گەننادي گولوۆكين مەن ەربول مىرزابوسىنوۆ حالىقارالىق كونكيشىلەر وداعىنىڭ پرەزيدەنتىمەن كەزدەستى
استانا. KAZINFORM - قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين مەن ق ر تۋريزم جانە سپورت ءمينيسترى ەربول مىرزابوسىنوۆ قىتايدىڭ حاربين قالاسىندا ءوتىپ جاتقان 2025 -جىلعى قىسقى ازيا ويىندارىندا حالىقارالىق كونكيشىلەر وداعىنىڭ (ISU) پرەزيدەنتى كيم جە ەلمەن كەزدەسۋ وتكىزدى.
ۇلتتىق وليمپيادالىق كوميتەتتىڭ مالىمەتىنشە، كەزدەسۋ بارىسىندا قازاقستانداعى كونكي سپورت تۇرلەرىنىڭ دامۋى، ISU مەن ىنتىماقتاستىقتى نىعايتۋ جانە ونى كەڭەيتۋ ماسەلەلەرى تالقىلاندى.
ISU پرەزيدەنتى كيم جە ەل قازاقستانداعى كونكيمەن جۇگىرۋ سپورتىنىڭ تانىمالدىلىعىنىڭ قارقىندى ءوسۋىن جوعارى باعالاپ، حالىقارالىق جارىستاردى وتكىزۋ ءۇشىن ەلىمىزدىڭ سپورتتىق ينفراقۇرىلىمىن پايدالانۋعا قىزىعۋشىلىق تانىتتى.
- مانەرلەپ سىرعاناۋ، شورت-ترەك جانە كونكيمەن جۇگىرۋ سپورتى قازاقستاندا قارقىندى دامىپ كەلەدى جانە ءبىزدىڭ سپورتشىلارىمىز جوعارى ناتيجەلەر كورسەتىپ جاتىر. بۇگىنگى كۇنى شورت-ترەكتەن ەستافەتادا جانە كونكيمەن جۇگىرۋدەن 100 مەترلىك قاشىقتىقتا كۇمىس مەدالدار جەڭىپ الىندى، بۇل ولاردىڭ جوعارى كاسىبيلىگىن كورسەتەدى. ءبىز ISU مەن ۇزاق مەرزىمدى ىنتىماقتاستىققا قىزىعۋشىلىق تانىتىپ وتىرمىز، سەبەبى الەم چەمپيوناتتارىن وتكىزۋ ءۇشىن ءبىزدىڭ قابىلەتتەرىمىز بەن مۇمكىندىكتەرىمىز جەتكىلىكتى، - دەدى قازاقستان ۇلتتىق وليمپيادالىق كوميتەتىنىڭ باسشىسى.
كەزدەسۋ بارىسىندا تاراپتار قازاقستاننىڭ ازيادا كونكيمەن جۇگىرۋ سپورتى مەن شورت-ترەكتى دامىتۋداعى ءرولىن، سونداي-اق ISU مەن ىنتىماقتاستىقتى نىعايتۋ ارقىلى قىسقى سپورت تۇرلەرىنىڭ حالىقارالىق ارەنادا ورنىقتى بولۋىن تالقىلادى. قازاقستاندىق دەلەگاتسيا ISU باسشىلىعىن ەلىمىزگە رەسمي ساپارمەن كەلۋگە شاقىردى.
ايتا كەتەيىك، قازاقستان سپورتشىلارىنىڭ ازيا ويىندارىندا 10-اقپانداعى جارىس كەستەسى جاريالاندى.
اۆتور
ەلميرا ورالبايەۆا