نوسەر جاۋىن سالدارىنان 40 ادام قازا تاپتى
10:29, 17 - شىلدە 2024
استانا. KAZINFORM - اۋعانستاننىڭ شىعىسىندا جاۋعان نوسەر جاۋىن سالدارىنان 40 ادام قازا تاۋىپ، 350 گە جۋىق ادام جاراقات الدى، دەپ حابارلايدى Associated Press.
دەنساۋلىق ساقتاۋ مينيسترلىگىنىڭ باسپا ءسوز حاتشىسى شارافات زامان امار دۇيسەنبى كۇنگى داۋىل سالدارىنان 40 ادامنىڭ قازا تاپقانىن جانە جاراقات العان 347 ادامنىڭ جەلالابادتان نانگارحارداعى ايماقتىق اۋرۋحاناعا جانە جاقىن ورنالاسقان اۋداندارعا جەتكىزىلگەنىن راستادى.
پروۆينتسيا وكىلى سەديكۋللا كۋرەيشيدىڭ ايتۋىنشا، قازا بولعاندار اراسىندا ءبىر وتباسىنىڭ بەس مۇشەسى بار. ولار ءۇيدىڭ توبەسى قۇلاپ، كوز جۇمدى.
نانگارحار پروۆينتسياسىندا 400 گە جۋىق ءۇي قيرادى. كوپتەگەن اۋداندا ەلەكتر جارىعى ءوشىرىلدى. جەلالاباد قالاسىندا بايلانىس شەكتەلدى. كەلتىرىلگەن شىعىن ءالى ەسەپتەلىپ جاتىر.