پەنتاگون لوس-اندجەلەستەگى ۇلتتىق گۆارديانىڭ ءبىر بولىگىن قايتارادى

استانا. KAZINFORM – ا ق ش قورعانىس مينيسترلىگى (پەنتاگون) لوس-اندجەلەستە زاڭسىز ميگرانتتاردى قولداعان نارازىلىقتاردى باسۋ ءۇشىن جىبەرىلگەن ۇلتتىق گۆارديانىڭ ءبىر بولىگىن كەرى قايتارۋ تۋرالى بۇيرىق بەردى.

پەنتاگوننىڭ باسپا ءسوز حاتشىسى شون پارنەلل جازباشا مالىمدەمەسىندە «مىندەت ءساتتى ورىندالعانىنا بايلانىستى» پرەزيدەنت دونالد ترامپتىڭ بۇيرىعىمەن لوس-اندجەلەسكە جىبەرىلگەن شامامەن 4 مىڭ گۆارديالىقتىڭ 2 مىڭى تۇراقتى قىزمەت ورىندارىنا قايتارىلاتىنىن حابارلادى.

ا ق ش قورعانىس ءمينيسترى پيت حەگسەت ۇلتتىق گۆارديا مەن تەڭىز جاياۋ اسكەرلەرى ايماقتا يمميگراتسيا جانە كەدەن پوليتسياسى (ICE) قىزمەتكەرلەرىنىڭ قاۋىپسىزدىگىن قامتاماسىز ەتۋ ءۇشىن جىبەرىلگەنىن مالىمدەدى.

لوس-اندجەلەستەگى ICE- گە قارسى نارازىلىقتار

ا ق ش- تىڭ لوس-اندجەلەس قالاسىندا زاڭسىز ميگرانتتاردى ۇستاپ جاتقان ICE- گە قولداۋ بىلدىرەتىن نارازىلىق شارالارى كەزىندە كوپتەگەن ادام ۇستالدى؛ كەي كەزدەرى نارازىلار مەن قاۋىپسىزدىك كۇشتەرى اراسىندا قاقتىعىستار دا بولدى.

پرەزيدەنت دونالد ترامپ جاعدايدى باقىلاۋعا الۋ ءۇشىن ۇلتتىق گۆارديانى لوس-اندجەلەسكە جىبەرگەنىن مالىمدەپ، بولعان وقيعالار ءۇشىن جەرگىلىكتى دەموكراتيالىق بيلىكتى ايىپتادى.

ا ق ش قورعانىس مينيسترلىگى ترامپتىڭ بۇيرىعىمەن ايماققا ورنالاستىرۋ ءۇشىن 4 مىڭ ۇلتتىق گۆارديا ساربازىن موبيليزاتسيالادى، ال مينيستر حەگسەت «قيىن جاعدايلارعا بايلانىستى» لوس-اندجەلەسكە ءتارتىپتى قامتاماسىز ەتۋ ءۇشىن شامامەن 700 تەڭىز جاياۋ اسكەرىن قوسىمشا جىبەرگەنىن ايتتى.

كاليفورنيا گۋبەرناتورى گەۆين نيۋسوم ترامپتى وكىلەتىن اسىرا پايدالاندى دەپ ايىپتاپ، پرەزيدەنتتىڭ ۇلتتىق گۆارديانى شتات بيلىگىنىڭ قۇزىرى بولعاندىقتان قولدانۋعا ارالاسقانى تۋرالى ايتتى.

بۇدان بۇرىن لوس-انجەلەستەگى نارازىلىقتار سوڭى جاپپاي توناۋعا، ۆانداليزم مەن تۇتقىنداۋعا ۇلاسقانىن جازعانبىز.