نوتاريۋستىق ارەكەتتەر ءۇشىن اقى تولەۋدەن كىمدەر بوساتىلاتىنىن جانە كىمدەرگە 50 پايىزدىق جەڭىلدىك بەرىلەتىنىن قاراعاندى وبلىستىق نوتارياتتىق پالاتاسى ءتۇسىندىردى.
2026 -جىلعى 1-قاڭتاردان باستاپ قازاقستاندا ادىلەت مينيسترلىگى بەكىتكەن جەكەشە نوتاريۋستار قىزمەتىنىڭ جاڭا تاريفتەرى كۇشىنە ەندى. نوتارياتتىق قىزمەتتەردىڭ قۇنى اتقارىلاتىن ارەكەتتىڭ تۇرىنە قاراي بەلگىلەنەدى. ماسەلەن، وسيەتتى كۋالاندىرۋ ءۇشىن 3 اەك (12975 تەڭگە)، مۇراعا قۇقىق تۋرالى كۋالىك الۋ ءۇشىن 4 اەك (17300 تەڭگە)، ال جەكە تۇلعاعا قاراپايىم سەنىمحات راسىمدەۋ ءۇشىن 1,1 اەك (4758 تەڭگە) تولەۋ قاجەت.
جىلجىمايتىن مۇلىككە قاتىستى مامىلەلەردى كۋالاندىرۋ قۇنى نىساننىڭ باعاسىنا، ورنالاسقان جەرىنە جانە مامىلەگە قاتىسۋشىلاردىڭ تۋىستىق دارەجەسىنە بايلانىستى وزگەرەدى. سونىمەن قاتار زاڭدا نوتارياتتىق قىزمەتتەر اقىسىن تولەۋدەن تولىق نەمەسە ءىشىنارا بوساتىلاتىن ازاماتتاردىڭ ساناتتارى ناقتى ايقىندالعان.
«نوتاريات تۋرالى» قازاقستان رەسپۋبليكاسى زاڭىنىڭ 30-بابىنىڭ 5-1-تارماعىنا سايكەس ازاماتتاردىڭ تومەندەگى ساناتتارى جەكەشە نوتاريۋستىڭ نوتارياتتىق ارەكەتتەرى مەن وزگە دە قىزمەتتەرى ءۇشىن اقى تولەۋدەن بوساتىلادى.
ارداگەرلەر مەن مۇگەدەكتىگى بار ادامدار
جەڭىلدىك ۇلى وتان سوعىسىنىڭ ارداگەرلەرىنە، جەڭىلدىكتەر بويىنشا ولارعا تەڭەستىرىلگەن ارداگەرلەرگە، باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرىنە، سونداي-اق ۇلى وتان سوعىسى جىلدارىندا تىلداعى جانقيارلىق ەڭبەگى مەن ءمىنسىز اسكەري قىزمەتى ءۇشىن بۇرىنعى ك س ر و- نىڭ وردەندەرى مەن مەدالدارىمەن ماراپاتتالعان جەكەلەگەن ازاماتتارعا بەرىلەدى.
بۇعان قوسا، 1941 -جىلعى 22 -ماۋسىم مەن 1945 -جىلعى 9 -مامىر ارالىعىندا كەمىندە التى اي جۇمىس ىستەگەن نەمەسە اسكەري قىزمەت اتقارعان، ءبىراق اتالعان وردەندەر مەن مەدالدارعا يە بولماعان ازاماتتار دا وسى ساناتقا جاتادى.
سونداي- اق مۇگەدەكتىگى بار ادامدار، بالا كەزىنەن مۇگەدەكتىگى بار ادامنىڭ اتا-اناسىنىڭ ءبىرى جانە مۇگەدەكتىگى بار بالانىڭ اتا-اناسىنىڭ ءبىرى نوتارياتتىق قىزمەتتەر ءۇشىن اقى تولەۋدەن تولىق بوساتىلادى.
كوپ بالالى انالار
«باتىر انا» اتاعىن العان نەمەسە «التىن القا»، «كۇمىس القا» القالارىمەن ناگرادتالعان ايەلدەر نوتارياتتىق ارەكەتتەردىڭ بارلىق ءتۇرى ءۇشىن اقى تولەمەيدى.
ارناۋلى الەۋمەتتىك قىزمەتتەر كورسەتۋ ورتالىقتارىندا تۇراتىن قارت ادامدار
بۇل ساناتتاعى ازاماتتارعا دا نوتارياتتىق ارەكەتتەر ءۇشىن اقى تولەۋدەن تولىق بوساتۋ قۇقىعى بەرىلگەن.
