گەننادي گولوۆكين ح و ك Olympism365 كوميسسياسىنىڭ وكىلدەرىمەن كەزدەستى
پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارى اياسىندا قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين حالىقارالىق وليمپيادا كوميتەتى Olympism365 كوميسسياسىنىڭ ءتوراعاسى اۋۆيتا راپيللا جانە Olympism365 بويىنشا ح و ك ديرەكتورى وللي دادفيلدپەن كەزدەستى.
اتالعان كەزدەسۋ پاريجدەگى (فرانسيا) 2024 -جىلعى وليمپيادا ويىندارى اياسىندا ءوتتى. سونداي- اق، جيىنعا قازاقستان ۇ و ك باس حاتشىسى جانار ۋتەشيەۆا، ح و ك كوميسسياسىنىڭ مۇشەسى، زيمبابۆە ۇ و ك پرەزيدەنتى تاباني گونە جانە حوك وكىلدەرى ايا مەداني مەن شاميل تارپيشيەۆ قاتىستى.
كەزدەسۋدەگى باستى تاقىرىپ Olympism365 كوميسسياسىنىڭ تىكەلەي قىزمەتى جونىندە ءوربىدى. اۋۆيتا راپيللا كوميسسيانىڭ ەڭ باستى مىندەتى - تۇراقتى دامۋ ماقساتتارىنا قول جەتكىزۋدەگى ماڭىزدى فاكتور رەتىندە سپورتتىڭ ءرولىن كۇشەيتۋگە باعىتتالعانىن كەڭىنەن اڭگىمەلەدى.
سونىمەن قاتار، اۋۆيتا راپيللا گەننادي گولوۆكيندى Olympism365 كوميسسياسىنىڭ مۇشەسى رەتىندە تاعايىندالۋىمەن قۇتتىقتاپ، وعان قازاقستان ۇ و ك پرەزيدەنتى قىزمەتىندە ساتتىلىك تىلەدى.
گەننادي گولوۆكين ءوز كەزەگىندە ح و ك پرەزيدەنتى توماس باح پەن Olympism365 كوميسسياسىنىڭ ءتوراعاسى اۋۆيتا راپيللاعا سەنىم ارتىپ، قولداۋ كورسەتكەنى ءۇشىن العىسىن جەتكىزدى.
ايتا كەتەلىك، اتالعان كوميسسيا قۇرامىنداعى گەننادي گولوۆكيننىڭ العاشقى رەسمي وتىرىسى بيىلعى جىلدىڭ قاراشاسىندا لوزاننادا (شۆەيتساريا) وتەدى.
اۆتور
كۇنسۇلتان وتارباي