ق ح ر ا ق ش-تان قىتايلىق ستۋدەنتتەر مەن عالىمدارعا قىسىم جاساۋدى توقتاتۋدى تالاپ ەتتى
استانا. KAZINFORM - قىتايدىڭ سىرتقى ىستەر مينيسترلىگى دۇيسەنبى كۇنى ا ق ش- تى كىناسىزدىك پرەزۋمپتسياسىن ساقتاۋعا جانە ساياسي استارمەن ارەكەت ەتۋدى توقتاتۋعا شاقىردى، دەپ حابارلايدى سينحۋا.
بۇل رەتتە ا ق ش- تا جۇرگەن قىتايلىق ستۋدەنتتەر مەن عالىمدارعا قاتىستى ساياسي سەبەپتەرمەن جانە كەمسىتۋشىلىك سيپاتتا زاڭ قولدانۋ ارەكەتتەرىن توقتاتۋعا ۇندەدى.
قىتايدىڭ سىرتقى ىستەر مينيسترلىگىنىڭ رەسمي وكىلى گو جياكۋن بۇل مالىمدەمەنى مينيسترلىكتىڭ كەزەكتى باسپا ءسوز ءماسليحاتىندا جۋرناليستەردىڭ تاعى ءبىر قىتايلىق عالىمنىڭ ا ق ش قۇقىق قورعاۋ ورگاندارى تاراپىنان ەش نەگىزسىز تۇتقىندالۋىنا قاتىستى پىكىر سۇراۋىنا جاۋاپ رەتىندە جاسادى.
ونىڭ ايتۋىنشا، بەلگىلى ءبىر ۋاقىتتان بەرى ا ق ش ۇلتتىق قاۋىپسىزدىك تۇجىرىمداماسىن كەڭەيتىپ، ەلدە جۇرگەن كوپتەگەن قىتايلىق ستۋدەنت پەن زەرتتەۋشىلەردى قۋدالاۋعا، تەرگەۋگە، ءتىپتى ەشقانداي نەگىزسىز تۇتقىنداپ، ايىپ تاعۋعا ءجيى جول بەرگەن.
— بۇل جاعدايلار قىتايلىق ستۋدەنتتەر مەن عالىمداردىڭ زاڭدى قۇقىقتارى مەن مۇددەلەرىن ەلەۋلى تۇردە بۇزدى. سونداي- اق قىتاي مەن ا ق ش اراسىنداعى گۋمانيتارلىق بايلانىستارعا، اسىرەسە ءبىلىم بەرۋ سالاسىنداعى ىنتىماقتاستىققا ايتارلىقتاي كەدەرگى كەلتىردى. اقىر سوڭىندا ا ق ش- تىڭ يميدجى مەن حالىقارالىق بەدەلىنە نۇقسان كەلتىردى، - دەدى گو تسزياكۋن.
ديپلومات ا ق ش- تان «كىناسىزدىك پرەزۋمپتسياسىنا» نەگىزدەلگەن ادىلەتتىلىك قاعيداتتارىنا ورالۋىن، سونداي-اق ساياسي استارمەن ارەكەت ەتۋدى توقتاتۋدى تالاپ ەتتى. سونىمەن بىرگە امەريكالىق باسشىلاردىڭ قىتايلىق ستۋدەنتتەردى وقۋعا شىنايى شاقىرامىز دەگەن مالىمدەمەلەرىن ناقتى ىسكە اسىرۋعا شاقىردى.
— قىتاي شەتەلدە جۇرگەن ستۋدەنتتەرى مەن عالىمدارىنىڭ زاڭدى قۇقىقتارى مەن مۇددەلەرىن قورعاۋدى جالعاستىرادى. سونىمەن قاتار ا ق ش- تا وقىپ جۇرگەن ستۋدەنتتەرگە مۇمكىن بولاتىن قاۋىپ-قاتەرلەرگە ساق بولۋدى ەسكەرتەدى، - دەپ تۇيىندەدى ول.
بۇعان دەيىن ا ق ش- تاعى ءتورت قىتايلىق ستۋدەنت دونالد ترامپ اكىمشىلىگىن سوتقا بەردى. ولار ا ق ش ۇكىمەتىنىڭ شەتەلدىك ستۋدەنتتەرگە قاتىستى ۆيزانى جاپپاي جويۋ ارەكەتىن زاڭسىز دەپ تانىپ، ونى توقتاتۋدى جانە ستۋدەنتتىك مارتەبەنى قالپىنا كەلتىرۋدى تالاپ ەتىپ وتىر.
وسىدان بۇرىن رۋبيو ا ق ش قىتايلىق ستۋدەنتتەردىڭ ۆيزاسىن قايتارىپ الاتىنىن ايتتى.