نەتانياحۋ گەنوسيدتە گيتلەردەن اسىپ ءتۇستى - تۇركيا پرەزيدەنتى
استانا. قازاقپارات - يران مەن يزرايل اراسىنداعى اسكەري شيەلەنىس تۇركيانى دا الاڭداتىپ وتىر. رەسمي انكارا قارۋلى قاقتىعىستىڭ كەڭەيۋ قاتەرىنە بايلانىستى شەكاراداعى قاۋىپسىزدىكتى كۇشەيتتى. ەل پرەزيدەنتى مەن قورعانىس ءمينيسترى جاعدايعا قاتىستى مالىمدەمە جاساپ، حالىقارالىق قاۋىمداستىقتى شۇعىل ارەكەت ەتۋگە شاقىردى.
يزرايلدىڭ يران اۋماعىنداعى نىساندارعا جاساعان اۋە سوققىلارى تۇركيانىڭ رەسمي نارازىلىعىن تۋدىردى. انكارا بۇل شابۋىلداردى حالىقارالىق قۇقىققا قايشى دەپ مالىمدەپ، يراننىڭ ءوزىن ءوزى قورعاۋ قۇقىعىن قولدايتىنىن جەتكىزدى. تۇركيا پرەزيدەنتى رەدجەپ تايپ ەردوعان يزرايلدىڭ ارەكەتىن اشىق ايىپتاپ، نەتانياحۋدىڭ ساياساتىن «باسقىنشىلىق» دەپ اتادى.
رەدجەپ تايپ ەردوعان، تۇركيا پرەزيدەنتى:
- نەتانياحۋ گەنوسيدتە گيتلەردەن اسىپ ءتۇستى. ونىڭ قولىنداعى قان تەك يزرايل ۇكىمەتىنىڭ ەمەس، سونىمەن قاتار بۇل قىلمىستارعا كوز جۇما قاراپ وتىرعان ەلدەردىڭ دە موينىندا. تۇركيا بۇل زۇلىمدىقتى توقتاتۋ ءۇشىن بارلىق ديپلوماتيالىق جانە گۋمانيتارلىق جولداردى پايدالانادى.
قازىر تۇركيانىڭ يرانمەن شەكاراسىندا 60 مىڭعا جۋىق اسكەري قىزمەتكەر ورنالاسقان. قاجەت بولعان جاعدايدا ارتتىرىلۋى مۇمكىن. دروندار مەن باقىلاۋ جۇيەلەرى كۇشەيتىلگەن رەجيمدە جۇمىس ىستەپ جاتىر.
ياشار گۇلەر، تۇركيانىڭ ۇلتتىق قورعانىس ءمينيسترى - ارينە قازىرگىدەي جاعدايدا ساق بولۋ كەرەك. وسى تۇرعىدان، تۇركيا ۇلتتىق قورعانىس مينيسترلىگى مەن قارۋلى كۇشتەرى ەلدىڭ قاۋىپسىزدىگى مەن تىنىشتىعى ءۇشىن ءتيىستى ءىس-شارالار جۇرگىزىلىپ جاتىر.
يزرايلدىڭ شابۋىلى مەن يراننىڭ وعان قارىمتا جاۋابى الەمدىك ەكونوميكاعا ۇلكەن اسەر ەتتى. ساراپشىلاردىڭ پىكىرىنشە، شيەلەنىستەن تۇركياعا ەنەرگەتيكا باعاسىنىڭ ءوسۋى، تۋريزمنىڭ تومەندەۋى، ساۋدا مەن قارجى نارىقتارىنداعى قيىندىقتار سەكىلدى ءتۇرلى قاۋىپ-قاتەر بار.
مەحمەت شيمشەك، قارجى جانە مەملەكەتتىك قور قۇرىلىمىنىڭ ءمينيسترى:
- قازىر مۇنايدىڭ الەمدىك باعاسى بىزگە قولايلى دەڭگەيدە تۇر. ەگەر قانداي دا ءبىر ماسەلە تۋىنداسا، قولىمىزداعى بارلىق قۇرالداردى پايدالانىپ، داعدارىستى ەڭسەرۋگە تىرىسامىز.
تۇركيا ەگەر يران ورمۋز بۇعازىن جاباتىن بولسا، ءتيىستى شارالار قابىلداماق. دەگەنمەن، انكارا ايماقتاعى شيەلەنىستى ازايتىپ، بەيبىتشىلىككە قول جەتكىزۋ ءۇشىن ديپلوماتيالىق جولدارعا باسىمدىق بەرەتىنىن ايتىپ وتىر.