عالىمدار كۇنىنە شامامەن 25-35 گرام جاڭعاق جەۋ پايدالى دەگەن قورىتىندىعا كەلگەن.
جاڭعاق - اشتىقتى باسىپ، ۇزاق ۋاقىت توق جۇرۋگە كومەكتەسەتىن پايدالى تىسكەباساردىڭ ءبىرى. الايدا ونىڭ پايداسى تابەتتى باقىلاۋمەن عانا شەكتەلمەۋى مۇمكىن. جاڭا زەرتتەۋگە سايكەس، جاڭعاقتى كۇندەلىكتى تۇتىنۋ قان قىسىمىنىڭ جوعارىلاۋ قاۋپىنىڭ تومەن بولۋىمەن بايلانىستى.
زەرتتەۋ ناتيجەسى نەنى كورسەتتى؟
عالىمدار 18 بەن 87 جاس ارالىعىنداعى 143380 ادامنىڭ قاتىسۋىمەن جۇرگىزىلگەن سەگىز ۇزاق مەرزىمدى زەرتتەۋ ناتيجەلەرىن بىرىكتىرىپ، مەتاتالداۋ جاساعان. باقىلاۋ كەزەڭىندە قاتىسۋشىلاردىڭ 20665 ىنە گيپەرتونيا دياگنوزى قويىلعان.
تالداۋ ناتيجەسىندە كۇنىنە شامامەن 30 گرام جاڭعاق جەگەن ادامداردا ونى مۇلدە تۇتىنبايتىندارمەن سالىستىرعاندا گيپەرتونيانىڭ دامۋ قاۋپى 26 پايىزعا تومەن بولعانى انىقتالدى. ال كۇندەلىكتى راتسيونعا قوسىمشا 28 گرام جاڭعاق قوسۋ قاۋىپتىڭ شامامەن 20 پايىز تومەندەۋىمەن بايلانىستى بولعان.
زەرتتەۋشىلەر جاڭعاقتى ەڭ كوپ جانە ەڭ از تۇتىناتىن توپتاردى دا سالىستىرعان. ناتيجەسىندە جاڭعاقتى كوبىرەك جەيتىن ادامداردا گيپەرتونيانىڭ دامۋ ىقتيمالدىعى 16 پايىز تومەن بولعان. دەگەنمەن جاڭعاق مولشەرىن ارتتىرۋ ونىڭ پايداسىن دا ارتتىرادى دەگەن ءسوز ەمەس. زەرتتەۋ دەرەكتەرىنە سايكەس، كۇنىنە 25-35 گرام جاڭعاق تۇتىنعان ءجون.
جاڭعاق قان تامىرلارىنا قالاي اسەر ەتۋى مۇمكىن؟
عالىمدار جاڭعاق تۇتىنۋ مەن گيپەرتونيا ءقاۋپىنىڭ تومەندىگى اراسىنداعى بايلانىستىڭ ناقتى مەحانيزمىن ازىرگە تولىق تۇسىندىرە المايدى. دەگەنمەن ونىڭ قۇرامىنداعى بىرنەشە زات قان قىسىمىن رەتتەۋگە ىقپال ەتۋى مۇمكىن.
سونىڭ ءبىرى - L- ارگينين امينقىشقىلى. اعزا ونى ازوت توتىعىن ءوندىرۋ ءۇشىن پايدالانادى. بۇل زات قان تامىرلارىنىڭ بوساڭسىپ، كەڭەيۋىنە كومەكتەسەدى. سونىڭ ناتيجەسىندە قاننىڭ اعزادا ەركىن اينالۋىنا جاعداي جاسالادى.
جاڭعاقتىڭ قۇرامىندا ىشەككە پايدالى باكتەريالاردىڭ قورەگى سانالاتىن تاعامدىق تالشىقتار دا بار. ولار ىدىراعان كەزدە پايدا بولاتىن قوسىلىستار قان قىسىمىنىڭ رەتتەلۋىنە وڭ اسەر ەتۋى مۇمكىن.
بۇدان بولەك، جاڭعاق انتيوكسيدانتتارعا باي. ولار جۇرەك-قان تامىرلارى اۋرۋلارىنىڭ دامۋىنا ىقپال ەتۋى مۇمكىن توتىعۋ سترەسى مەن قابىنۋ ۇدەرىستەرىنە قارسى تۇرۋعا كومەكتەسەدى.
جاڭعاق قۇرامىنداعى ماگني مەن كاليي دە جۇرەك پەن قان تامىرلارىنىڭ قالىپتى جۇمىسى ءۇشىن ماڭىزدى مينەرالدار سانالادى.
وسىلايشا، زەرتتەۋ جاڭعاقتى قالىپتى مولشەردە تۇراقتى تۇتىنۋ مەن گيپەرتونيا قاۋپىنىڭ تومەندىگى اراسىندا بايلانىس بار ەكەنىن كورسەتتى. الايدا بۇل جاڭعاقتىڭ ءوزى قان قىسىمىنىڭ جوعارىلاۋىنا جول بەرمەيدى دەگەندى بىلدىرمەيدى. زەرتتەۋ ناتيجەلەرى سەبەپ-سالدار بايلانىسىن تۇپكىلىكتى دالەلدەمەيدى.