نۇرسۇلتان قۇرمان قازاقستان فۋتزال قاۋىمداستىعىنىڭ پرەزيدەنتى بولدى
استانا. KAZINFORM - قازاقستان فۋتزال قاۋىمداستىعىنىڭ پرەزيدەنتى قىزمەتىنە سپورت مەنەدجەرى نۇرسۇلتان قۇرمان تاعايىندالدى.
قازاقستان فۋتبول فەدەراتسياسىنىڭ باسپا ءسوز قىزمەتىنەن ءمالىم ەتكەنىندەي، نۇرسۇلتان قۇرمان 2023-2024-جىلدارى قازاقستان فۋتزال قاۋىمداستىعى پرەزيدەنتىنىڭ ورىنباسارى قىزمەتىن اتقاردى.
بۇل كەزەڭدە ول مەديا ستراتەگيا مەن كوممۋنيكاتسيا باعىتتارىنا جەتەكشىلىك ەتتى. 2025-جىلدىڭ قاڭتارىنان باستاپ قازاقستان فۋتبول فەدەراتسياسى پرەزيدەنتىنىڭ كەڭەسشىسى بولدى. سونىمەن قاتار 2025-جىلدىڭ مامىر ايىندا ق ف ف اتقارۋشى كوميتەتىنىڭ قۇرامىنا ەندى.
نۇرسۇلتان قۇرمان سپورت سالاسىندا كوپجىلدىق تاجىريبەگە يە. ول قازاقستاننىڭ فۋتبول جانە فۋتزال چەمپيوناتتارىن اقپاراتتىق جاعىنان تۇراقتى تۇردە قامتىپ، ءبىرقاتار ارنايى مەديا-جوبانى ازىرلەۋ مەن دامىتۋعا قاتىسقان. سونداي-اق ۇلتتىق دەڭگەيدەگى تۋرنيرلەردى ۇيىمداستىرۋعا جانە بۇقارالىق فۋتبولدى دامىتۋ باستامالارىن جۇزەگە اسىرۋعا بەلسەنە اتسالىسقان.
نۇرسۇلتان قۇرمان جەتەكشىلىك ەتەتىن كەزەڭدە قاۋىمداستىق فۋتزالدىڭ ينستيتۋتسيونالدىق دامۋىن كۇشەيتىپ، تۋرنيرلەردىڭ گەوگرافياسىن كەڭەيتۋدى، وڭىرلىك دەڭگەيدەگى قاتىسۋشىلاردىڭ بەلسەندىلىگىن ارتتىرىپ، جارىستاردى ساپالى مەديا سۇيەمەلدەۋمەن قامتاماسىز ەتۋدى كوزدەپ وتىر.
تالعات قوسمۇحامبەتوۆ قازاقستان فۋتزال قاۋىمداستىعى ۆيتسە-پرەزيدەنتى قىزمەتىنە اۋىسادى.
ەسكە سالا كەتەيىك، بۇدان بۇرىن ەۋروپا ليگاسىندا «اقتوبەنىڭ» سىرت الاڭدا «لەگياعا» ەسە جىبەرگەنىن جازعان بولاتىنبىز.