ەندى كوڭىل كۇيىڭىز بولماسا، جۇمىسقا بارماۋعا رۇقسات ەتىلەدى

استانا. KAZINFORM - قىتايداعى Pang Dong Lai سۋپەرماركەتتەر جەلىسىنىڭ يەسى كوڭىل-كۇيى ناشار قىزمەتكەرلەرىنە جۇمىسقا شىقپاي، دەمالۋعا مۇمكىندىك بەردى. بۇل دەمالىس 10 كۇنگە دەيىن سوزىلۋى مۇمكىن. ال كومپانياداعى جىل سايىنعى ەڭبەك دەمالىسى 30 كۇننەن 40 كۇنگە دەيىن ۇلعايتىلعان، - دەپ حابارلايدى Massaget.kz ءتىلشىسى scmp.com سايتىنا سۇيەنە وتىرىپ.

«مەن قىزمەتكەرلەرىمنىڭ ەركىن بولعانىن قالايمىن. اركىمنىڭ بىرنارسەگە كوڭىلى تولمايتىن ساتتەرى بولادى، سوندىقتان ەگەر ءسىز كوڭىل كۇيىڭىز بولماسا، جۇمىسقا كەلمەي-اق قويىڭىز»، - دەدى كاسىپكەر يۋ دوڭلاي.

ماگنات ۇزاق جۇمىس ۋاقىتىن ناسيحاتتايتىن قىتاي مادەنيەتىن ايىپتايدى. سوندىقتان ونىڭ قىزمەتكەرلەرى كۇنىنە 7 ساعات جۇمىس ىستەيدى، ولارعا ارنالعان دەمالىس كۇندەرى جانە ءبىرقاتار جەڭىلدىك بار.

الەۋمەتتىك جەلى قولدانۋشىلارى بۇل يدەيانى قولداي كەتتى.

«مۇنداي كوشباسشىلىق پەن كورپوراتيۆتىك مادەنيەت بۇكىل ەلدە ناسيحاتتالۋى كەرەك»، «مەن قازىر Pang Dong Lai-عا اۋىسىپ كەتكىم كەلەدى. وندا باقىتتى بولاتىن سياقتىمىن ءارى سوندا مەنى ءبارى قۇرمەتتەيتىن سياقتى»، - دەپ جازعان Weibo قولدانۋشىلارى.

ايتا كەتەيىك، ساۋالناماعا سايكەس، قىتايلىق جۇمىسشىلاردىڭ 65 پايىزدان استامى جۇمىستا ءوزىن شارشاڭقى جانە باقىتسىز سەزىنەدى. تومەن جالاقى، كۇردەلى تۇلعاارالىق قارىم-قاتىناس جانە ۇزاق ۋاقىت جۇمىس ىستەۋ مادەنيەتى جاعىمسىز ەموتسيالاردىڭ نەگىزگى كوزى رەتىندە تانىلادى.