ەندىگى ءۇمىت تەك نۇربەك ورالبايدا - مىرزاعالي ايتجانوۆ

پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا نۇربەك ورالبايدىڭ جەڭىسىنەن كەيىن باس باپكەر مىرزاعالي ايتجانوۆتان شاعىن سۇحبات العان ەدىك.

- مىرزاعالي قۇلان ۇلى، بۇگىن نۇربەك ورالباي فينالعا شىقتى. بارشا قازاق ەلى قۋانىپ جاتىر. شاكىرتىڭىزدىڭ جارتىلاي فينالداعى ايقاسى تۋرالى ايتىپ بەرسەڭىز؟

- ءبارى دە مۇمكىن. بۇل وليمپيادا ويىندارى. وڭاي قارسىلاس جوق. وسىندا الەمدەگى ەڭ مىقتى بوكسشىلار ىرىكتەلىپ كەلدى. ءاربىر كەزدەسۋ وڭايعا سوقپايدى. وسىعان دەيىن دومينيكاندىق قارسىلاسىمىزدىڭ جەكپە-جەكتەرىن كوردىك. مىقتى دەگەن بوكسشىلاردىڭ بارلىعىن قوعاداي جاپىرىپ، جارتىلاي فينالعا شىقتى. ول قانداسىمىز توقتاربەكتى دە جەڭدى. ءبىراق، نۇربەك جارتىلاي فينالدا ونىڭ جولىن بوگەدى.

- نۇربەك قانداي تاكتيكانىڭ ارقاسىندا جەڭىسكە جەتتى؟

- ءبىز ونىڭ قارسىلاسىن جاقسىلاپ زەرتتەدىك. ناتيجەسىندە نۇربەككە تاپسىرما بەردىك. قارسىلاسىنا شابۋىلداماي، كەرەك كەزدە سوققى جۇمساپ وتىرۋ كەرەك ەكەنىن ايتتىق. تاپسىرمانى تولىق ورىنداپ شىقتى.

- بوكستان ەرلەر اراسىندا بارلىق ءۇمىت نۇربەك تە قالدى. ەندى فينالعا قانشالىقتى دايىنسىزدار؟

- ءبىز ءار جەكپە-جەككە ۇلكەن دايىندىقپەن شىعامىز. بۇعان دەيىن دە، بارلىق بوكسشىلارىمىز بارىن سالىپ جۇدىرىقتاسقانىن بىلەسىزدەر. الايدا، كەيبىر بوكسشىلارىمىز تۇسىنىكسىز جاعدايدا ۇتىلىپ قالدى. كىمنىڭ قالاي جۇدىرىقتاسىپ، قالاي جەڭىلگەنىن بۇكىل الەم كورىپ وتىر. ءبىزدىڭ مىندەت ءار بوكسشىنى دايىنداپ، رينگكە شىعارۋ. ال باعانى بەرەتىن، جەڭىمپازدىڭ قولىن كوتەرەتىن تورەشى. سوندىقتان، ءبىز باسقا جۇمىسقا ارالاسپايمىز. ءوز مىندەتىمىزدى وتەپ جاتىرمىز. فينالعا دا جاقسىلاپ دايىندالامىز. نۇربەك فينالداعى قارسىلاسىن ءوزى دە جاقسى بىلەدى. ەندى ونىمەن قالاي جۇدىرىقتاسۋدا، قانداي ايلا-ءتاسىل قولدانۋدى پىسىقتايتىن بولامىز.

- ال نۇربەك قازاق بوكسشىلارىنان ەرلەر اراسىندا ءوزى عانا قالعانىن قالاي سەزىنىپ، قالاي قابىلداپ جاتىر؟

- نۇربەك بارلىق ءۇمىت وزىندە عانا قالعانىن جاقسى بىلەدى. ەندى، ول ءبىراز جىگىتتەردىڭ كەتكەن ەسەسىن قايتارادى دەپ ويلايمىن. قازاق بوكسشىلارىنىڭ نامىسى تەك نۇربەك ورالبايدا قالدى. باسقا ەشكىم قالمادى. بۇل نۇربەككە ەڭ ۇلكەن سىن. ەندى ول شەشۋشى سىندا جان بارىن سالۋى كەرەك. ول سوڭعى مۇمكىندىكتى ۋىسىنان شىعارۋعا قاقىسى جوق. ەندىگى ءۇمىت تەك نۇربەكتە.

- اڭگىمەڭىزگە راحمەت!

اۆتور

كۇنسۇلتان وتارباي