بۇل جەردە «قانداس» مارتەبەسىن الۋ، قانداستاردى قابىلداۋدىڭ وڭىرلىك كۆوتاسىنا ەنگىزۋ، ەڭبەك يمميگرانتتارىنا جۇمىس ىستەۋگە رۇقسات راسىمدەۋ، شەتەلدىك جۇمىس كۇشىن تارتۋ جانە تاعى باسقا دا قىزمەتتەر قولجەتىمدى.
پورتالدىڭ باستى ارتىقشىلىعى بارلىق نەگىزگى راسىمدەردى ونلاين ورىنداۋعا بولادى: تىركەلىپ، جەكە دەرەكتەردى تولتىرۋعا، ءوتىنىش بەرۋگە جانە ونىڭ مارتەبەسىن جەكە كابينەتتەن باقىلاۋعا مۇمكىندىك بار.
تىركەلۋ- قىزمەت الۋدىڭ العاشقى قادامى
اۋەلى migration.enbek.kz سايتىنا كىرىپ، «كىرۋ» باتىرماسىندا «تىركەلۋ» قاجەت.
ول ءۇشىن ەلەكتروندىق پوشتاسىن جانە قۇپيا ءسوزىن ەنگىزىپ، پايدالانۋشى كەلىسىمىنىڭ شارتتارىن قابىلداۋ جانە ەسەپتىك جازبا اشۋ كەرەك. ودان كەيىن كورسەتىلگەن ەلەكتروندىق پوشتاعا تىركەلۋدى راستاۋ تۋرالى حات كەلەدى.
پورتالدا پايدالانۋشىلاردىڭ بىرنەشە ساناتى قاراستىرىلعان. سوندىقتان قولجەتىمدى قىزمەتتەر مەن قاجەتتى مالىمەتتەر پايدالانۋشى تاڭداعان ساناتقا بايلانىستى بولادى.
جەكە كابينەت: قاجەتتى اقپاراتتاردىڭ بارلىعى ءبىر جەردە
پورتالعا كىرگەننەن كەيىن پايدالانۋشى جەكە كابينەتكە وتەدى. قىزمەت الماس بۇرىن «جەكە دەرەكتەر» ءبولىمىن تولتىرۋ قاجەت.
ەگەر شەتەل ازاماتىنىڭ ج س ن-ى بولسا، ول تۋرالى كەيبىر مالىمەت مەملەكەتتىك اقپاراتتىق جۇيەلەردەن اۆتوماتتى تۇردە الىنۋى مۇمكىن. قالعان قاجەتتى دەرەكتەردى پايدالانۋشى ءوزى ەنگىزەدى. مالىمەتتەردى ساقتاماس بۇرىن ولاردىڭ دۇرىستىعىن مۇقيات تەكسەرۋ كەرەك.
جەكە مالىمەتتەردى ەنگىزگەن سوڭ، پايدالانۋشى وزىنە قاجەتتى قىزمەتتى تاڭداپ، ەلەكتروندىق ءوتىنىش فورماسىن تولتىرىپ، ونى قاراۋعا جولداي الادى.
جەكە كابينەتتە ءوتىنىشتىڭ مارتەبەسىن باقىلاپ، ءتيىستى حابارلامالاردى الۋعا بولادى. بۇل قىزمەتتىڭ قالاي كورسەتىلىپ جاتقانىن قوسىمشا سۇراۋ سالماي-اق قاداعالاۋعا مۇمكىندىك بەرەدى.
ءوتىنىش جىبەرمەس بۇرىن دەرەكتەر مەن قۇجاتتاردى تەكسەرىڭىز
ءوتىنىشتى جىبەرەر الدىندا ەنگىزىلگەن مالىمەتتەردىڭ دۇرىستىعىن تەكسەرۋ ماڭىزدى.
جەكە مالىمەتتەردىڭ سايكەستىگىنە، مىندەتتى بولىمدەردىڭ تولىقتىعىنا جانە قاجەتتى قۇجاتتاردىڭ ەنگىزىلگەنىنە كوز جەتكىزۋ كەرەك.
جۇيە مىندەتتى ۇياشىقتىڭ تولتىرىلۋىن دا تەكسەرەدى. قاجەتتى مالىمەتتەر تولىق ەنگىزىلمەگەن جاعدايدا، پايدالانۋشىعا ەسكەرتۋ كورسەتىلىپ، دەرەكتەردى تولىقتىرماي تۇرىپ ساقتاۋعا مۇمكىندىك بەرىلمەيدى.
ءار قىزمەتتىڭ تالاپتارى مەن قاجەتتى قۇجاتتار ءتىزىمى ءارتۇرلى. سوندىقتان ءوتىنىش بەرمەس بۇرىن تاڭدالعان قىزمەتتىڭ سيپاتتاماسى مەن ونى الۋ شارتتارىمەن تانىسۋ ۇسىنىلادى.
حابارلامالاردى تەكسەرىپ وتىرىڭىز
ءوتىنىش جىبەرىلگەن سوڭ ونىڭ قارالۋ كەزەڭدەرىنە قاتىستى اقپارات جەكە كابينەتتە قولجەتىمدى بولادى. سوندىقتان پايدالانۋشى ءوتىنىش مارتەبەسىن ۇنەمى قاداعالاپ، جۇيەدەگى حابارلامالارمەن تانىسىپ وتىرۋى قاجەت. بۇل راسىمدەۋ بارىسىنداعى وزگەرىستەردى دەر كەزىندە ءبىلىپ، قاجەت بولعان جاعدايدا قوسىمشا ارەكەتتەردى ورىنداۋعا كومەكتەسەدى.
سونىمەن قاتار پورتالدا قولجەتىمدى قىزمەتتەر تۋرالى، كوشى- قون جانە جۇمىسقا ورنالاسۋ سالاسىنداعى رەسمي دەرەككوزدەردەن الىنعان اقپاراتتار جاريالانىپ وتىرادى.
Migration.enbek.kz - كوشى-قون سالاسىنداعى قىزمەتتەردى الۋعا ارنالعان ءبىرىڭعاي سيفرلىق پورتال. ونىڭ كومەگىمەن تىركەلۋ جانە جەكە دەرەكتەردى تولتىرۋدان باستاپ، ءوتىنىش بەرىپ، ناتيجەسىن باقىلاۋعا دەيىنگى نەگىزگى كەزەڭدەردەن ونلاين وتۋگە بولادى.