نورۆەگيالىق مۇراگەر حانشايىمنىڭ ۇلىن پوليتسيا 23 ساعاتقا قامادى
استانا. KAZINFORM-نورۆەگيانىڭ مۇراگەر حانشايىمى مەتتە-ءماريتتىڭ ۇلى ماريۋس بورگ ءحويبيدى پوليتسيا بۇرىنعى سۇيىكتىسىنە زورلىق- زومبىلىق كورسەتتى، سونىمەن قاتار مۇلكىنە زيان كەلتىردى دەگەن كۇدىكپەن ۇستادى، دەپ جازادى ازەرتادج.
اگەنتتىكتىڭ حابارلاۋىنشا، كنيازدىك اتاعى دا، كورولدىك مىندەتى دە جوق 27 جاستاعى ماريۋس 23 ساعاتىن پوليتسيا بولىمشەسىندە وتكىزگەن.
بىرنەشە كۇندىك ۇنسىزدىكتەن كەيىن ماريۋس وسلونىڭ فروگنەر اۋدانىنداعى 26 جاستاعى ايەلدىڭ پاتەرىندە بولعان وقيعاعا تۇسىنىك بەرىپ، ونىڭ الكوگول مەن كوكاين اسەرىنەن جاسالعانىن ايتتى.
ءوز مالىمدەمەسىندە ول ءتۇرلى پسيحيكالىق بۇزۋشىلىقتاردان زارداپ شەككەنىن، سونىڭ سالدارىنان ەرەسەك ومىرىندە قيىندىقتارعا تاپ بولعانىن، سونىمەن قاتار الكوگولگە تاۋەلدىلىكتەن ەمدەلگەنىن، ونى قايتا جالعاستىرۋعا نيەتتى ەكەنىن مويىندادى.
ماريۋس سونىمەن قاتار بۇرىنعى سۇيىكتىسىنەن كەشىرىم سۇراپ، ونى فوتوگرافتار مەن جۋرناليستەردىڭ قۋدالاۋىنا تاپ قىلعانىنا وكىنىش ءبىلدىردى.
ماريۋستىڭ قاماۋعا الىنۋى مەن مالىمدەمەسى نورۆەگيادا سىن مەن جاناشىرلىققا تولى ەڭ كوپ تالقىلانعان تاقىرىپ بولدى.
ءبىر قىزىعى، وسى جىلدىڭ ناۋرىز ايىندا مەتتە-ماريت ايەلدەرگە قاتىستى زورلىق- زومبىلىقتىڭ الدىن الۋعا ارنالعان جيىنعا قاتىسقان.
ءتاج حانشايىمى زورلىق كورگەن ايەلمەن بايلانىسقا شىقتى، ول ازىرگە وقيعا تۋرالى اقپارات قۇرالدارىنا تۇسىنىك بەرۋدەن باس تارتتى.
ماريۋستىڭ 29 جاستاعى بۇرىنعى سەرىكتەسىنىڭ الەۋمەتتىك جەلىدەگى «بۇرىن مەن دە بۇل ادامنان پسيحولوگيالىق جانە فيزيكالىق تۇرعىدان زورلىق كورگەنمىن، ءبىراق ءقازىر بۇل تۋرالى ءۇنسىز قالماۋدى ءجون كوردىم. مۇنى توقتاتۋ كەرەك!»- دەگەن جازباسى قوعام نازارىن اۋداردى.
ايتا كەتەيىك، دەنەگە زيان كەلتىرەتىن قىلمىس نورۆەگيانىڭ قىلمىستىق كودەكسىندەگى زورلىق- زومبىلىق قىلمىسىنىڭ ەڭ وڭاي ءتۇرى سانالادى جانە ايىپپۇل سالۋعا نەمەسە ءبىر جىلعا دەيىن باس بوستاندىعىنان ايىرۋ جازاسى قاراستىرىلۋى مۇمكىن.
سونداي- اق بۇزاقىلىق جانە مۇلىكتىك زيان ءۇشىن ايىپپۇل نەمەسە ءبىر جىلعا دەيىن باس بوستاندىعىنان ايىرۋ جازاسى قاراستىرىلعان.
پوليتسيانىڭ مالىمەتىنشە، جاۋاپ الۋ كەلەسى اپتادا وتەدى.