گەننادي گولوۆكين 2024 -جىلعى وليمپيادا ويىندارى اياسىندا ءبىرقاتار ماڭىزدى كەزدەسۋ وتكىزدى
استانا. KAZINFORM - قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين پاريج-2024 وليمپيادا اياسىندا ماڭىزدى كەزدەسۋلەر وتكىزدى، - دەپ حابارلايدى Olympic.kz.
قازاقستان ۇ و ك باسشىسى اتالعان قىزمەتكە سايلانعان بويدا حالىقارالىق باعىتتاعى جۇمىستى جەتىلدىرۋگە باسىمدىق بەرىلەتىنىن ايتقان بولاتىن. پاريجدەگى جازعى ويىندار بارىسىندا دا ول بۇل باعىتتاعى جۇمىسىن جالعاستىرۋدا. كەزدەسۋلەر اياسىندا ەلىمىزدەگى وليمپيادالىق سپورت تۇرلەرىن دامىتۋ، وليمپيادالىق قوزعالىستىڭ تۇتاستىعى جانە قازاقستاندا ءىرى سپورتتىق ءىس-شارالاردى وتكىزۋ مۇمكىندىگى جايلى ماسەلەلەر ءسوز بولدى.
اتاپ ايتار بولساق، گولوۆكين بىرىككەن كۇرەس الەمىنىڭ (United World Wrestling) پرەزيدەنتى، ح و ك مۇشەسى ءارى ح و ك اتقارۋشى كوميتەتىنىڭ ۆيتسە-پرەزيدەنتى نەناد لالوۆيچپەن كەزدەستى.
فۋنكتسيونەرلەر پاريجدەگى وليمپيادا ويىندارى مەن قازاقستانداعى كۇرەستى دامىتۋ جولدارىن تالقىلادى. گولوۆكين مەن لالوۆيچ قازاقستاندىق بالۋانداردى حالىقارالىق ارەنادا قولداۋ ستراتەگياسىن ەگجەي- تەگجەيلى ساراپتاپ، قازاقستاندا ءىرى كۇرەس تۋرنيرلەرىن ۇيىمداستىرۋ ماسەلەسىنە توقتالدى.
حالىقارالىق ساداق اتۋ فەدەراتسياسىنىڭ پرەزيدەنتى، ح و ك مۇشەسى ءارى تۇركيا ۇ و ك پرەزيدەنتى ۋگۋر ەردەنەرمەن وتكەن كەزدەسۋدە ەلىمىزدەگى ساداق اتۋ سپورتىن دامىتۋ جانە ەكى ەل ۇ و ك- تەرىنىڭ اراسىنداعى ەكىجاقتى ارىپتەستىكتى نىعايتۋ جولدارى تالقىلاندى.
ح و ك ۆيتسە-پرەزيدەنتى ءارى ح و ك اتقارۋشى كوميتەتىنىڭ مۇشەسى حۋان انتونيو سامارانچ جانە ح و ك سپورتتىق ديرەكتورى كيت ماككونەلمەن وتكەن جۇزدەسۋلەر بارىسىندا قازاقستاننىڭ وليمپيادالىق سپورت تۇرلەرىن دامىتۋعا، وليمپيادالىق قوزعالىستىڭ تۇتاستىعىن ساقتاۋعا ۇلەس قوسۋى، سونداي-اق، حالىقارالىق سپورتتىق ۇيىمدارمەن ارىپتەستىكتى ءارى قاراي كۇشەيتۋ ماسەلەلەرى ءسوز بولدى.
ح و ك ۆيتسە-پرەزيدەنتى ءارى ح و ك قارجىلىق كوميسسياسىنىڭ جەتەكشىسى سەر ميانگ مىرزامەن وتكەن كەزدەسۋ كەزىندە حالىقارالىق سپورتتىق سەرىكتەستىكتى نىعايتۋ، سپورتتى قولداۋعا ارنالعان قارجى قۇرالدارىن دامىتۋ جانە سپورتشىلاردىڭ مۇمكىندىگىن كەڭەيتۋ ماسەلەلەرى اڭگىمە ارقاۋىنا اينالدى. ودان بولەك، ح و ك باستاماسىمەن كيبەرسپورتتى دامىتۋ باعىتتارى تالقىلاندى.
سونىمەن قاتار، كەزدەسۋ بارىسىندا 2024 -جىلدىڭ 8-قىركۇيەگىندە دەليدە (ءۇندىستان) وتەتىن ا و ك باس اسسامبلەياسىنىڭ سايلاۋى جايلى دا ءسوز قوزعالدى. ازيا وليمپيادا كەڭەسىنىڭ قازىرگى پرەزيدەنتى راندجير سينگح جانە ا و ك باس ديرەكتورى ءارى حالىقارالىق سۋ سپورتى تۇرلەرى فەدەراتسياسىنىڭ پرەزيدەنتى حۋسسەين ءال-مۋسسالاممەن وتكەن باسقوسۋلاردا دا وسى ماسەلەلەر اڭگىمەگە وزەگىنە اينالدى.
