نۇرداۋلەت جۇماعاليعا كولىك پەن پاتەر سىيعا بەرىلدى
تاراز. KAZINFORM - جامبىلدىقتار پاراليمپيادانىڭ كۇمىس جۇلدەگەرى، ق ر ەڭبەك سىڭىرگەن سپورت شەبەرى نۇرداۋلەت جۇماعاليدى قوشەمەتپەن قارسى الدى.
الدىمەن پاراسپورتشىنى جاقىندارى مەن جانكۇيەرلەرى اۋليەاتا حالىقارالىق اۋەجايىنان قۇشاق-قۇشاق گۇل شوعىمەن كۇتىپ الىپ، جىلى لەبىزىن ءبىلدىردى.
بۇدان سوڭ «تاراز- ارەنا» سپورت كەشەنىندە سالتاناتتى شارا ۇيىمداستىرىلىپ، وعان جامبىل وبلىسىنىڭ اكىمى ەربول قاراشوكەيەۆ قاتىستى.
ءوڭىر باسشىسى ءجۇزۋ شەبەرىن ايتۋلى جەڭىسىمەن قۇتتىقتاپ، جامبىلدىقتاردىڭ اتىنان العىس ايتتى.
- تورتكۇل دۇنيە كوز تىككەن ءدۇبىرلى دودادا ەل مەرەيىن ەسەلەپ، قازاقستاندىقتاردىڭ سەنىمىن اقتادىڭ. اسىرەسە، جامبىل جۇرتىنىڭ ابىرويىن اسقاقتاتتىڭ. بارشا جەرلەستەرىڭ سەنى ماقتان تۇتادى. الەمنىڭ ەڭ باستى سپورت سايىسىندا كۇشتى ەرىك-جىگەر مەن تاباندىلىق تانىتىپ، ناعىز ەر ازاماتقا ءتان مىنەز كورسەتتىڭ. رەكورد جاڭارتتىڭ. سەن ناعىز باتىرسىڭ! بۇگىندە پاراليمپيادا ويىندارىنىڭ ەكى دۇركىن جۇلدەگەرى اتىنىپ، ايتۋلى جەتىستىككە جەتتىڭ. وليمپيادا چەمپيونى ەلدوس سمەتوۆتىڭ جەڭىستى جولىن لايىقتى جالعاي بەرەسىڭ دەپ سەنەمىز. 2028 -جىلى وتەتىن پاراليمپيادا ويىندارىندا التىننان القا تاعىپ، ءانۇرانىمىزدى اسقاقتاتىپ، كوك تۋىمىزدى كوكتە جەلبىرەتۋىڭە تىلەكتەسپىن! - دەدى وبلىس اكىمى.
نۇرداۋلەت جۇماعاليعا جازعى پاراليمپياداداعى جوعارى كورسەتكىشى ءۇشىن دەمەۋشىلەردىڭ تاراپىنان 2 بولمەلى پاتەر مەن Toyota Camry 75 اۆتوكولىگىنىڭ كىلتى تابىستالدى.
جەكە جاتتىقتىرۋشىسى ساتتار بەيسەمبايەۆقا دا ءىلتيپات كورسەتىلىپ، Haval M6 اۆتوكولىگى بەرىلدى.
- سىزدەردىڭ قولداۋىڭىز بەن جىلى سوزدەرىڭىز جەڭىسكە جەتۋىمە ىقپال ەتتى. جانكۇيەر بولعان بارشاڭىزعا العىسىم شەكسىز! الداعى ۋاقىتتا دا بايراقتى باسەكەلەردە توپ جارىپ، ەل سەنىمىن اقتاي بەرەمىن، - دەدى نۇرداۋلەت جۇماعالي.
ايتا كەتەيىك، جازعى پاراليمپيادا ويىندارىنا 4 جامبىلدىق سپورتشى ەل نامىسىن قورعاپ، تارتىستى ويىن ورنەگىن كورسەتتى. ونىڭ ىشىندە نۇرداۋلەت جۇماعالي مەن زۋلفيا گابيدۋللينا (پاراجۇزۋ)، ءومىرالى نىشان (پاراتاەكۆوندو) جانە سالتانات ءابىلحاسىم قىزى (پارا جەڭىل اتلەتيكا) بار.