نەكەگە ماجبۇرلەگەندەر 10 جىلعا دەيىن سوتتالۋى مۇمكىن

استانا. KAZINFORM - ق ر ادىلەت ۆيتسە-ءمينيسترى لاۋرا مەرساليموۆا ماجبۇرلەپ نەكەگە وتىرعىزعاندار 10 جىلعا دەيىن سوتتالۋى مۇمكىن ەكەنىن ايتتى.

ءماجبۇرلى نەكەگە يتەرمەلەۋ قىلمىستىق جاۋاپكەرشىلىككە اكەپ سوعادى. بۇل تۋرالى سەنات كۋلۋارىندا ادىلەت ۆيتسە-ءمينيسترى لاۋرا مەرساليموۆا ءمالىم ەتتى،

- بۇل نورما مەملەكەت باسشىسى ۇلتتىق قۇرىلتايدا جۇكتەگەن ماڭىزدى تاپسىرماسىنىڭ اياسىندا قامتىلدى. وكىنىشكە قاراي، قوعامدا مۇنداي كەلەڭسىز جاعدايلار كەزدەسىپ وتىر. قىزدى الىپ قاشۋ - تەك ءداستۇرلى تۇسىنىك ەمەس، بۇل ءبىز ويلاعاننان الدەقايدا كۇردەلى قۇقىقتىق ماسەلە بولىپ شىقتى، - دەدى ل. مەرساليموۆا سەناتتا تىلشىلەر سۇراعىنا جاۋاپ بەرە وتىرىپ.

وسى ورايدا ول قىلمىستىق كودەكستەگى 125-باپ - «ادام ۇرلاۋ» بويىنشا بۇعان دەيىن ءتيىستى جازا قاراستىرىلعانىن ەسكە سالدى. ءبىراق ول باپتا ادام ءوز ەركىمەن بوساتسا، كىنالى تاراپ جازاعا تارتىلمايتىن جاعداي بار.

- سوندىقتان ءبىز حالىقارالىق تاجىريبەنى تالداپ، قىلمىستىق كودەكسكە ارنايى «نەكەگە ماجبۇرلەۋ» دەگەن قىلمىستىق جاۋاپتىلىقتى قامتيتىن ارنايى باپتى ۇسىندىق. ەگەر ادامدى نەكەگە كۇشتەپ تارتسا، بولماسا ار- نامىسىنا تيەتىن اقپاراتتى جاريالايمىن دەپ قورقىتسا، بۇل ارەكەت ەندى قىلمىس سانالادى، - دەد ۆيتسە- مينيستر.

بۇل تۇرعىدا جازا رەتىندە 2 جىلدان 10 جىلعا دەيىنگى مەرزىم قاراستىرىلعان.

بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستاننىڭ قىلمىستىق زاڭناماسىن وڭتايلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالىپ، ماقۇلداندى.

زاڭ اياسىندا نەكەگە تۇرۋعا ماجبۇرلەۋ مەن «دروپپەرلىك» ءۇشىن قىلمىستىق جاۋاپتىلىق ەنگىزىلدى.