ۆەنگريا سىرتقى ىستەر ءمينيسترى: قازاقستان – ەۋروپالىق وداقتىڭ ورتالىق ازياداعى تىرەگى

ەۋروپالىق وداق قازاقستانمەن ەنەرگەتيكا سالاسىندا تىعىز ىنتىماقتاستىق بايلانىس ورناتقىسى كەلەدى. بۇل تۋرالى ۆەنگريانىڭ سىرتقى ىستەر جانە سىرتقى ەكونوميكالىق بايلانىستار ءمينيسترى پەتەر سييارتو Jibek Joly تەلەارناسىنا بەرگەن سۇحباتىندا ايتتى، دەپ حابارلايدى Kazinform.

«ءبىز ەۋرووداق پەن قازاقستان اراسىنداعى ىنتىماقتاستىق نىعايا تۇسكەنىن قالايمىز، ويتكەنى ەۋروپالىق وداق سەنىمدى ەنەرگيامەن قامتاماسىز ەتۋ ءۇشىن ءارتاراپتاندىرۋ مۇمكىندىكتەرىن ىزدەيدى. ءبىز ورتالىق ازيانىڭ سەنىمدى سەرىكتەس جانە ءارتاراپتاندىرۋدىڭ ءابسوليۋتتى سەنىمدى كوزى بولا الاتىنىن كورىپ وتىرمىز»، - دەدى سييارتو.

مينيستر ە و قازاقستاندى ايماقتاعى «نەگىزگى تىرەك» سانايتىنىن، سوندىقتان استانامەن ىنتىماقتاستىق وسى ەۋروپالىق ماقساتتى جۇزەگە اسىرۋعا ۇلەس قوسۋى كەرەك ەكەنىن اتاپ ءوتتى. ۆەنگريا مەن قازاقستان اراسىنداعى بايلانىسقا توقتالعان سييارتو ەكونوميكالىق تۇرعىدان 2023 -جىلدى «ەڭ ءونىمدى» جىل دەپ اتادى.

ەستەرىڭىزگە سالا كەتەيىك، 2-قاراشادا پرەمەر-مينيستر ۆيكتور وربان قازاقستانعا رەسمي ساپارمەن كەلدى. قازاقستان پرەزيدەنتى قاسىم-جومارت توقايەۆپەن كەزدەسۋ بارىسىندا تاراپتار ءبىلىم بەرۋ سالاسىنداعى ءوزارا تۇسىنىستىك تۋرالى مەموراندۋمعا قول قويدى. سونداي-اق ساپار بارىسىندا ۆەنگريالىق كومپانيالارمەن ولاردىڭ قازاقستانداعى قىزمەتى تۋرالى كەلىسىمدەرگە قول جەتكىزىلدى.

3-قاراشادا ۆەنگريا پرەمەر-ءمينيسترى تۇركى مەملەكەتتەرى ۇيىمىنىڭ 10- سامميتىنە قاتىستى.