ق ر پرەزيدەنتى: كوشپەندىلەر - تۋمىسىنان قايسار حالىق
استانا. KAZINFORM - مەملەكەت باسشىسى قاسىم-جومارت توقايەۆ V دۇنيەجۇزىلىك كوشپەندىلەر ويىندارىنىڭ سالتاناتتى اشىلۋىندا كوشپەلى حالىقتىڭ تاريحتاعى رولىنە توقتالدى.
«كوشپەندىلەر قۋاتتى قارۋ-جاراق پەن عاجايىپ زەرگەرلىك بۇيىمدار جاساپ شىعاردى. ساق ءداۋىرىنىڭ التىن ادامدارى سونىڭ ايقىن دالەلى. قازاق جەرىنەن ءال- فارابي، قوجا احمەت ياسساۋي سىندى عۇلامالار شىققان. ولار ءىلىم- عىلىمنىڭ دامۋىنا وراسان زور ۇلەس قوستى. ءبىزدىڭ بابالارىمىز الىپ مەملەكەتتەر قۇردى، ۇلكەن قالالار سالدى. ۇلى دالادا وتىرار، تۇركىستان، تاراز، سارايشىق سياقتى ساۋلەتتى شاھارلار بوي كوتەردى»، - دەدى قاسىم-جومارت توقايەۆ ءدۇبىرلى دودانى رەسمي اشا تۇرىپ.
مەملەكەت باسشىسىنىڭ مالىمدەۋىنشە، كوشپەندى جۇرت باتىس پەن شىعىسقا كوپىر بولىپ، ءتۇرلى مادەنيەتتىڭ جاقىنداسۋىنا اسەر ەتتى.
«وسى جەردە ەجەلگى عۇن يمپەرياسى، ودان سوڭ تۇرىك قاعاناتى سالتانات قۇرىلدى. ولاردىڭ داڭقتى جولىن التىن وردا مەن قازاق حاندىعى جالعاستىردى. كوشپەندىلەر وركەنيەتى ناعىز كورنەكى وركەنيەت. شىن مانىندە، كوشپەندى حالىقتار بارلىق قۇرلىقتا بار، ولاردىڭ ءىزىن ەۋروپا مەن ازيادان، افريكامەن امەريكادان كورۋگە بولادى. كوشپەندىلەردىڭ مادەنيەتى، رۋحاني قازىناسى، قۇندىلىقتارى ورتاق. كوشپەندى حالىق ەڭ الدىمەن رۋحى ازات جۇرت. كوشپەندىلەر ءۇشىن ءومىر ماڭگىلىك قوزعالىس. ولاردىڭ ءار قادامى جاڭا الەمدە جاسالعان جاسامپاز قادام. ءبىز ەجەلدەن قوناقجاي حالىقپىز، جاڭالىققا جانى قۇمار، ءتۇرلى مادەنيەتكە اشىق جۇرتپىز. ءبىزدىڭ ءومىر سالتىمىز تابيعاتپەن ەرەكشە ۇيلەسىم تاپقان. كوشپەندىلەر تۋمىسىنان قايسار حالىق»، - دەيدى پرەزيدەنت.
بۇعان دەيىن قاسىم-جومارت توقايەۆ كوشپەندىلەر وركەنيەتى دۇنيەجۇزى تاريحىندا وشپەس ءىز قالدىرعانىن ايتتى.