قامقورشىلىق بەلگىلەنگەن سوزىلمالى پسيحيكالىق اۋرۋلارى بار ادامدار
ولارعا مۇراعا قۇقىق تۋرالى كۋالىك بەرۋ كەزىندە جەڭىلدىك قاراستىرىلعان.
جاسى بويىنشا زەينەتكەرلەر
زەينەتكەرلەر نوتارياتتىق ارەكەتتەردىڭ باسىم بولىگى ءۇشىن اقى تولەۋدەن بوساتىلادى. الايدا بۇل جەڭىلدىك بارلىق قىزمەتكە بىردەي قولدانىلا بەرمەيدى.
اتاپ ايتقاندا، جەڭىلدىك مامىلەلەردى جانە شارۋاشىلىق سەرىكتەستىكتەردىڭ قۇرىلتاي قۇجاتتارىن كۋالاندىرۋعا، مۇرانى سەنىمگەرلىك باسقارۋشىنى تاعايىنداۋعا، مۇراعا قۇقىق تۋرالى كۋالىك بەرۋگە، سونداي- اق ەرلى- زايىپتىلاردىڭ جانە ورتاق مەنشىكتەگى وزگە دە ادامداردىڭ مۇلكىندەگى ۇلەسكە مەنشىك قۇقىعى تۋرالى كۋالىك بەرۋگە قولدانىلمايدى.
بۇدان بولەك، اقشا قاراجاتىن دەپوزيتكە قابىلداۋ، اتقارۋشىلىق جازبالار جاساۋ، ۆەكسەلدەرگە نارازىلىق ءبىلدىرۋ، قۇجاتتار مەن باعالى قاعازداردى ساقتاۋعا قابىلداۋ دا جەڭىلدىك قاراستىرىلماعان نوتارياتتىق ارەكەتتەر قاتارىنا كىرەدى.
قانداستار
قانداستار قازاقستان رەسپۋبليكاسىنىڭ ازاماتتىعىن الۋعا بايلانىستى جاسالاتىن نوتارياتتىق ارەكەتتەر ءۇشىن اقى تولەۋدەن بوساتىلادى.
كىمدەرگە 50 پايىزدىق جەڭىلدىك بەرىلەدى؟
ازاماتتاردىڭ كەيبىر ساناتتارى نوتارياتتىق قىزمەتتەر ءۇشىن اقى تولەۋدەن تولىق بوساتىلمايدى. الايدا ولارعا بەلگىلەنگەن تاريفتىڭ جارتىسىن تولەۋ مۇمكىندىگى بەرىلەدى.
18 جاسقا تولماعان جەتىم بالالار مەن اتا- اناسىنىڭ قامقورلىعىنسىز قالعان بالالارنوتارياتتىق قىزمەتتەر قۇنىنىڭ 50 پايىزىن تولەيدى.
«قازاقستاننىڭ مۇگەدەكتىگى بار ادامداردىڭ ەرىكتى قوعامى» وداعى، قازاق ساڭىراۋلار قوعامى، قازاق سوقىرلار قوعامى جانە ولاردىڭ وندىرىستىك كاسىپورىندارى دا نوتارياتتىق قىزمەتتەر ءۇشىن بەلگىلەنگەن تاريفتىڭ 50 پايىزىن تولەيدى.
جەڭىلدىكتەر زاڭ تالاپتارىنا سايكەس بەرىلەتىنىن ەسكەرگەن ءجون. ولار ازاماتتاردىڭ ناقتى ساناتتارىنا جانە نوتارياتتىق ارەكەتتەردىڭ بەلگىلى ءبىر تۇرلەرىنە عانا قولدانىلادى. سوندىقتان نوتاريۋسقا جۇگىنبەس بۇرىن قاجەتتى قىزمەتتىڭ اقى تولەۋدەن بوساتۋ نەمەسە جەڭىلدىك قاراستىرىلعان قىزمەتتەر قاتارىنا كىرەتىنىن انىقتاپ العان دۇرىس.
2026 -جىلى نوتاريۋس قىزمەتى قانشا تۇرادى؟
نوتارياتتىق قىزمەتتەردىڭ جاڭا تاريفتەرى قازاقستان رەسپۋبليكاسى ادىلەت ءمينيسترىنىڭ 2025 -جىلعى 27 -قىركۇيەكتەگى № 533 بۇيرىعىمەن بەكىتىلگەن.
