نەلىكتەن قوعامدىق ورىنداردا بەت-الپەتتى جاسىرۋعا بولمايدى

استانا. KAZINFORM - پوليتسيا ءتۇسىندىرۋ جۇمىستارىن جۇرگىزىپ جاتىر، - دەپ جازدى Polisia.kz.

پوليتسەيلەر ازاماتتاردى قوعامدىق ورىنداردا ادامنىڭ ءتۇر-سيپاتىن تانۋعا كەدەرگى كەلتىرەتىن كيىمدەردى كيۋگە تىيىم سالۋدى كوزدەيتىن زاڭناماداعى وزگەرىستەر تۋرالى اقپاراتتاندىرۋ جۇمىستارىن باستادى.

زاڭداعى جاڭا نورما 12-شىلدەدەن باستاپ كۇشىنە ەندى.

- زاڭناماعا ەنگىزىلگەن وزگەرىستەردىڭ باستى ماقساتى - ازاماتتاردىڭ قۇقىقتارى مەن بوستاندىقتارىن، سونىڭ ىشىندە ءدىني سەنىم بوستاندىعىن شەكتەمەي، قوعامدىق قاۋىپسىزدىكتى قامتاماسىز ەتۋ، ادامداردىڭ تۇلعاسىن انىقتاۋ جانە قوعامدىق ءتارتىپتى ساقتاۋ، - دەپ تۇسىندىرەدى ءتارتىپ ساقشىلارى.

ۋچاسكەلىك ينسپەكتورلاردىڭ ايتۋىنشا، تىيىم ادامنىڭ بەت-ءجۇزىن تولىقتاي جاۋىپ، تۇلعاسىن انىقتاۋعا كەدەرگى كەلتىرەتىن كيىم تۇرلەرىنە قاتىستى. مىسالى بەتپەردە، نيكاب سياقتى كيىمدەر.

ال بەت-ءجۇزدى جاپپايتىن حيدجاب، شەيلا، حيمار، ال-اميرا سەكىلدى كيىمدەرگە بۇل نورمانىڭ قاتىسى جوق. بۇل تىيىم اۋا رايىنىڭ جاعدايىنا، مەديتسينالىق كورسەتكىشتەرگە بايلانىستى قولدانىلاتىن كيىمدەرگە قاتىستى ەمەس. سونداي-اق بۇل نورما قازاقستان رەسپۋبليكاسىنىڭ زاڭ تالاپتارىن ورىنداۋ، قىزمەتتىك (لاۋازىمدىق، ەڭبەك) مىندەتتەردى ورىنداۋ، ازاماتتىق قورعاۋ، سونداي-اق سپورتتىق، سپورتتىق- بۇقارالىق جانە مادەني- بۇقارالىق ءىس- شارالارعا قاتىساتىن ادامدارعا قولدانىلمايدى.

سونداي-اق ۋچاسكەلىك پوليتسيا ينسپەكتورلارى ءتۇسىندىرۋ جۇمىسى اياسىندا ازاماتتارعا وزگە قۇقىق بۇزۋشىلىقتار مەن قىلمىستاردىڭ الدىن الۋ شارالارى تۋرالى ايتتى. اتاپ ايتقاندا، پوليتسەيلەر ينتەرنەت- الاياقتاردىڭ الداۋ تاسىلدەرى جونىندە اقپارات بەرىپ، مۇنداي ايلاعا كوبىنە ادامداردىڭ قالاي تاپ بولاتىنىن ءتۇسىندىردى.