ەندى قازاقستاندىقتار رەسەيگە جاڭا ەرەجە بويىنشا ساپارلايدى

استانا. KAZINFORM - بيىل 30-ماۋسىمنان باستاپ رەسەيگە بارۋدى جوسپارلاعان قازاقستان ازاماتتارى شەكارادان وتەم دەگەنشە 72 ساعاتتىڭ ىشىندە كىرۋ تۋرالى حابارلاپ، سيفرلىق پروفيلدى تولتىرۋى ءتيىس.

بۇل شارا زاڭسىز كوشى-قونمەن كۇرەسكە باعىتتالعان پيلوتتىق جوبا اياسىندا ەنگىزىلىپ جاتىر. پروفيلدى RuID قوسىمشاسى ارقىلى تولتىرۋعا بولادى، ول جەردە سونداي-اق مەديتسينالىق ساقتاندىرۋدى راسىمدەۋ مۇمكىندىگى قاراستىرىلعان.

اتالعان وزگەرىستەردىڭ 6 جاسقا دەيىنگى بالالارعا، سونداي-اق رەسەيدە اككرەديتاتسيالانعان ديپلوماتيالىق وكىلدىكتەر مەن حالىقارالىق ۇيىمداردىڭ قىزمەتكەرلەرىنە جانە ولاردىڭ وتباسىلارىنا قاتىسى جوق.

مىسالى، ەگەر تۋىسىنىڭ قايتىس بولۋىنا نەمەسە دەنساۋلىعىنا بايلانىستى شۇعىل تۇردە جولعا شىعۋ قاجەت بولسا، وندا شەكارادان كىرۋگە كەمىندە 4 ساعات قالعاندا RuID قوسىمشاسى ارقىلى حابارلاپ، جەكە كابينەتكە ءتيىستى قۇجاتتار مەن انىقتامالاردى جۇكتەۋ قاجەت.

- ۆيزاسىز رەجيمدەگى ەلدەردىڭ ازاماتتارىنا كىرۋدىڭ جاڭا ەرەجەلەرى ەنگىزىلدى. بۇل ءبىزدىڭ ەلىمىزدىڭ ازاماتتارىنا دا قاتىستى. اتاپ ايتقاندا، 30-ماۋسىمنان باستاپ قازاقستان ازاماتتارى رەسەي فەدەراتسياسىنا كىرۋىنە 72 ساعات قالعاندا ProID - بۇل جاڭا پلاتفورما جۇيەسىنە كىرىپ، جەكە كابينەتىندە دەرەكتەردى تولتىرىپ، فوتوسى مەن جەكە مالىمەتتەرىن جۇكتەۋى كەرەك. سونداي-اق، ەلگە بارۋ جوسپارىنا سايكەس كىرۋ جانە بولۋ مەرزىمىن كورسەتۋى قاجەت، - دەدى قازاقستان رەسپۋبليكاسىنىڭ رەسەيدەگى ەلشىلىگىنىڭ كەڭەسشى-كونسۋلى عازيز اعىبايەۆ Jibek Joly تەلەارناسىنىڭ ەفيرىندە.

سونىمەن قاتار جاڭا ەرەجەگە سايكەس رەسەيگە ادىراسپان الىپ كىرۋگە تىيىم سالىنادى. ول قۇرامىندا ەسىرتكى جانە پسيحوتروپتىق زاتتار بار وسىمدىكتەر تىزىمىنە ەنگىزىلگەن. زاڭ بۇزىلعان جاعدايدا 3 جىلدان 5 جىلعا دەيىن باس بوستاندىعىنان ايىرۋ نەمەسە 1 ميلليون رۋبلگە (5 ميلليون تەڭگەگە) دەيىن ايىپپۇل قاراستىرىلعان.

ايتا كەتسەك، وتكەن جىلدان بەرى قازاقستاندىقتاردىڭ ادىراسپاندى كورشى ەلگە الىپ وتپەك بولعانى ءۇشىن سوتتالعان جاعدايلار جيىلەگەن.

ايتا كەتەيىك، 17-مامىردا قازاقستان پرەزيدەنتى قاسىم-جومارت توقايەۆ پەن رەسەي پرەزيدەنتى ۆلاديمير پۋتينمەن تەلەفون ارقىلى سويلەسىپ، ەكىجاقتى ىنتىماقتاستىقتىڭ وزەكتى ماسەلەلەرىن تالقىلادى.