نەتانياحۋ ماكروننىڭ يزرايلگە قارۋ-جاراق جەتكىزۋدى توقتاتۋ تۋرالى ۇندەۋىن ايىپتادى
استانا. KAZINFORM - يزرايل پرەمەر-ءمينيسترى بينيامين نەتانياحۋ گازا سەكتورىنداعى شايقاستا قولدانىلاتىن قارۋ-جاراقتى يزرايلگە بەرمەۋگە شاقىرعان فرانسيا پرەزيدەنتى ەممانيۋەل ماكروندى سىنعا الدى.
فرانسيا پرەزيدەنتى ەممانيۋەل ماكرون سەنبى كۇنى يزرايلگە قارۋ-جاراق جەتكىزۋدى توقتاتۋعا، گازاداعى ءبىر جىلعا جۋىق ۋاقىتقا سوزىلعان سوعىستى «ساياسي جولمەن شەشۋگە» شاقىردى.
«مەنىڭ ويىمشا، بۇگىندە گازا سەكتورىنداعى سوعىس قيمىلدارىن جۇرگىزۋ ءۇشىن قارۋ-جاراق جەتكىزۋدى توقتاتۋ ارقىلى ساياسي شەشىمگە ورالۋ باسىمدىق بولماق»، - دەدى ماكرون France Inter تەلەارناسىنا بەرگەن سۇحباتىندا.
ول ءوز سوزىندە فرانسيا يزرايلگە ەشقانداي قارۋ-جاراق جەتكىزبەيتىنىن اتاپ ءوتتى.
يزرايل پرەمەر-ءمينيسترى بينيامين نەتانياحۋ فرانسيا پرەزيدەنتى ماكروندى سىناپ، ونىڭ ۇندەۋىن «ۇيات» دەپ اتادى.
«بۇگىندە يزرايل جەتى مايداندا وركەنيەت جاۋلارىنان قورعانۋدا. يزرايل يران باستاعان ايۋاندىق كۇشتەرمەن كۇرەسىپ جاتقان كەزدە، بارلىق وركەنيەتتى ەلدەر يزرايل جاعىندا بەرىك تۇرۋى كەرەك. الايدا پرەزيدەنت ماكرون جانە باسقا دا باتىس كوشباسشىلارى قازىر يزرايلگە قارۋ ەمبارگوسىن ەنگىزۋگە شاقىرۋدا. ولاردىڭ بۇل ءسوزى ۇيات»، - دەدى نەتانياحۋ.
نەتانياحۋ يزرايلدىڭ «ولاردىڭ قولداۋىمەن نەمەسە قولداۋىنسىز» جەڭىسكە جەتەتىنىنە ۋادە بەردى.
نەتانياحۋدىڭ مالىمدەمەسىنەن كەيىن ەليسەي سارايى ماكروننىڭ «يزرايلدىڭ قاۋىپسىزدىگىن قولدايتىنىن جانە مۇنى كورسەتەتىنىن» باسا ايتتى.
اۆتور
زارينا تۋعانبايەۆا