بۇعان دەيىن نوتاريۋس قىزمەتىنە تولەنەتىن اقى مەملەكەتتىك باجدان جانە قۇقىقتىق ءارى تەحنيكالىق سيپاتتاعى قىزمەتتەردىڭ قۇنىنان تۇراتىن. ال 2026 -جىلعى 1 -قاڭتاردان باستاپ نوتارياتتىق ارەكەتتەردى ورىنداۋ، قۇجاتتاردىڭ كوشىرمەلەرى مەن تەلنۇسقالارىن بەرۋ، سونداي-اق جەكەشە نوتاريۋستاردىڭ كونسۋلتاتسيالىق قىزمەتتەرى ءۇشىن تولەنەتىن اقى اتالعان بۇيرىققا سايكەس بەلگىلەنەدى.
2026 -جىلى ءبىر ايلىق ەسەپتىك كورسەتكىش (اەك) 4325 تەڭگەگە تەڭ.
ەڭ ءجيى كورسەتىلەتىن نوتارياتتىق قىزمەتتەردىڭ قۇنى تومەندەگىدەي:
- وسيەتتى كۋالاندىرۋ - 3 اەك (12975 تەڭگە)؛
- مۇراعا قۇقىق تۋرالى كۋالىك بەرۋ - ءار كۋالىك ءۇشىن 4 اەك (17300 تەڭگە) ؛
- اۆتوموبيلدى ساتۋ قۇقىعىنسىز پايدالانۋعا جانە باسقارۋعا سەنىمحات راسىمدەۋ - 2 اەك (8650 تەڭگە)؛
- مۇلىكتى پايدالانۋعا جانە وعان بيلىك ەتۋگە سەنىمحات راسىمدەۋ - 2,5 اەك (10813 تەڭگە)؛
- جەكە تۇلعالارعا ارنالعان وزگە دە سەنىمحاتتار - 1,1 اەك (4758 تەڭگە)؛
- كونسۋلتاتسيا بەرۋ - 1 اەك (4325 تەڭگە)؛
- قۇجات كوشىرمەسىنىڭ ءتۇپنۇسقاعا سايكەستىگىن كۋالاندىرۋ - جەكە تۇلعالار ءۇشىن ءار بەتىنە 0,1 اەك (شامامەن 433 تەڭگە)؛
- نوتارياتتىق كۋالاندىرىلعان قۇجاتتىڭ كوشىرمەسىن بەرۋ - 0,7 اەك (شامامەن 3028 تەڭگە)؛
- نوتارياتتىق قۇجاتتىڭ تەلنۇسقاسىن بەرۋ - 3 اەك (12975 تەڭگە).
جىلجىمايتىن مۇلىكتى راسىمدەۋ قۇنى قانشا؟
جىلجىمايتىن مۇلىككە قاتىستى مامىلەلەردى كۋالاندىرۋ اقىسى نىساننىڭ قۇنىنا، ورنالاسقان جەرىنە جانە مامىلەگە قاتىسۋشىلارعا قاراي بەلگىلەنەدى.
قالادا جىلجىمايتىن مۇلىكتىڭ قۇنى 30 اەك- تەن اسپاسا، بالالار، جۇبايى، اتا- اناسى، تۋعان اعا- ىنىلەرى مەن اپا- سىڭلىلەرى جانە نەمەرەلەرى ءۇشىن تاريف 3 اەك (12975 تەڭگە) بولادى. ال باسقا تۇلعالار ءۇشىن بۇل سوما 8 اەك (34600 تەڭگە).
ەگەر جىلجىمايتىن مۇلىكتىڭ قۇنى 30 اەك- تەن اسسا، جاقىن تۋىستار ءۇشىن تاريف 7 اەك (30275 تەڭگە)، ال باسقا تۇلعالار ءۇشىن 12 اەك (51900 تەڭگە) بولىپ بەلگىلەنگەن. مامىلە تاراپتارىنىڭ ءبىرى زاڭدى تۇلعا بولسا، تاريف 17 اەك- كە (73525 تەڭگە) دەيىن جەتەدى.
اۋىلدىق جەردە نوتارياتتىق قىزمەتتەردىڭ ءتاريفى تومەنىرەك. جاقىن تۋىستار ءۇشىن ول 1,5 اەك (6488 تەڭگە)، باسقا تۇلعالار ءۇشىن 2,7 اەك (11678 تەڭگە) بولادى. ال مامىلە تاراپتارىنىڭ ءبىرى زاڭدى تۇلعا بولعان جاعدايدا 3 اەك (12975 تەڭگە) تولەۋ قاجەت.
