نەتانياحۋ: يزرايل گازاعا قاتىستى ديپلوماتياعا دايىن، ءبىراق كۇش قولدانۋعا دا ءازىر

استانا. KAZINFORM - يزرايل گازا سەكتورىنداعى قاقتىعىستى ديپلوماتيالىق جولمەن رەتتەۋگە كەلىسەدى. بۇل تۋرالى پرەمەر-مينيستر بينيامين نەتانياحۋ ا ق ش-قا ساپارى بارىسىندا مالىمدەدى. يزرايل حالقىنا جولداعان بەينەۇندەۋدى ەل پرەمەرى كەڭسەسى جاريالادى، دەپ ت ا س س اگەنتتىگى.

نەتانياحۋ يزرايل انكلاۆتا 60 كۇندىك اتىستى توقتاتۋعا كەلىسەتىنىن، ءبىراق حاماس راديكالدى پالەستينالىق قوزعالىسىن بيلىكتەن الاستاتىپ، سەكتوردى تولىعىمەن قارۋسىزداندىرۋدى تالاپ ەتەتىنىن اتاپ ءوتتى.

- ەگەر ديپلوماتيا ناتيجە بەرمەسە، يزرايل بۇل ماقساتقا اسكەري جولمەن جەتۋگە نيەتتى، - دەدى پرەمەر.

ول 9-شىلدەدە ا ق ش-تا گازاداعى تۇتقىنداردىڭ تۋىستارىمەن كەزدەسۋدە وسى ۇستانىمدى جەتكىزگەنىن ايتتى.

- ءبىز بارلىق (ۇرلانعان) ازاماتتارىمىزدى قايتارۋعا بەل بۋدىق. ءبىز قازىر ءتىرى جانە قازا تاپقان تۇتقىنداردىڭ جارتىسىن قايتارۋعا تىرىسىپ جاتىرمىز، ال بۇل ءۇشىن 60 كۇندىك اتىستى توقتاتۋ ۇسىنىلدى. وسى ۋاقىتشا ءبىتىمنىڭ باسىندا سوعىستى ءبىرجولا توقتاتۋ تۋرالى كەلىسسوزدەر باستالادى. مۇنى ىسكە اسىرۋ ءۇشىن ءبىز ۇسىنعان نەگىزگى شارتتار ورىندالۋى كەرەك: حاماس قارۋ-جاراعىن تاستايدى، گازا قارۋسىزداندىرىلادى، بۇل جەردە حاماس-تىڭ باسقارۋ نە اسكەري الەۋەتى قالماۋى ءتيىس. بۇل - ءبىزدىڭ نەگىزگى تالابىمىز. ەگەر مۇنى كەلىسسوز ارقىلى ىسكە اسىرۋ مۇمكىن بولسا - قۇپتارلىق. ەگەر 60 كۇن ىشىندە بۇل ناتيجەگە قول جەتكىزىلمەسە، وندا ءبىز بۇعان باسقا جولمەن - باتىر ارميامىزدىڭ كۇشىمەن جەتەمىز، - دەدى پرەمەر-مينيستر.

ول مۇنداي ءتاسىلدى جاقىندا ا ق ش تا قولدانعانىن ەسكە سالدى: تەگەراننىڭ يادرولىق باعدارلاماسىنا قاتىستى كەلىسسوزدەرگە 60 كۇن ءبولىنىپ، 13-ماۋسىمدا يزرايل يرانعا قارسى 12 كۇندىك اسكەري وپەراتسيا باستاعان.

- ءبىز يران مەن ونىڭ يادرولىق ءقاۋىپ- قاتەرىنە قاتىستى دا ءدال وسىلاي ايتقان ەدىك. مەنىڭ ويىمشا، ءبىز ءوز شەشىمىمىزدى، كۇشىمىزدى جانە بارلىق ماقساتتارىمىزعا قول جەتكىزۋگە دەگەن تاباندىلىعىمىزدى كورسەتتىك. تاعى دا ايتامىن: ەگەر حاماس-تى قارۋسىزداندىرۋ مەن ونىڭ الەۋەتىن جويۋ كەلىسسوزدەر ارقىلى جۇزەگە اسسا - جاقسى. ءبىراق كەز كەلگەن جاعدايدا بۇل ورىندالادى، - دەدى نەتانياحۋ.

بۇعان دەيىن نەتانياحۋ يزرايل ەگەمەن پالەستينا مەملەكەتىنىڭ قۇرىلۋىنا كەلىسپەيتىنىن مالىمدەگەن بولاتىن.