ق. قۋانىشبايەۆ اتىنداعى دراما تەاتردا «ءشامشى» قويىلىمى ساحنالاندى

استانا. KAZINFORM - كەشە ەلورداداعى قاليبەك قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىندا قازاق ءۆالسىنىڭ كورولى ءشامشى قالداياقوۆتى ەسكە الۋعا ارنالعان «ءشامشى» سپەكتاكل-ەلەگياسى ساحنالاندى.

قويىلىمدى تاماشالاۋعا سەنات ءتوراعاسى ماۋلەن اشىمبايەۆ باستاعان ءبىر توپ سەناتور ارنايى باردى.

پالاتا سپيكەرى ءوز سوزىندە ءشامشى قالداياقوۆ - قازاق حالقىنىڭ ۇلتتىق ماقتانىشى، وتان سۇيگىشتىك مەن اسقاق رۋحتىڭ ۇلگىسى ەكەنىن اتاپ ءوتتى. كورنەكتى كومپوزيتوردىڭ شىعارمالارى ەشقاشان ەسكىرمەيدى جانە قازاق حالقىنىڭ رۋحاني ءومىرى مەن مادەنيەتىنىڭ تورىنەن ورىن الادى. ءشامشىنىڭ تۋىندىلارى ءار بۋىننىڭ وكىلدەرىنە كەڭىنەن تانىمال.

ماۋلەن اشىمبايەۆ قازىرگى تاڭدا ەلىمىزدە مەملەكەت باسشىسى قاسىم-جومارت توقايەۆتىڭ تاپسىرماسى بويىنشا مادەنيەت سالاسىنا ۇلكەن قولداۋ كورسەتىلىپ كەلە جاتقانىن، وسى باعىتتا كەشەندى شارالار قولعا الىنعانىن اتاپ ءوتتى. سونداي-اق سەنات ءتوراعاسى ونەر ۇجىمىنا ۇلتتىق مادەني قۇندىلىقتاردى ناسيحاتتاپ، كومپوزيتوردىڭ شىعارماشىلىعىن دارىپتەگەنى ءۇشىن العىسىن ءبىلدىردى.

«ءشامشى» ەلەگياسىنىڭ اۆتورى - بەلگىلى اقىن سەرىك تۇرعىنبەك ۇلى. ول ۇلى كومپوزيتوردىڭ جۇمباق الەمىنە ءۇڭىلىپ، جان دۇنيەسىنىڭ نازىك قىرلارىن شىعارماسىنا ارقاۋ ەتتى. قويىلىمنىڭ رەجيسسەرى - قازاقستاننىڭ ەڭبەك سىڭىرگەن قايراتكەر بولات ۇزاقوۆ. 

سپەكتاكلدە ءشامشى قالداياقوۆتىڭ «اق ماڭدايلىم»، «قايىقتا»، «كەشىكپەي كەلەم دەپ ەڭ...» ، «باقىت قۇشاعىندا»، «سىعان سەرەناداسى»، «انا تۋرالى جىر»، «تەرىسكەي» جانە باسقا شىعارمالارى ورىندالدى.