مىڭ ادام جۇمىس ىستەيدى. سوندىقتان ءوزىمىزدىڭ وتاندىق قىزمەتتىڭ ساپاسىن ارتتىرىپ، ودان ءارى دامىتۋ كوزدەلىپ وتىر. بۇل تاكسي قىزمەتىندە جۇمىس ىستەيتىن ازاماتتار تابىسىنىڭ ەداۋىر بولىگى ءوز قالتالارىندا قالدىرىپ، تابىسىن دا ارتتىرادى.
سونداي- اق سادىق شەرىمبەك جاساندى ينتەللەكت جانە سيفرلىق دامۋ ءمينيسترى جاسلان مادييەۆپەن كەزدەسۋ وتكەنىن ايتتى. كەزدەسۋدە پلاتفورمانى دامىتۋعا قاتىستى بەس ماسەلە تالقىلانىپ، ولاردى شەشۋ بويىنشا قولداۋ كورسەتىلگەن.
جۇرگىزۋشىلەردى تەكسەرۋ جۇيەسى ەنگىزىلەدى
پلاتفورمادا جۇرگىزۋشىلەردىڭ قۇجاتتارى اۆتوماتتاندىرىلعان جاساندى ينتەللەكت جۇيەسى مەن مامانداردىڭ قاتىسۋى ارقىلى تەكسەرىلەدى.
بۇدان بولەك، كومپانيا جۇرگىزۋشىلەردى ىشكى ىستەر ورگاندارىنىڭ جۇيەلەرى ارقىلى ۆەريفيكاتسيالاۋ تەتىگىن جولعا قويىپ جاتىر.
جولاۋشىلاردىڭ قاۋىپسىزدىگىن قامتاماسىز ەتۋ ءۇشىن ايەلدەرگە ارنالعان «قۇربى» ءتاريفى دە ىسكە قوسىلعان. بۇل تاريف بويىنشا تاپسىرىسقا ايەل جۇرگىزۋشى كەلەدى.
كوللاج: Kazinform/Freepik
- قىز-كەلىنشەكتەر مەن وتباسىلاردىڭ قاۋىپسىزدىگىن قامتاماسىز ەتۋ ماقساتىندا «قۇربى» ءتاريفىن قوستىق. مىسالى، اتا-انالار قىزدارىن ءبىر جەرگە جىبەرگەندە نەمەسە ايەلىن تاكسيمەن جولعا شىعارعاندا، ولاردىڭ ءوزىن قاۋىپسىز سەزىنگەنىن قالايمىز، - دەدى جوبا ديرەكتورى.
ونىڭ ايتۋىنشا، ەگەر «قۇربى» تاريفىن ەر ادام تاڭداپ قويسا، ايەل جۇرگىزۋشىنىڭ تاپسىرىستى قابىلداماۋعا قۇقىعى بار. قازىر پلاتفورماعا ايەل جۇرگىزۋشىلەر دە تىركەلىپ جاتىر.
ايتا كەتەيىك، جاقىندا قازاقستاندا تاكسيمەن 174 ميلليوننان استام جولاۋشى ساپارلاعانىن جازعان ەدىك.