نەتانياحۋ ترامپپەن تاعى ءبىر كەزدەسۋ وتكىزەتىنىن راستادى

تەل-اۆيۆ. KAZINFORM - يزرايل پرەمەر-ءمينيسترى بينيامين نەتانياحۋدىڭ كانسەليارياسى ونىڭ ا ق ش پرەزيدەنتى دونالد ترامپپەن تاعى ءبىر كەزدەسۋ وتكىزەتىنىن راستادى. قازىرگى ۋاقىتتا يزرايل پرەمەرى ۆاشينگتوندا ساپاردا ءجۇر، دەپ جازادى ت ا س س.

كانسەلياريا تاراتقان مالىمەتكە سايكەس، ەكى كوشباسشىنىڭ كەزدەسۋى جەرگىلىكتى ۋاقىت بويىنشا ساعات 16:30-دا (قازاقستان ۋاقىتىمەن 01:30) اق ۇيدە وتەدى.

بۇعان دەيىن The Times of Israel باسىلىمى يزرايل پرەمەرىنىڭ كەڭسەسىندەگى دەرەككوزدەرگە سىلتەمە جاساپ، نەتانياحۋ مەن ترامپتىڭ قايتا كەزدەسۋ مۇمكىندىگى جايلى حابارلاعان.

نەتانياحۋ 7-شىلدە كۇنى ۆاشينگتونعا كەلگەن. سول كۇنى كەشكە ونىڭ ترامپپەن العاشقى كەزدەسۋى وتكەن. The Times of Israel باسىلىمىنىڭ جازۋىنشا، يزرايل شەنەۋنىكتەرى بۇل كەزدەسۋدى «وتە جىلى ءارى دوستىق اتموسفەرادا ءوتتى» دەپ باعالاعان.

ايتا كەتەيىك، يزرايل پرەمەر-ءمينيسترى نيۋ-يورككە بارۋدى جوسپارلاپ وتىر. ا ق ش-تىڭ دەموكراتيالىق پارتياسىنان قالالىق مەر قىزمەتىنە ۇمىتكەر زوحران مامداني حالىقارالىق قىلمىستىق سوت (ح ق س) شىعارعان وردەرگە سۇيەنە وتىرىپ، بينيامين نەتانياحۋدى قاماۋعا الۋعا ۋادە ەتكەن.

سونداي-اق، يزرايل تولىققاندى ەگەمەندى پالەستينا مەملەكەتىن قۇرۋعا جانە وعان اسىرەسە قاۋىپسىزدىك سالاسىنداعى نەگىزگى وكىلەتتىكتەردى بەرۋگە كەلىسپەيدى. بۇل تۋرالى يزرايل پرەمەر-ءمينيسترى بينيامين نەتانياحۋ دۇيسەنبى كۇنى اق ۇيدە ا ق ش پرەزيدەنتى دونالد ترامپپەن كەزدەسۋىندە جۋرناليستەردىڭ سۇراقتارىنا جاۋاپ بەرگەن ساتتە مالىمدەگەن.

ا ق ش-تا نەتانياحۋدىڭ ساپارىنا قارسى نارازىلىق اكسياسى ءوتتى.

اۆتور

جاراسقان نۇرىبايەۆ