نەلىكتەن جاس ۇلعايا كەلە ءبىزدىڭ داۋسىمىز وزگەرەدى جانە ونى توقتاتۋعا بولا ما؟

استانا. KAZINFORM - ۋاقىت وتە ادامنىڭ داۋىسى شىنىمەن دە وزگەرەدى. ءبىراق بىرەۋلەردىكى قاتتى، باسقالاردىكى از عانا وزگەرىسكە ۇشىرايدى. بۇل پروتسەستى قالاي توقتاتۋعا بولادى؟ داۋىس بۇزىلىسىمەن اينالىساتىن دارىگەر - فونياتر ولەگ ەليسەيەۆ «Doctorpiter»- گە داۋسىڭىز قۇلاققا جاعىمدى بولىپ قالۋ ءۇشىن نە ىستەۋ كەرەگىن ايتتى، - دەپ حابارلايدى Massaget.kz.

«ناۋقاستار جاس ۇلعايا كەلە نەلىكتەن داۋىس وزگەرەدى دەپ ءجيى سۇرايدى. پرەسبيفونيا دەگەن دياگنوز بار. بۇل داۋىس قىزمەتىنىڭ جاس ەرەكشەلىگىنە قاراي تومەندەۋى، - دەيدى دارىگەر. - داۋىس جەلبەزەكتەرى بۇلشىقەت بولعاندىقتان، داۋىس قىزمەتتەرى وزگەرەدى. بۇشىقەت تونۋسى ۋاقىت وتە بۇكىل اعزادا، سونىڭ ىشىندە كومەكەيدە دە تومەندەيدى».

الايدا بۇل پروتسەستى باياۋلاتۋعا بولادى. ولەگ ەليسەيەۆ داۋىس جاستىعىن ۇزارتۋعا بولاتىن ءتورت كەڭەس بەردى:

1. ۇيقىنى قاندىرىڭىز جانە كۇيگەلەكتەنبەڭىز

داۋىس قاتپارلارىنىڭ تونۋسى ۇيقى جەتىسپەۋشىلىگىنەن جانە ۇنەمى كۇيزەلىستە بولۋدان تومەندەيدى.

«داۋىس جەلبەزەكتەرىن تونۋستا ساقتاۋ ءۇشىن ءبىز ناۋقاستارعا ۇيقىنى قاندىرۋعا، دۇرىس كۇن ءتارتىبىن جانە ۇيقى رەجيمىن ساقتاۋعا كەڭەس بەرەمىز»، - دەيدى دارىگەر.

2. دەنساۋلىعىڭىزعا كۇتىم جاساڭىز

اعزادا بارلىعى ءبىر- بىرىمەن بايلانىستى. جۇتقىنشاقتاعى جانە مۇرىن قۋىسىنداعى قابىنۋ وزگەرىستەرى، اۋىز قۋىسى جانە كومەكەي اۋرۋلارى، وكپە اۋرۋلارى، جۇيكە جۇيەسى پاتولوگيالارى، ەندوكريندى بۇزىلىستار جانە اسقازان-ىشەك جولى پروبلەمالارى - مۇنىڭ بارلىعى ءبىزدىڭ داۋسىمىزعا زيان كەلتىرە الادى.

ەسكەرتۋ: داۋسىڭىزدىڭ وزگەرۋى ەكى اپتادان اسا ۋاقىتقا سوزىلسا، مىندەتتى تۇردە وتورينولارينگولوگقا قارالۋ كەرەك.

3. سويلەڭىز

ادامدار جاس ۇلعايا كەلە وتە از سويلەيدى. زەينەتكە شىققان ادام ارىپتەستەرىمەن سويلەسپەيدى، بالالار ءوسىپ كەتتى، دوستارمەن سيرەك كەزدەسەدى. الايدا جاس ۇلعايا كەلە ۇندەمەي جۇرۋگە بولمايدى. بۇلشىقەتتەر جۇمىس ىستەۋى كەرەك.

"ەگەر سويلەسەتىن ەشكىم بولماسا، ءبىز داۋىستاپ ولەڭدەر وقۋعا كەڭەس بەرەمىز"، - دەيدى دارىگەر.

4. سىبىرلاپ سويلەمەڭىز

داۋسىڭىز ادەمى بولىپ قالۋ ءۇشىن ساقتاۋ كەرەك تاعى ءبىر ەرەجە - سىبىرلاپ سويلەمەۋ.

«ادەتتە ادامدار تاماعى اۋىرعاندا سىبىرلاپ سويلەيدى. ادام تاماققا ارتىق كۇش تۇسىرمەۋ كەرەك دەپ ويلايدى. الايدا بۇل زيان»، - دەپ ەسكەرتتى ول.

ەگەر ناۋقاس لارينگيت كەزىندە ۇزاق ۋاقىت بويى سىبىرلاپ سويلەسە، بۇل دۇرىس ەمەس مەحانيزم ساۋىققاننان كەيىن دە ساقتالۋى مۇمكىن. سوندىقتان تاماعىڭىز قىرىلداپ تۇرسا دا، سىبىرلاپ سويلەۋدىڭ قاجەتى جوق. تاماعىڭىز اۋىرعاندا سىبىرلاعاننان گورى كوپ سويلەمەۋگە تىرىسىڭىز.