نۇرجان ناۋشاباي ۇلىنىڭ ولەڭدەرى
نۇرجان ناۋشاباي ۇلىنىڭ «ات ءدۇر ەردىڭ جولداسى»، «زاماننىڭ قالپىنا ايتىلعان سوزدەر»، «لەپ ۇرعان كەيبىر جىگىتكە» سەكىلدى شىعارمالار بەرىلدى.
ات ءدۇر ەردىڭ جولداسى
ات ءدۇر ەردىڭ جولداسى،
ۇل ءدۇر داۋلەتتىڭ باسى.
قىز هام بولسا كوڭىل حوشى
زۇريات كەرەك ءدۇر جىگىتكە.
ات ءدۇر ەردىڭ قورعانى،
مىنسە بىتەر ارمانى.
ەستەن سالماعىل اللانى،
كەشكەنىڭ كەرەك ءدۇر جىگىتكە.
ات ءدۇر ەردىڭ قاناتى،
ءسوزىمنىڭ جوق ءدۇر عالاتى.
مالسىز بولماس هەش قۋاتى،
ساياساءتلى ءمارت جىگىتكە.
ات ءدۇر ەردىڭ ساۋلەتى،
بولسا سەرىك داۋلەتى.
ارتار كوڭىل هامماتى
ءتاڭىرىسى بەرگەن جىگىتكە.
ات ءدۇر ەرگە لايىق،
كورە الماي كۇندەر حالايىق.
جاراتپاي مۇرنىن جيىرار،
بەرەكەلى ىستەردى.
ايتسا-داعى تىنارلىق
ەڭبەگى زايعى جىگىتكە.
زاماننىڭ قالپىنا ايتىلعان سوزدەر
نيەت هام قۇلقى بولەك ءار ادامنىڭ
اي، نۇرجان، مۇنان باسقا جوق تابارىڭ.
ءمۇناجات هار ناقىلدان جازىپ قارا،
قالپىنا لايىق ەتىپ زامانانىڭ.
جاڭبىر جاۋماي، كۇن كۇركىرەپ جەردى الداپ،
قاتىن ۇيدە تىستا جۇرگەن ەردى الداپ.
قالايى، مىس، التىن، كۇمىس زەردى الداپ،
باعاسىزدىڭ باعالى بولعان زامان-اي.
ارزان مەنەن قىمباتتىڭ
باعاسىنىڭ ءبىر بولىپ
قاتار جۇرگەن زامان-اي.
قىران قۇستار قىر اسپاي،
قارعا كىرىپ قاتارعا
قۋدى ىلگەن زامان-اي.
تۇلپار كىرمەي دۇبىرگە،
ماستەك شاۋىپ بايگە الىپ،
وزىپ جۇرگەن زامان-اي.
ءجۇن جىبەككە تەڭەلىپ،
اسىل بارقىت بەرەندەر
توزىپ جۇرگەن زامان-اي.
بىلمەسەدە ويىمەنەن
بىلەم دەسكەن زامان-اي.
وتىرىك كۇلكىگە ۇيرەنىپ،
ءبىرىن ءبىرى كورگەندە
ەلەڭدەسكەن زامان-اي.
بۇلت شالىپ مۇنارتقان
اسقار بيىك تاۋلاردىڭ
توبە بولعان زامان-اي.
اسفاهاني قىلىشتار
قىنابىنان سۋىرىلماي
كونە بولعان زامان-اي.
ناز بەدەۋدەن جال كەتىپ،
ماستەكتەردىڭ سۇبەسى
سەرە بولعان زامان-اي.
اققۋ قالىپ قاتاردان
ايعاي سالىپ تىرنالار
تورە بولعان زامان-اي.
شاڭقان بوزدىڭ وزگەرىپ،
توزاڭ باسىپ جاۋهارىن
قارا بولعان زامان-اي.
مىلتىق تيمەي دىبىسسىز،
داق تۇسپەگەن كوڭىلدى
جارا قىلعان زامان-اي.
تار ورىندا باس بەرگەن
قانداي قىمبات دوستاردىڭ
جادا بولعان زامان-اي.
ەردىڭ اتى شالىقسا،
ءبىر نارسەدەن تارىقسا،
سىرتتان تۇرىپ مىسقىلداپ،
تابا بولعان زامان-اي.
قانات بايلاپ قۋسادا،
جەتكىزبەگەن زامان-اي.
هەش بەندەنىڭ مۇراتىن
بىتكىزبەگەن زامان-اي.
بولدىڭ با دەپ ۋاقىتىن
كۇتكىزبەگەن زامان-اي.
ۇمتىلسا دا كوڭىلى
ويلاعانىن ەش ۋاقىت
ەتكىزبەگەن زامان-اي.
لەپ ۇرعان كەيبىر جىگىتكە
اتقا مىنسەڭ ناز بەدەۋ
قاپالى كوڭىل اشىلار.
كەم بولماسا تۋمىسىڭ
قاتارعا باسىڭ قوسىلار.
ادەپ، اقىل، ءبىلىمدى
ۇيرەنە هەش كىم تۋمايدى،
كورۋمەنەن ىسىلار.
ىلگەرى ءتاڭرى باستىرسا،
ونەرىن كۇن-كۇن اسىرار.
باق قالاعان جىگىتكە
تاڭداپ مىنسەڭ بەدەۋ ات
كوڭىلدىڭ كۇبى شەشىلەر.
بەكزادانىڭ بەلگىسى
اشۋ بولماس بويىندا
جىبەكتەيىن ەسىلەر.
جامانداردىڭ قالىبى
كەمدىك بەرىپ تالاپقا
كوڭىل زاۋقىن ۇشىرار.
سىر ساقتاماس ىشىنە
كورىنگەندى دوس كورىپ
باسىنا ەلدى كوشىرەر،
هاۋي ميسىز جىگىتتەر.
ەرتەڭنەن كەشكە شاپساڭ دا
شابىسىن تۇلپار تاڭبايدى.
ءمارت جىگىتتىڭ بەلگىسى
ءبىر قالىبىن وزگەرتىپ
جەڭىل سوزگە ازبايدى.
نامارتتەردىڭ ءىسى بۇل
بىلمەگەن ءىسىن بىلەم دەپ،
ءوزىنىڭ ءسوزىن دۇرىستاپ،
قىڭىرايىپ بولمايدى.
مىڭگىرە ەتكەن قىزمەتىڭ
تەك قانا جورى بولعان سوڭ
ءبىر تيىنعا تۇرمايدى.
زامان اۋىپ ءمۇبادا
قولىنان ءبىر ءىس كەلسە ەگەر
هەش كىمگە موينىن بۇرمايدى.