ءبىرىنشى قادام - ءوڭىردى تاڭداۋ. ەلدە قونىس اۋدارۋ ءۇشىن جەتى ءوڭىر بەلگىلەنگەن. الدىن الا تۇرمىس جاعدايلارى مەن جۇمىسقا ورنالاسۋ مۇمكىندىكتەرىن ناقتىلاپ العان ءجون.
ەكىنشى قادام - قازتەست. testcenter.kz سايتىندا قازاق ءتىلىن ءبىلۋ دەڭگەيىن انىقتايتىن تەستتەن وتەسىز. 60 سۇراقتان تۇراتىن تەستتىڭ ءار ءبولىمى، ياعني تىڭدالىم مەن وقىلىم بويىنشا كەمىندە 70 پايىز دۇرىس جاۋاپ بەرۋ كەرەك.
ءۇشىنشى قادام - ساۋالنامانى تولتىرۋ. ءبىلىمىڭىز، جۇمىس تاجىريبەڭىز، كاسىبي داعدىلارىڭىز، تىلدەردى مەڭگەرۋ دەڭگەيىڭىز، دەنساۋلىق جاعدايىڭىز جانە وتباسى قۇرامى تۋرالى مالىمەتتەردى كورسەتۋ كەرەك. وسى دەرەكتەر نەگىزىندە بالدىق باعالاۋ، ياعني سكورينگ جۇرگىزىلەدى.
ءتورتىنشى قادام - مەملەكەتتىك تەكسەرۋ. ءوتىنىش بەرۋشىنىڭ مالىمەتتەرىن ارنايى جانە قۇقىق قورعاۋ ورگاندارى تەكسەرەدى.
بەسىنشى قادام - سۇحباتتاسۋ. تەكسەرۋدەن كەيىن ۇمىتكەرمەن سۇحباتتاسۋ وتكىزىلىپ، ءتيىستى شەشىم قابىلدانادى.
التىنشى قادام - قانداس مارتەبەسىن الۋ. سكورينگتەن ءساتتى وتكەننەن كەيىن قانداس مارتەبەسىن الۋ ءۇشىن ءتيىستى ءوتىنىش بەرۋگە بولادى.
جەتىنشى - مەملەكەتتىك قولداۋ. وڭىرلىك كۆوتاعا ەنگىزىلگەن جاعدايدا قونىس اۋدارۋعا، تۇرعىن ءۇيدى جالعا الۋعا جانە كوممۋنالدىق قىزمەتتەردى تولەۋگە سۋبسيديالار قاراستىرىلعان.
سەگىزىنشى - بەيىمدەلۋ جانە قوعامعا كىرىگۋ. مامانداندىرىلعان ورتالىقتار قۇجاتتاردى راسىمدەۋگە، جۇمىسقا ورنالاسۋعا جانە بالالاردى ءبىلىم بەرۋ ۇيىمدارىنا ورنالاستىرۋعا كومەكتەسەدى.
توعىزىنشى - تۇراقتى تۇرۋدى راسىمدەۋ. الدىمەن قازاقستاندا تۇراقتى تۇرۋعا رۇقسات الۋ قاجەت. سودان كەيىن تۇرۋعا ىقتيارحات راسىمدەلەدى.
قاجەتتى قۇجاتتاردى الدىن الا دايىنداپ، بارلىق كەزەڭنەن رەتىمەن ءوتىڭىز.
ەسكە سالايىق، بۇعان دەيىن «قانداس» مارتەبەسىن قالاي ۇيدەن شىقپاي-اق الۋعا بولاتىنى جونىندە جازعان ەدىك.