جوبا ىسكە قوسىلعالى بەرى پلاتفورماعا 8 مىڭنان استام ادام تىركەلىپ، ولار بىرگە 960 مىڭعا جۋىق بەت وقىعان. بۇل تۋرالى پلاتفورمانىڭ نەگىزىن قالاۋشى ەرداۋلەت ايان ۇلى Jibek Joly تەلەارناسىندا ايتتى.
ونىڭ ايتۋىنشا، يدەيا بىرنەشە جىل بۇرىن ءوزىنىڭ كىتاپ وقۋعا دەگەن قىزىعۋشىلىعىنان باستالعان. ول وقىرماندار كلۋبىنا قوسىلىپ، كەيىن ەرىكتىلەرمەن بىرگە كىتاپ وقۋ مادەنيەتىن ناسيحاتتاۋعا كىرىسكەن. استانادا باس قوساتىن ورىن بولماعاندىقتان، كوماندا كىتاپسۇيەر قاۋىمعا ارنالعان كوفەحانا اشقان. الايدا قارجىلىق قيىندىقتارعا بايلانىستى بۇل جوبانى جابۋعا تۋرا كەلگەن.
— ول ورىن مەن ءۇشىن ەرەكشە، جىلى ءارى جاقىن مەكەن بولدى. وندا ءتۇرلى شىعارماشىلىق ءىس-شارالار وتكىزىلىپ، استاناداعى كىتاپ وقۋعا قىزىعاتىن ادامداردى جينادىق. جوبانى جابۋ وڭاي بولعان جوق. ءبىراق كىتاپ وقۋ مادەنيەتىن دامىتۋ يدەياسىنان باس تارتقىم كەلمەدى. بۇعان دەيىن قولدانعان Telegram-بوتىمىز بار ەدى. العاشىندا ونى وقىعان بەتتەردى بەلگىلەيتىن قۇرال رەتىندە پايدالاندىق. كەيىن وسى يدەيانى دامىتىپ، سايت جاساۋعا كىرىستىم، - دەدى ەرداۋلەت ايان ۇلى.
ونىڭ ايتۋىنشا، العاشقى نۇسقانى ازىرلەۋگە جاساندى ينتەللەكت كومەكتەسكەن. سايتتىڭ باستاپقى نۇسقاسى ءۇش ايدا دايىن بولعان. كەيىنگى ءتورت-بەس ايدا پلاتفورماعا جاڭا مۇمكىندىكتەر قوسىلىپ، ديزاينى جەتىلدىرىلگەن. جالپى، جوبانى ازىرلەۋ جۇمىسى سەگىز-توعىز ايعا سوزىلعان.
پلاتفورمانىڭ باستى ەرەكشەلىگى - وقىرمانعا كىتاپ وقۋدى جۇيەلەۋگە كومەكتەسۋى. قولدانۋشى قاعاز كىتاپ وقىسا دا، ەلەكتروندى نۇسقاسىن پايدالانسا دا، وقىعان بەتتەرىن بەلگىلەپ، جەكە وقۋ ستاتيستيكاسىن جۇرگىزە الادى. ال پلاتفورماداعى كىتاپتاردى سايتتىڭ وزىنەن وقۋعا مۇمكىندىك بار.
قازىر PARAQTA كىتاپحاناسىندا 148 كىتاپ ۇسىنىلعان. ولاردىڭ قاتارىندا قازاقتىڭ حالىق ەرتەگىلەرى، ابايدىڭ قارا سوزدەرى، اعىلشىن جانە ورىس تىلىندەگى كىتاپتار، سونداي-اق اۋدارما شىعارمالار بار. جوبا اۆتورىنىڭ سوزىنشە، وقىرماندار قازاق كلاسسيكاسى مەن ۇلتتىق ادەبيەتكە كوبىرەك قىزىعۋشىلىق تانىتادى.
جوبادا وقىرماننىڭ بەلسەندىلىگىن ارتتىرۋعا ارنالعان جەكە اككاۋنت جۇيەسى دە قاراستىرىلعان. قولدانۋشى كىتاپ وقىعان سايىن جۇلدىزشا جيناپ، پاراقشاسىنىڭ ديزاينىن وزگەرتىپ، ۆيرتۋالدى بولمەسىن بەزەندىرە الادى. وسىلايشا ادامنىڭ وقۋ بەلسەندىلىگى ونىڭ جەكە پاراقشاسىنان دا كورىنىس تابادى.
