ەل بىرىنشىلىگىنىڭ فينالدىق جەكپە-جەكتەرىن تاماشالاعان بەلگىلى بىلعارى قولعاپ شەبەرى قانات يسلام ءبىرقاتار سپورتشىنىڭ ونەرىنە جوعارى باعا بەرگەنىمەن، كەيبىر سالماق دارەجەلەرىندەگى ولقىلىقتارعا دا نازار اۋداردى.
Informsports.kz تىلشىسىنە بەرگەن سۇحباتىندا ول چەمپيوناتتىڭ دەڭگەيى، جاس تالانتتاردىڭ مۇمكىندىگى، ۇلتتىق قۇرامانىڭ الداعى جۇمىسى جانە وتاندىق مەكتەپتىڭ دامۋىنا قوساتىن ۇلەسى تۋرالى پىكىر ءبىلدىردى.
- قانات، قازاقستان چەمپيوناتىنىڭ فينالدىق جەكپە-جەكتەرىن تاماشالادىڭىز. جالپى جارىس دەڭگەيى كوڭىلىڭىزدەن شىقتى ما؟ العان اسەرىڭىز تۋرالى ايتىپ بەرىڭىزشى...
- مەن چەمپيوناتتى العاشقى كۇنىنەن باستاپ ونلاين، تەلەديدار ارقىلى باقىلادىم. جاڭا جاس تۇلعالار، تىڭ ەسىمدەر كورىنىپ جاتقانى قۋانتادى. سوڭعى جارىس كۇنىندە 60 كەلىدە جەتىسۋ وبلىسىنىڭ وكىلى ونەر كورسەتتى. ونىڭ جەكپە-جەگى ماعان ەرەكشە ۇنادى. بۇعان دەيىنگى كەزدەسۋلەرىن دە كورگەن ەدىم.
- قاي سالماق دارەجەلەرىندەگى بوكسشىلاردىڭ الەۋەتىن جوعارى باعالادىڭىز؟ ال قاي باعىتتا جۇمىس ىستەۋ قاجەت دەپ سانايسىز؟
- 70 جانە 75 كەلىدەگى جىگىتتەردىڭ دەڭگەيى الەمدىك ارەناداعى بوكسشىلاردان ەش كەم ەمەس دەپ ويلايمىن. ەندىگى مىندەت - ولاردىڭ شەبەرلىگىن ودان ءارى شىڭداۋ. ويتكەنى وليمپيادا ويىندارى مەن الەم چەمپيوناتتارىنداعى باسەكە جىل وتكەن سايىن كۇشەيىپ كەلەدى.
بۇل چەمپيوناتتا تاڭعالارلىق كەزدەسۋلەر بولدى. دەگەنمەن كەيبىر سالماق دارەجەلەرىندە كوڭىل كونشىتەرلىك بوكس كورمەدىم. اسىرەسە اۋىر سالماقتا ايتارلىقتاي جۇمىس ىستەۋ كەرەك. ءوزىم دە سول سالماققا شىقسام، كەيبىر جىگىتتەرمەن جۇدىرىقتاسقىم كەلىپ كەتەدى. قازىر جاسوسپىرىمدەر مەن جاستار اراسىندا جاقسى ءوسىپ كەلە جاتقان بوكسشىلار بار. سولاردى دەر كەزىندە بايقاپ، جۇيەلى تۇردە دايىنداپ، ۇلكەن سپورتقا بەيىمدەۋ قاجەت دەگەن وي ءتۇيدىم.
- جاقىندا وتكەن ازيا ويىندارىنىڭ ناتيجەسىنە قاتىستى پىكىرىڭىز قانداي؟ ۇلتتىق قۇرامانىڭ الەۋەتىن ەسكەرە وتىرىپ، قانداي ماسەلەلەرگە باسىمدىق بەرگەن ءجون؟
- ازيا ويىندارىنداعى ناتيجەگە دە بىردەن ءماز بولىپ، بوركىمىزدى اسپانعا اتىپ قۋاناتىنداي جاعدايدا ەمەسپىز دەپ ويلايمىن. ءبىز وزىمىزگە ءاردايىم سىن كوزبەن قاراۋىمىز كەرەك. كەمشىلىكتەر بار، ولاردى جاسىرماي، اشىق مويىنداپ، تۇزەتۋگە كۇش سالعان ءجون.
- الداعى ۋاقىتتا ۇلتتىق قۇراما جۇمىسىنا ارالاسىپ، ءوز تاجىريبەڭىزبەن بولىسۋگە نيەتتى ەكەنىڭىزدى ايتتىڭىز. بۇل باعىتتاعى ناقتى جوسپارىڭىز قانداي؟
- قازىر ۇلتتىق قۇراماعا كەلىپ، جاتتىقتىرۋشىلارمەن، جەكە باپكەرلەرىمەن ءوز ويىمدى ءبولىسىپ، كاسىپقوي بوكستا جيناعان ازدى-كوپتى تاجىريبەمدى ورتاعا سالعىم كەلەدى. باستى ماقساتىمىز - ەل چەمپيوندارىنىڭ دەڭگەيىن كوتەرىپ، ولاردىڭ باسەكەگە قابىلەتتىلىگىن ارتتىرۋ. وسى باعىتتا بارلىعىمىز بىرلەسىپ جۇمىس اتقارامىز دەگەن ويدامىن.
- اۋەسقوي جانە كاسىپقوي بوكس اراسىنداعى بايلانىستى نىعايتۋ قانشالىقتى ماڭىزدى؟ بۇل رەتتە فەدەراتسيانىڭ قولداۋىن قالاي باعالايسىز؟
- جىگىتتەرگە تەك ساتتىلىك تىلەيمىن! ءاردايىم قولداپ، قاستارىنان تابىلۋعا دايىنبىز. فەدەراتسيا باسشىلىعى اۋەسقوي بوكسپەن قاتار، كاسىپقوي بوكسقا دا كومەكتەسىپ جاتىر. ول كىسىلەرگە العىسىمدى بىلدىرەمىن.
«جۇمىلا كوتەرگەن جۇك جەڭىل» دەيدى عوي. سوندىقتان اۋىزبىرشىلىكتە بولىپ، ءبىر-بىرىمىزگە قولداۋ كورسەتەيىك. اباي اتامىز ايتقانداي: «ءبىرىڭدى، قازاق، ءبىرىڭ دوس، كورمەسەڭ ءىستىڭ ءبارى بوس». ءاردايىم وسى ۇستانىمدى بەرىك ۇستايىق.
- اڭگىمەڭىزگە راقمەت!