ال قازاقستاندا ءبىلىم الىپ جاتقان قانداستار ءۇشىن گرانت كونكۋرسىنا قاتىسۋدىڭ ارنايى ءتارتىبى قاراستىرىلعان. ۇلتتىق تەستىلەۋ ورتالىعىنىڭ مالىمەتىنشە، شەتەل ازاماتتارى ۇ ب ت- عا app.testcenter.kz سايتى ارقىلى تىركەلە الادى. تەستىلەۋ قۇنى - 5640 تەڭگە.
اقىلى نەگىزدە وقۋعا ءتۇسۋدى جوسپارلاعان تالاپكەرلەرگە ۇ ب ت تاپسىرۋ مىندەتتى ەمەس. ولار جوعارى وقۋ ورنىنا اڭگىمەلەسۋ ناتيجەسى بويىنشا قابىلدانا الادى. ال مەملەكەتتىك ءبىلىم گرانتى كونكۋرسىنا قاتىسۋ ءۇشىن نەگىزگى ۇ ب ت- نى تاپسىرۋ قاجەت. گرانت كونكۋرسىنا وتىنىشتەر ءساۋىر ايىندا قابىلدانادى.
ۇ ب ت- عا قالاي تىركەلۋگە بولادى؟
تىركەلۋ كەزىندە قازاقستان ازاماتىنىڭ جەكە سايكەستەندىرۋ ءنومىرى (ج س ن) بار تالاپكەرلەر ءتيىستى بولىمگە ءوز ءنومىرىن ەنگىزۋى كەرەك. ەگەر تالاپكەر 18 جاسقا تولماعان بولسا، اتا-اناسىنىڭ نەمەسە زاڭدى وكىلىنىڭ دەرەكتەرىن كورسەتۋ قاجەت.
ال ج س ن- ى جوق شەتەل ازاماتتارى «ق ر ج س ن جوق» ءبولىمىن تاڭداپ، جەكە دەرەكتەرىن تولتىرادى. تىركەۋ اياقتالعاننان كەيىن ولارعا 12 تاڭبالى كود بەرىلەدى.
قانداي پاندەردى تاپسىرۋ قاجەت؟
ۇ ب ت پاندەرىنىڭ سانى وقۋ مەرزىمى مەن تاڭدالعان ماماندىققا بايلانىستى بەلگىلەنەدى.
تولىق وقۋ مەرزىمى بويىنشا:
ادەتتەگى ماماندىقتارعا - 3 ءپان؛
شىعارماشىلىق ماماندىقتارعا - 1 ءپان.
قىسقارتىلعان وقۋ مەرزىمى بويىنشا (كوللەدج تۇلەكتەرىنە):
ادەتتەگى ماماندىقتارعا - 2 ءپان؛
شىعارماشىلىق ماماندىقتارعا - 1 ءپان.
شىعارماشىلىق ەمتيحانداردى تالاپكەر تاڭداعان جوعارى وقۋ ورنى وتكىزەدى.
قازاقستاندا وقيتىن قانداستار گرانتقا قالاي قاتىسادى؟
قازاقستاندا ءبىلىم الىپ جاتقان قانداستار ۇ ب ت- عا «2027-جىلعى مەكتەپ تۇلەكتەرى» ساناتى بويىنشا تىركەلىپ، نەگىزگى تەستىلەۋدى 5 نەمەسە 3 پاننەن تەگىن تاپسىرا الادى.
مەملەكەتتىك گرانت كونكۋرسىنا قاتىسۋ كەزىندە ادەتتەگى ماماندىقتار ءۇشىن ءۇش ءپاننىڭ، ال شىعارماشىلىق ماماندىقتار ءۇشىن ءبىر ءپاننىڭ ناتيجەسى ەسەپكە الىنادى.
بۇل رەتتە قانداستار ءۇشىن گرانت كونكۋرسىنا قاتىسۋ كەزىندە شەكتى بال بەلگىلەنبەگەن، ياعني ولار نەگىزگى ۇ ب ت ناتيجەسىندە جيناعان بالدارىنا قاراماستان كونكۋرسقا قاتىسۋعا ءوتىنىش بەرە الادى.
وسىعان دەيىن قانداس مارتەبەسىن قالاي ۇيدەن شىقپاي-اق الۋعا بولاتىنىن جازدىق.