قابىرعاعا جابىستىرىلعان بانان 6,2 ميلليون دوللارعا ساتىلدى

استانا. قازاقپارات - Sotheby's اۋكسيون ءۇيى قابىرعاعا جابىستىرىلعان باناننان تۇراتىن ونەر تۋىندىسى سارسەنبى كۇنى اۋكسيوندا كريپتوكاسىپكەر دجاستين سانعا 6,2 ميلليون دوللارعا ساتىلعانىن حابارلادى، دەپ جازادى Reuters.

يتاليالىق سۋرەتشى ماۋريتسيو كاتتەلاننىڭ «كومەديان» تۋىندىسى العاش رەت 2019-جىلى Art Basel ماياميدە دەبيۋت جاساعان كەزدە ونەر الەمىن تاڭ قالدىردى.

سارسەنبى كۇنى نيۋ-يوركتەگى Sotheby's اۋكسيونىنا تۇسكەننەن كەيىن بەس مينۋتتىڭ ىشىندە باستاپقى باعا 800000 دوللاردان 5,2 ميلليون دوللارعا دەيىن كوتەرىلدى. بۇل سوماعا ساتىپ الۋشىنىڭ سىيلىقاقىسى (كوميسسيا) دا قوسىلدى.

Sotheby's مالىمەتى بويىنشا، سوڭعى باعا الدىن الا بولجانعان 1,5 ميلليون دوللاردان ايتارلىقتاي اسىپ ءتۇستى.

جۇمىستى قىتايلىق كوللەكتسيونەر جانە Tron پلاتفورماسىنىڭ نەگىزىن قالاۋشى دجاستين سان ساتىپ العان.

Artnet.com سايتىنىڭ حابارلاۋىنشا، جەمىس بۇزىلىپ كەتكەن جاعدايدا، ساتىپ الۋشى باناندى ءوزى اۋىستىرىپ الادى.

«بۇل جاي عانا ونەر تۋىندىسى ەمەس. بۇل ونەر الەمدەرىن، مەمدەر مەن كريپتوۆاليۋتا قاۋىمداستىعىن بايلانىستىراتىن مادەني فەنومەن بولادى. بۇل جۇمىس بولاشاقتا جاڭاشا ويلاۋ مەن پىكىرتالاس تۋدىرىپ، تاريحتىڭ ءبىر بولىگىنە اينالادى دەپ ويلايمىن»، - دەدى سان.

بۇعان دەيىن بەلگيالىق سيۋررەاليست-سۋرەتشى رەنە ماگريتتتىڭ 1954-جىلى سالعان «جارىق يمپەرياسى» كارتيناسى Christie's اۋكسيونىندا رەكوردتىق باعا - 121,2 ميلليون دوللارعا ساتىلعانى حابارلاعان بولاتىن.

وسىعان دەيىن يسپانيا ميگراتسيالىق ساياسات رەفورماسىن ماقۇلداعانىن جازدىق.