Olympism365 كوميسسياسىنىڭ ءتوراعاسى ءارى ح و ك مۇشەسى اۋۆيتا راپيللامەن وتكەن جۇزدەسۋدە گولوۆكين ح و ك قىزمەتىن، توماس باحتىڭ گەننادي گولوۆكيندى Olympism365 كوميسسياسىنىڭ مۇشەسى ەتىپ تاعايىنداۋىن، كوميسسيا قىزمەتى مەن ونىڭ جەتىستىكتەرىن جانە ماقساتتارىن تالقىلادى.
سونداي-اق، 2024 -جىلدىڭ قاراشاسىندا وتەتىن Olympism365 كوميسسياسىنىڭ وتىرىسىنا گولوۆكيننىڭ العاش رەت قاتىسۋى دا كۇن تارتىبىنە ەنگىزىلدى. اتالعان كەزدەسۋگە Olympism365 باعىتى بويىنشا ح و ك دەپارتامەنتىنىڭ ديرەكتورى وللي دادفيلد پەن كوميسسيانىڭ قازىرگى مۇشەلەرى دە قاتىستى.
ايتا كەتەلىك، گولوۆكيننىڭ پاريجدەگى Olympism365 كوميسسياسىنا قاتىسۋى اياسىندا تاعى ءبىرقاتار كەزدەسۋلەر ءوتتى.
پاريج وليمپياداسىندا گەننادي گولوۆكين ازيا ايماعىنداعى سپورتتى دامىتۋ ماسەلەلەرىن تالقىلادى. اتالعان تاقىرىپ ساۋد ارابيا ۇ و ك باسشىسى، حانزادا ابدۋل-ازيز يبن ابداللا ءال ساۋدپەن كەزدەسۋ بارىسىندا كوتەرىلدى. تاراپتار پاريجدەگى وليمپيادا ويىندارى جايلى ءسوز قوزعاپ، كيبەرسپورتتى دامىتۋ مۇمكىندىكتەرىن، بىرلەسكەن سپورتتىق جارىستاردى ۇيىمداستىرۋ جانە قازاقستان مەن ازيا ايماعى ەلدەرىنىڭ سپورتتاعى ارا- قاتىناسىن نىعايتۋ ماسەلەلەرىن كوتەردى.
«بۇگىنگە دەيىن گەننادي گەنناديەۆيچ باسقا مەملەكەتتەردىڭ ۇ و ك باسشىلارى، حالىقارالىق فەدەراتسيا باسشىلارى مەن ح و ك مۇشەلەرىن قوسا ەسەپتەگەندە، 25-تەن اسا كەزدەسۋ وتكىزىپ ۇلگەردى. ۇ و ك جاڭا باسشىلىعى ۇيىمنىڭ الدىنداعى باستى مىندەت - حالىقارالىق باعىتتاعى ارىپتەستىكتى نىعايتۋ ەكەنىن ءاۋ باستان ايتقان بولاتىن. وليمپيادا ويىندارى اياسىندا ءبىز وسىعان ىقپال ەتكەن كەزدەسۋلەردى وتكىزە الدىق. ءبىزدىڭ وليمپيادا ويىندارىندا ەكەنىمىزدى جانە جارىس كەستەسىنىڭ تىعىزدىعىن ەسكەرسەك، ۇ و ك پرەزيدەنتىنىڭ جۇمىس كەستەسىندە اۋەل باستان ءۇزىلىس بولعان جوق. رەسمي كەزدەسۋلەر وليمپيادانىڭ سوڭعى جارىس كۇنىنە دەيىن جالعاسا بەرمەك»، - دەيدى حالىقارالىق باعىتتار بويىنشا دەپارتامەنت باسشىسى انار سىزدىقوۆا.
اتالعان كەزدەسۋلەر حالىقارالىق باعىتتاعى ارىپتەستىك پەن سپورتتىق بايلانىستى نىعايتۋدىڭ، سونداي- اق، قازاقستاندىق سپورتتى ەلىمىزدە جانە جاقىن بولاشاقتا الەمدىك ارەنادا دامىتۋ ءۇشىن حالىقارالىق سپورتتىق قاۋىمداستىقتاردىڭ بەلسەندى وكىلدەرىمەن ديالوگ جۇرگىزۋدىڭ ماڭىزدىلىعىن ايقىندايدى.
اۆتور
ايدار وسپاناليەۆ