- ءبىز ادامداردى كىتاپتى كۇشتەپ وقىتۋعا بولمايدى دەپ ويلايمىز. وعان قىزىقتىراتىن باسقا جول تابۋ كەرەك. مىسالى، ءبىزدىڭ پلاتفورمادا ادام كوپ وقىعان سايىن جۇلدىزشا جينايدى. ونى جەكە پاراقشاسىن بەزەندىرۋگە پايدالانا الادى. كىتاپ وقۋدى وسىنداي شاعىن جەتىستىكتەر ارقىلى ىنتالاندىرۋعا بولادى. ءبىر جىلدا 60 كىتاپ وقىعان ءتورت قاتىسۋشىمىز بار. بۇل - وقۋعا دەگەن تۇراقتى ادەت قالىپتاستىرۋعا بولاتىنىن كورسەتەتىن مىسال، - دەدى جوبا اۆتورى.
پلاتفورمادا اقىلى جانە تەگىن مۇمكىندىكتەر بار. اقىلى نۇسقادا وقىرمان كىتاپتى وزگە قولدانۋشىلارمەن قاتار وقىپ، ولاردىڭ قانشا بەتكە جەتكەنىن جانە وقۋ قارقىنىن كورە الادى. سونىمەن بىرگە وقىرماندار كلۋبتارىنا قاتىسىپ، رەيتينگ جۇيەسىندە ءوز بەلسەندىلىگىن سالىستىرۋعا مۇمكىندىك بار. كىتاپ تۋرالى پىكىر قالدىرۋ قىزمەتى دە قاراستىرىلعان. قازىر پلاتفورمادا 600-گە جۋىق پىكىر جينالعان.
ەرداۋلەت ايان ۇلىنىڭ ايتۋىنشا، جوبانىڭ تاعى ءبىر ماقساتى - وقىرمانداردى ءبىر ورتاعا بىرىكتىرۋ. قالاداعى كىتاپسۇيەر قاۋىم باس قوسىپ، وقىعان شىعارمالارىن تالقىلاي الادى. قازىر استاناداعى وقىرماندار كلۋبىندا 300-گە جۋىق ادام بار. ولاردىڭ اراسىندا 20- 25 جاستاعى جاستار بەلسەندى.
— مەنىڭ ماماندىعىم - ينجەنەر- جوبالاۋشى. نەگىزگى جۇمىسىم ءوز سالامدا، ال PARAQTA باستاپقىدا حوببي رەتىندە باستالدى. ءبىراق كىتاپتىڭ ادامنىڭ ويلاۋىنا، دۇنيەتانىمىنا قالاي اسەر ەتەتىنىن تۇسىنگەن سايىن، وسى تاجىريبەنى وزگەلەرمەن دە بولىسكىم كەلدى. قازىر بۇل باستاما جەكە ىسكە اينالىپ كەلەدى. كوماندادا ەكى ادام عانا جۇمىس ىستەيمىز، جاساندى ينتەللەكت قۇرالدارىن دا قوسىمشا پايدالانامىز، - دەدى ول.
جوبا اۆتورى الداعى ۋاقىتتا پلاتفورمانى موبيلدى قوسىمشاعا اينالدىرۋدى جوسپارلاپ وتىر. قازىر iPhone قولدانۋشىلارىنا ارنالعان نۇسقانى App Store دۇكەنىنە شىعارۋ ءۇشىن رۇقسات كۇتىپ وتىر. Android جۇيەسىنە ارنالعان قوسىمشانى دا ازىرلەۋ جوسپاردا بار. قوسىمشانى جۇكتەۋ تەگىن بولادى، الايدا اقىلى جازىلىمدار دا ساقتالادى.
ەرداۋلەت ايان ۇلىنىڭ پىكىرىنشە، كىتاپ وقۋدى كەڭىنەن ناسيحاتتاۋ ءۇشىن ونى ادامداردىڭ كۇندەلىكتى ومىرىنە ىڭعايلى ەتىپ ەنگىزۋ قاجەت. ونىڭ سوزىنشە، سيفرلىق پلاتفورمالار مەن موبيلدى قوسىمشالار وقۋعا قىزىعۋشىلىقتى ارتتىرىپ، ادامدارعا ءوز وقۋ داعدىسىن قالىپتاستىرۋعا كومەكتەسە الادى.
PARAQTA كومانداسى وسىلايشا كىتاپتى جاي عانا وقىپ شىعۋعا ەمەس، ودان العان ويدى سارالاپ، پىكىر بولىسۋگە جانە تۇراقتى وقۋ ادەتىن قالىپتاستىرۋعا مۇمكىندىك بەرەتىن ورتا قۇرۋدى كوزدەيدى.
وسىعان دەيىن پرەزيدەنت كىتاپ وقۋدىڭ جاستاردى اقپارات تاسقىنىنا جۇتىلىپ كەتۋدەن ساقتايتىن رۋحاني قالقان ەكەنىن ايتقان بولاتىن.