Nvidia الەمدەگى ەڭ قۇندى كومپانيا اتاندى
استانا. KAZINFORM - امەريكالىق چيپ ءوندىرۋشى Nvidia كومپانياسى اكسيالارىنىڭ باعاسى جوعارى دەڭگەيگە كوتەرىلىپ، الەمدەگى ەڭ قۇندى كومپانيا اتاندى. فيرمانىڭ جەتىستىگى، ەڭ الدىمەن، جاساندى ينتەللەكت سەكتورىنا ءباس تىگۋ تۋرالى شەشىمىمەن بايلانىستى، دەپ حابارلايدى BBC.
سەيسەنبى كۇنگى ساۋدانىڭ سوڭىندا Nvidia اكسيالارى شامامەن 136 دوللاردى قۇرادى، بۇل سەگىز جىل بۇرىنعىدان ءجۇز ەسە كوپ.
قازىر كومپانيانىڭ قۇنى كەشە كەشكە دەيىن عالامشارداعى ەڭ قۇندى كومپانيالاردىڭ الەمدىك رەيتينگىن باسقارعان Microsoft-تان دا قىمبات.
ماۋسىم ايىنىڭ باسىندا Nvidia بۇل كورسەتكىش بويىنشا Apple ءدى باسىپ وزىپ، ونى ءۇشىنشى ورىنعا ءتۇسىردى.
قازىرگى ۋاقىتتا نارىق Nvidia-نى 3,34 تريلليون دوللارعا باعالايدى، تەك وسى جىلدىڭ اقپان ايىنان باستاپ كومپانيانىڭ قۇنى ءبىر جارىم ەسەدەن استامعا ءوستى.
Nvidia دەربەس كومپيۋتەرلەرگە ارنالعان گرافيكالىق كارتالاردان باسقا جاساندى ينتەللەكتتى دامىتۋ جانە ۇيرەتۋ ءۇشىن قاجەتتى كومپيۋتەرلىك چيپتەردى جاسايدى جانە ونىڭ ونىمدەرىنە سۇرانىس ارتۋدا - ونىمەن بىرگە ساتىلىمدار مەن پايدا دا ءوسىپ كەلەدى.
مامىر ايىندا كومپانيا اكسيالاردى ءبولۋدى جۇزەگە اسىراتىنىن جاريالادى. باسقاشا ايتقاندا، ول اكسيالاردىڭ سانىن ون ەسە ارتتىرىپ، سايكەسىنشە قۇنىن تومەندەتەدى.
مامىر ايىنىڭ سوڭىندا Nvidia اكسيالارى 1200 دوللارعا ساتىلدى، بۇل شاعىن ينۆەستورلار ءۇشىن وتە ۇلكەن سوما. قازىرگى باعا بويىنشا كومپانيانىڭ اكسيالارىن كەز كەلگەن ادام ساتىپ الا الادى.