ەنەرگەتيكالىق سۋسىنداردى 21 جاسقا دەيىنگىلەرگە ساتۋعا قاتاڭ تىيىم سالىندى - مينيسترلىك
استانا. قازاقپارات - 2025 -جىلدىڭ قاڭتارىنان باستاپ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە ەنگىزىلگەن تۇزەتۋلەر كۇشىنە ەندى. ەندى ەنەرگەتيكالىق سۋسىنداردى 21 جاسقا تولماعان ازاماتتارعا ساتۋعا قاتاڭ تىيىم سالىنادى.
- بۇل قادام ءوسىپ كەلە جاتقان ۇرپاقتىڭ دەنساۋلىعىن قورعاۋ، سەمىزدىك پەن جۇقپالى ەمەس اۋرۋلاردىڭ الدىن الۋ ماقساتىندا قولعا الىندى، - دەلىنگەن وقۋ-اعارتۋ مينيسترلىگىنىڭ ۇندەۋىندە.
ۆەدومستۆوعا قاراستى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆانىڭ دەرەگىنشە، كۇن سايىن 14-16 جاستاعى جەتكىنشەكتەر ەنەرگەتيكالىق سۋسىنداردى ەمىن- ەركىن ساتىپ الىپ جاتىر.
- كوپ جاعدايدا ساتۋشىلاردىڭ وزدەرى زاڭ تالاپتارىن ساقتامايدى. بارلىق ساۋدا نۇكتەلەرىنىڭ يەلەرىنە زاڭدى قاتاڭ ورىنداۋعا شاقىرامىز: ەنەرگەتيكالىق سۋسىندار دۇكەندە دە، اۆتوماتتاردا دا، ينتەرنەت ارقىلى دا 21 جاسقا دەيىنگىلەرگە ساتىلماۋى ءتيىس. ءاربىر ساۋدا كەزىندە ساتىپ الۋشىنىڭ جاسىن راستايتىن قۇجات تەكسەرىلۋى كەرەك، - دەدى ول.
سونداي-اق ساۋدا ورىندارىندا كەلەسى مازمۇنداعى ەسكەرتۋ جازباسى كوزگە بىردەن تۇسەتىن جەرگە قويىلۋى ءتيىس: «ەنەرگەتيكالىق سۋسىنداردى جيىرما ءبىر جاسقا دەيىنگى تۇلعالارعا ساتۋعا تىيىم سالىنادى».
مينيسترلىك وكىلدەرى اتا-انالاردى بالالارىمەن اشىق سويلەسۋگە، ەنەرگەتيكالىق سۋسىنداردىڭ زيانى تۋرالى تۇسىندىرۋگە جانە سالاۋاتتى ءومىر سالتىنىڭ جارقىن ۇلگىسىن كورسەتۋگە شاقىردى.
«بالالاردىڭ نە ساتىپ الىپ جۇرگەنىنە قىزىعۋشىلىق تانىتىپ، ولاردىڭ دەنساۋلىعىنا بەيجاي قاراماۋ اسا ماڭىزدى»، - دەلىنگەن ۇندەۋدە.
ايتا كەتەيىك، بۇعان دەيىن ەنەرگەتيكالىق سۋسىنداردى ساتۋعا ليتسەنزيا بەرۋ كەرەك پە دەگەن ساۋال تالقىعا تۇسكەن.