قاپشاعاي سۋ قويماسىنا 1,5 ميلليون دەمالۋشى كەلدى
استانا. قازاقپارات - قاپشاعاي سۋ قويماسىنا بيىلعى شومىلۋ ماۋسىمىندا 1,5 ميلليون تۋريست كەلدى، دەپ حابارلايدى 24KZ.
ولارعا 140-تان استام دەمالىس ورنى قىزمەت كورسەتتى. كول جاعالاۋىنداعى ينفراقۇرىلىمدى دامىتىپ، كەلۋشىلەرگە ساپالى قىزمەت كورسەتۋ ماقساتىندا زامانعا ساي دەمالىس ورىندارى سالىنىپ، حالىق يگىلىگىنە بەرىلىپ جاتىر. قاپشاعاي سۋ قويماسىنا كەلۋشىلەر سانى جىل سايىن ارتىپ كەلەدى. وتكەن جىلى مۇندا 1 ميلليون 300 مىڭ تۋريست كەلسە، بيىل ولاردىڭ سانى 1,5 ميلليونعا جەتتى.
«وعان وڭ اسەر ەتكەن كول جاعالاۋىنداعى ينفراقۇرىلىم مەن سەرۆيستىك قىزمەت كورسەتۋ ساپاسىنىڭ جاقسارۋى»، - دەيدى دەمالۋشىلار.
كول جاعالاۋىنداعى دەمالىس ورىندارى حالىققا ساپالى قىزمەت كورسەتىپ قانا قويماي، ولارعا رۋحاني دەمالىس سىيلاۋ ماسەلەسىن دە جان- جاقتى قاراستىرعان. ماسەلەن، جاڭادان اشىلعان مىنا پانسيوناتتا شاكەن ايمانوۆ، قۇمان تاستانبەكوۆ، مەرۋەرت وتەكەشوۆا، اسانالى ءاشىموۆ سياقتى قازاق كينو ونەرىندە وزىندىك قولتاڭباسىن قالدىرعان كوريفەيلەردىڭ ومىربايانىمەن تانىسۋعا بولادى. دەمالىس ورنىنىڭ اۋلاسىنا كينو جانە تەاتر ونەرىنىڭ الىپ بايتەرەگىنە بالانعان اسانالى ءاشىموۆ پەن قازاقتىڭ قابىرعالى قالامگەرى قادىر مىرزا ءالىنىڭ بيۋستى ورناتىلعان.
قاپشاعاي سۋ قويماسىنىڭ جاعالاۋىندا 140-تان استام دەمالىس ورنى بار. ولاردىڭ مىندەتى حالىققا كورسەتىلەتىن قىزمەت ساپاسىن بارىنشا جاقسارتۋ بولسا، جەرگىلىكتى اتقارۋشى بيلىك وكىلدەرى تۋريزم سالاسىن ىلگەرىلەتۋگە باعىتتالعان ىلكىمدى جوبالارعا قولداۋ كورسەتۋى ءتيىس.
ايدىن ەرحان ۇلى، قونايەۆ قالالىق كاسىپكەرلىك ءبولىمىنىڭ باس مامانى:
- قازىرگى تاڭدا قونايەۆ قالاسىندا تۋريزم سالاسى بويىنشا 9 ينۆەستيتسيالىق جوبا بار. سونىمەن قاتار اباتتاندىرۋ بويىنشا 8 قالالىق جاعاجاي مەملەكەت تاراپىنان ينۆەستورلارعا بەرىلدى. ونىڭ ىسكە اسىرىلۋ مەرزىمى: 2024-2025 -جىلدار. سودان بولەك، 1 شاقىرىمدا قالالىق جاعاجايدىڭ جاعالاۋى اباتتاندىرىلىپ جاتىر.
قونايەۆ قالاسىنىڭ اۋماعىندا 2024-2030 -جىلدار ارالىعىندا 26 ينۆەستيتسيالىق جوبا جۇزەگە اسادى. ولاردىڭ جالپى قۇنى - 470 ميلليارد تەڭگە. اتالعان جوبالار ءساتتى جۇزەگە اسقان جاعدايدا 5 مىڭنان استام جاڭا جۇمىس ورنى اشىلادى.