يپوتەكالىق تۇرعىن ءۇي قارىزى قاراجاتى ەسەبىنەن جىلجىمايتىن مۇلىك ساتىپ الۋ كەزىندە تاريف 4 اەك (17300 تەڭگە) مولشەرىندە بەلگىلەنگەن.
شارتتاردى نوتارياتتا كۋالاندىرۋ قانشا تۇرادى؟
جالداۋ، قارىز (يپوتەكالىق تۇرعىن ءۇي قارىزىنان باسقا)، كەپىلاقى، ليزينگ، مەردىگەرلىك، نەكە شارتى، ورتاق مەنشىكتەگى مۇلىكتى ءبولۋ، مۇراگەرلىك مۇلىكتى ءبولۋ، اليمەنت تولەۋ تۋرالى كەلىسىم جانە قۇرىلتاي شارتتارىن كۋالاندىرۋ ءۇشىن 10 اەك (43250 تەڭگە) تولەۋ قاجەت.
كەپىلگەرلىك نەمەسە كەپىلدىك شارتىن كۋالاندىرۋ قۇنى - 1,5 اەك (6488 تەڭگە).
يپوتەكالىق تۇرعىن ءۇي قارىزى شارتىن جانە وسى قارىز بويىنشا جىلجىمايتىن مۇلىك كەپىلى شارتىن كۋالاندىرۋ ءۇشىن 4 اەك (17300 تەڭگە) الىنادى. كەپىلدىڭ وزگە تۇرلەرىنە قاتىستى شارتتاردى كۋالاندىرۋ ءتاريفى 10 اەك (43250 تەڭگە).
اۆتوموبيلدى يەلىكتەن شىعارۋ شارتىن كۋالاندىرۋ كەزىندە جاقىن تۋىستارعا، ياعني بالالارعا، جۇبايىنا، اتا-اناسىنا، تۋعان اعا- ىنىلەرى مەن اپا- سىڭلىلەرىنە جانە نەمەرەلەرىنە ارنالعان تاريف 4 اەك (17300 تەڭگە) بولادى.
باسقا تۇلعالار ءۇشىن بۇل قىزمەت قۇنى 10 اەك (43250 تەڭگە). ال مامىلە تاراپتارىنىڭ ءبىرى زاڭدى تۇلعا بولعان جاعدايدا تاريف 12 اەك- كە (51900 تەڭگە) تەڭ.
وسىلايشا، نوتارياتتىق قىزمەتتەردىڭ قۇنى زاڭنامادا بەلگىلەنگەن تاريفتەرگە سايكەس ەسەپتەلەدى. سونىمەن قاتار ازاماتتاردىڭ جەكەلەگەن ساناتتارى ءۇشىن نوتاريۋس قىزمەتىن تەگىن پايدالانۋ نەمەسە جەڭىلدىكپەن الۋ مۇمكىندىگى قاراستىرىلعان.
جەڭىلدىك بەرۋدەن باس تارتىلسا، قايدا جۇگىنۋگە بولادى؟
ەگەر ازامات زاڭ بويىنشا نوتارياتتىق قىزمەت اقىسىن تولەۋدەن بوساتىلۋعا نەمەسە جەڭىلدىك الۋعا قۇقىلى بولا تۇرا، نوتاريۋس وعان جەڭىلدىك بەرۋدەن باس تارتسا، قاراعاندى وبلىستىق نوتارياتتىق پالاتاسىنا نەمەسە قاراعاندى وبلىسىنىڭ ادىلەت دەپارتامەنتىنە شاعىمدانا الادى.
شاعىمدانار الدىندا جەڭىلدىك الۋعا قۇقىعىن راستايتىن قۇجاتتاردى دايىنداپ، نوتاريۋستىڭ باس تارتۋىنا نە سەبەپ بولعانىن ناقتىلاپ العان ءجون.
بۇعان دەيىن ق ر ادىلەت مينيسترلىگى 2026 -جىلدىڭ 1- قاڭتاردان باستاپ نوتارياتتىق ارەكەتتەردى جاساۋعا، قۇجاتتاردىڭ كوشىرمەلەرى مەن تەلنۇسقالارىن بەرۋگە، سونداي-اق نوتاريۋستاردىڭ كەڭەس بەرۋ قىزمەتتەرىنە جاڭا تاريف ەنگىزگەنى تۋرالى حابارلاعان بولاتىنبىز.