نيگەرياداعى سۋ تاسقىنى ءۇش ايدا 321 ادامنىڭ ءومىرىن قيدى

استانا. KAZINFORM - سۋ تاسقىنىنان ەلدەگى 36 شتاتتىڭ 34 ءى زارداپ شەكتى. 217 ەلدى مەكەندى قامتىعان تابيعي اپاتتان بارلىعى 1,4 ميلليونعا جۋىق ادام زارداپ شەكتى، دەپ حابارلايدى Daily Trust.

سۋ تاسقىنى مەملەكەت جانە جەكە مەنشىك يەلىكتەرى ايتارلىقتاي شىعىن اكەلدى. 280 مىڭنان استام تۇرعىن ءۇي مەن 258 مىڭ گەكتار ەگىس القاپتارى قيرادى.

2024-جىلى اپات ادەتتە جاۋىن-شاشىن مول تۇسەتىن ەلدىڭ وڭتۇستىگىندە عانا ەمەس، سونىمەن قاتار قۇرعاق جانە ءشولدى سولتۇستىكتە دە ويران سالدى. بولاشاقتا سۋ تاسقىنىنىڭ وسىنداي اۋىر زارداپتارىن بولدىرماۋ ءۇشىن بيلىك نيگەريانىڭ وزەندەرى، كولدەرى جانە باسقا دا سۋ قويمالارىن تۇگەندەۋدى بۇيىردى.

جاڭبىرلى ماۋسىمنىڭ اياقتالۋى باتىس افريكانىڭ كوپتەگەن ەلىندە بۇرىن-سوڭدى بولماعان سۋ تاسقىنىنا اكەلدى. نيگەريا، چاد، مالي، گۆينەيا، نيگەر، كامەرۋن، گانا جانە ليبەريادا 4 ميلليوننان استام ادام زارداپ شەكتى.

ساراپشىلار جويقىن سۋ تاسقىنىنىڭ سەبەپتەرىن جاھاندىق كليماتتىڭ وزگەرۋىمەن بايلانىستىرىپ وتىر. حالىقارالىق قىزىل كرەست كوميتەتىنىڭ (ح ق ك ك) مالىمەتىنشە، ساحەلدەگى ورتاشا تەمپەراتۋرا باسقا ەلدەرمەن سالىستىرعاندا ءبىر جارىم ەسە جىلدام كوتەرىلىپ وتىر.

بۇعان دەيىن يسپانيادا نوسەر جاڭبىر سالدارىنان بولعان سۋ تاسقىنىنان قازا تاپقاندار سانى 158 گە جەتكەنىن جازعان بولاتىنبىز.