نوبەل لاۋرەاتى: جەرى ۇلكەن ەلدەرگە اتوم ەنەرگەتيكاسىنىڭ قالدىقتارى پروبلەما تۋعىزا قويمايدى
نوبەل سىيلىعىنىڭ لاۋرەاتى، ب ۇ ۇ جانىنداعى كليمات وزگەرىسى جونىندەگى ۇكىمەتارالىق ساراپشىلار توبىنىڭ مۇشەسى چون رە كۆون «Astana Club» فورۋمىندا قازاقستاننىڭ اتوم ەنەرگەتيكا سالاسىنداعى الەۋەتى جايىندا پىكىر ءبىلدىردى، دەپ حابارلايدى Kazinform.
ونىڭ سوزىنشە، سۋ تاپشىلىعى - قازاقستان ءۇشىن كەلەشەكتەگى ەڭ ۇلكەن سىن- قاتەردىڭ ءبىرى.
«كليمات وزگەرىسىنەن بولىپ جاتقان كەرى اسەرلەر عالىمدار كۇتكەننەن دە اۋقىمدى بولىپ شىقتى. ونىڭ ىشىندە ورتالىق ازيادا احۋال وتە كۇردەلى بولايىن دەپ تۇر. ويتكەنى ورتالىق ازيادا، ونىڭ ىشىندە قازاقستاندا تاياۋ شىعىستا جانە سولتۇستىك افريكادا تەمپەراتۋرانىڭ ايتارلىقتاي جوعارى كوتەرىلەتىن ءتۇرى بار»، - دەدى ساراپشى.
عالىم كليماتتىڭ وزگەرۋىنەن الەمدە ورمان ورتتەرى جيىلەپ، قۋاڭشىلىق كوبەيگەنىن، سۋ تاسقىنى جىل سايىن كۇتىلەتىن قۇبىلىسقا اينالعانىن ايتادى.
«ورتالىق ازيا سۋ تاپشىلىعى مەن قۋاڭشىلىقتان زارداپ شەككەلى وتىر. بۇل - وتە كۇردەلى پروبلەما. قازاقستان بۇل پروبلەمامەن كۇرەسكە تاس-ءتۇيىن دايىن بولۋى كەرەك. ويتكەنى ەلدى كۇتىپ تۇرعان ەڭ سالماقتى سىن-قاتەردىڭ ءبىرى - وسى»، - دەيدى چون رە كۆون.
عالىمنىڭ پايىمىنشا، قازاقستان سياقتى جەرى ۇلكەن ەلگە اتوم ەنەرگەتيكاسىنىڭ قورشاعان ورتاعا اسەرىن ەڭسەرۋ وڭاي بولادى.
«يادرولىق ەنەرگەتيكا تۋرالى ءار ەلدىڭ ءوز پايىمى بار دەپ ويلايمىن. مىسالى، گەرمانيا يادرولىق ەنەرگەتيكانى ەشقاشان ەنگىزبەۋ كەرەك دەگەن ۇستانىمدا وتىر. بۇل تەحنولوگيانىڭ ەنۋى ەلدەگى ساياسي جانە الەۋمەتتىك ماسەلەلەردىڭ شەشىمىنە بايلانىستى. قازاقستاننىڭ جاعدايىن الساق، سىزدەردىڭ اۋماقتارىڭىز ۇلكەن. سوندىقتان يادرو قالدىقتارىن كومەتىن ورىن ماسەلەسىنەن قينالمايسىزدار دەپ ويلايمىن. ال كورەيا سياقتى ەلدەرگە بۇل وتە قيىن بولادى»، - دەدى نوبەل سىيلىعىنىڭ لاۋرەاتى.
اۆتور
ەسىمجان ناقتىباي