ەندى يەسى بار ءيت قاپسا قىلمىستىق جازا قولدانىلۋى مۇمكىن – ءى ءى م

استانا. KAZINFORM - ەلىمىزدە ءۇي جانۋارلارىن سەرۋەندەتۋ ءتارتىبىن بۇزعان 6 مىڭنان استام ادام جاۋاپقا تارتىلدى. ءۇي جانۋارلارىن سەرۋەندەتۋ ماسەلەسىنە قاتىستى تولىعىراق ءى ءى م اكىمشىلىك پوليتسيا كوميتەتىنىڭ قارۋ اينالىمىن باقىلاۋ جانە تابيعاتتى قورعاۋ پوليتسياسى باسقارماسىنىڭ ەرەكشە تاپسىرمالار جونىندەگى اعا ينسپەكتورى الىشەر جارماعامبەتوۆ ايتىپ بەردى.

بۇگىن ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتى «جانۋارلارعا جاۋاپكەرشىلىكپەن قاراۋ تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ ماسەلەلەرىنە ارنالعان دوڭگەلەك ۇستەل ءوتتى.

«ءبىزدىڭ باستى ماقسات - ادام قاۋىپسىزدىگىن قامتۋ. بۇرالقى يتتەر ماسەلەسىنە كەلسەك، وعان جاۋاپتى قۇزىرلى جانە جەرگىلىكتى اتقارۋشى ورگاندار بار، دەگەنمەن زاڭ اياسىندا ىشكى ىستەر ورگاندارى بىرلەسىپ جۇمىس ىستەيمىز. ونىڭ ىشىندە ءۇي جانۋارلارىنا جاۋاپكەرشىلىكپەن قاراۋ جانە ولاردى سەرۋەندەتۋ ءتارتىبى باعىتىندا. ءۇي جانۋارلارىن سەرۋەندەتۋ ءتارتىبىن بۇزعان 6 مىڭنان استام ادام جاۋاپقا تارتىلدى. وسى ورايدا قۇزىرلى ورگانداردىڭ نازارىنا ەگەر يەسى سەرۋەندەۋ ءتارتىبىن قايتا بۇزعان جاعدايدا ءۇي جانۋارىن مۇلىك سەكىلدى الىپ قويۋ ماسەلەسىن ۇسىنعىمىز كەلەدى. مىسالى، يەسى قوعامدىق ورىندا ءۇي جانۋارىن تۇمىلدىرىقسىز سەرۋەندەتىپ جۇرەدى، بۇل قوعامدىق ورىندا ادامدارعا قاۋىپ ءتوندىرۋى مۇمكىن»، - دەدى الىشەر جارماعامبەتوۆ دوڭگەلەك ۇستەل بارىسىندا.

وسىلايشا ءى ءى م وكىلى ءۇي جانۋارىن سەرۋەندەتۋ ءتارتىبىن قايتا-قايتا بۇزاتىن ازاماتتاردان ونى تاركىلەۋدى ۇسىنىپ وتىر. ودان ءارى جانۋاردىڭ تاعدىرىن قۇزىرلى ورگان شەشۋى ءتيىس.

«جانۋارلارعا جاۋاپكەرشىلىكپەن قاراۋ ماسەلەسىنە قاتىستى، بىزگە قىلمىستىق جاۋاپكەرشىلىك قاراستىرۋ جاعى ۇسىنىلدى. اتاپ ايتقاندا، يەسى بار ءيت بىرەۋدى قاۋىپ، دەنەسىنە زالال كەلتىرگەن جاعدايدا يەسىن قىلمىستىق جاۋاپقا تارتۋ تۋرالى. ءبىز الدىمەن ادام ءومىرىنىڭ قاۋىپسىزدىگىن قامتاماسىز ەتۋىمىز ءتيىس»، - دەيدى ول.

ايتا كەتسەك، بىلتىر ەل اۋماعىندا 247 مىڭ قاڭعىباس ءيت اۋلاندى جانە ولاردى زارارسىزداندىرۋعا، ۆاكسينالاۋعا جانە تىركەۋگە شامامەن 20 ميلليارد تەڭگە قاجەت.