ۋنيۆەرسيتەتتە 4 جىل وقۋ قازىرگى زامان ءۇشىن تىم ۇزاق - ساياسات نۇربەك
استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ەلوردادا وتكەن فورۋمدا جوعارى ءبىلىم نارىعىنداعى جاڭا ترەندتەردىڭ ءداستۇرلى وقۋ فورماتىن وزگەرتە باستاعانىن ايتتى.
«ءبىلىم سالاسىن زەرتتەيتىن HolonIQ دەيتىن اۋستراليالىق حالىقارالىق اگەنتتىك بار. سونىڭ 2024-جىلعا ارنالعان ەسەبى شىقتى. ول ەسەپتە بيىل ترەندتە بولاتىن ەكى نەگىزگى قۇبىلىس اتالعان. ونىڭ ءبىرىنشىسى - جوعارى ءبىلىم سالاسىندا جاڭا داعدىلار مەن جاڭا بىلىكتىلىكتەردىڭ پايدا بولۋى. ياعني، ءبىزدىڭ قاتىپ قالعان 4 جىلدىق، 3 جىلدىق، 5-6 جىلدىق وقىتۋ سيكلدارىمىز - ۇزاق. ەڭبەك نارىعى ولاردى كۇتە المايدى. ەڭبەك نارىعىنا قىسقا ۋاقىتتا نەعۇرلىم كوپ ادامدى جاڭا داعدىلارعا ۇيرەتەتىن قۇرالدار قاجەت. بۇعان دەيىن بىلىكتىلىك ارتتىرۋ ترەندتە بولسا، ەندى كەز كەلگەن قىزمەتكەردىڭ نەگىزگى ءبىلىم بازاسىن قىسقا مەرزىمدە زامان تالابىنا ساي داعدىلارمەن اۋىستىرۋ ترەندتە بولادى. ياعني، دايىن ماماندى 2-3 ايلىق كۋرس ارقىلى جاڭا تەحنولوگيالارعا ۇيرەتۋ وزەكتى بولماق»، - دەدى ساياسات نۇربەك.
سونداي-اق، ول ج و و- لاردىڭ باسەكەگە قابىلەتىن انىقتايتىن جاڭا يندەكس پايدا بولاتىنىن اتاپ ءوتتى.
«ءبىز جوعارى وقۋ ورىندارىنىڭ تسيفرلىق جانە جاساندى ينتەللەكت تەحنولوگيالارىنا دايىن بولۋ يندەكسىنە قوسىلۋ تۋرالى شەشىم قابىلدادىق. بيىلدان باستاپ ءبىزدىڭ ج و و- لار وسى يندەكسپەن اقىرىنداپ باعالانا باستايدى. بۇل - ەرىكتى. ءبىزدىڭ تاراپىمىزدان ەشقانداي كوندىرۋ بولمايدى. يندەكستىڭ نەگىزگى ماقساتى - كەز كەلگەن جوعارى وقۋ ورنىنىڭ جوعارى تەحنولوگيالارعا قانشالىقتى دايىن ەكەنىن باعالاۋ.
سوڭعى جاڭالىقتاردى ەستىگەن شىعارسىزدار، OpenAI (ChatGPT جوباسىنىڭ مەنشىك يەسى) وقۋ ورىندارىمەن بىرلەسىپ جۇمىس ىستەي باستادى. ونىڭ ىشىندە Arizona State University دە بار. ASU قازىر دۇنيەجۇزىندەگى تولىققاندى ۋنيۆەرسيتەت بولىپ ەسەپتەلەدى. ءبىزدىڭ جوعارى وقۋ ورىندارىنا دا وسى باعىتتا اقىرىنداپ ويلانۋ كەرەك»، - دەدى مينيستر.