ەندى ۇشاقتا ورنىنان ەرتە تۇرىپ الاتىن جولاۋشىلارعا ايىپپۇل سالىنادى

استانا. kazinform - تۇركيادا ۇشاق قونعان ساتتە ەكيپاج رۇقساتىن كۇتپەستەن ورنىنان تۇرىپ، قوزعالعان جولاۋشىلار اكىمشىلىك جاۋاپكەرشىلىككە تارتىلادى. بۇل وزگەرىس ەلدىڭ ازاماتتىق اۆياتسيا جونىندەگى باس باسقارماسىنىڭ (SHGM) جاڭا تسيركۋليارىندا كورسەتىلگەن، دەپ حابارلايدى El.kz اقپارات اگەنتتىگى.

نەلىكتەن ايىپپۇل سالىنادى؟

قۇجاتتا سوڭعى كەزدەرى جولاۋشىلار تاراپىنان جازباشا جانە اۋىزشا شاعىمداردىڭ ارتقانى، سونداي-اق SHGM جۇرگىزگەن تەكسەرىستەر ناتيجەسىندە مىناداي بۇزۋشىلىقتار جيىلەگەنى ايتىلعان:

ەكيپاجدىڭ ەسكەرتۋلەرىنە قاراماستان جولاۋشىلاردىڭ ورنىنان ەرتە تۇرىپ، دالىزگە شىعۋى؛

باگاج سورەلەرىن اشىپ، ۇشاق تولىق توقتاماي جاتىپ قوزعالۋ؛

بۇل ارەكەتتەر جولاۋشىلاردىڭ وزدەرىنىڭ عانا ەمەس، باسقا ادامدار مەن مۇلىك قاۋىپسىزدىگىنە دە قاۋىپ توندىرەدى.

ەندى اۆياكومپانيالاردىڭ بارلىعىنا رەيس بارىسىندا تەمەكى شەگۋگە تىيىم سالۋ جانە قاۋىپسىزدىك بەلدىگىن تاعۋ تۋرالى حابارلاندىرۋ جاساۋ مىندەتتەلەدى. ال بۇل تالاپتاردى بۇزعان جولاۋشىلارعا قاتىستى ايىپپۇل تۇرىندەگى اكىمشىلىك شارالار قولدانىلادى.

Turkish Airlines اۋە كومپانياسى ءوز بورتسەرىكتەرىن بۇل وزگەرىستەر تۋرالى الدىن الا ەسكەرتكەن.

ازىرگە ايىپپۇلدىڭ ناقتى مولشەرى بەلگىلەنبەگەنىمەن، اۆياكومپانيا باسپا ءسوز قىزمەتى بۇل شارالاردىڭ بارلىعى زاڭ اياسىندا جۇزەگە اسىرىلاتىنىن اتاپ ءوتتى.

نەلىكتەن ەرتە ورنىنان تۇرۋعا بولمايدى؟

كەنەتتەن تەجەلۋ جولاۋشىنىڭ قۇلاۋىنا سەبەپ بولۋى مۇمكىن. ودان قالدى ورنىنان ەرتە تۇرىپ العان جولاۋشىلار دالىزدە بوگەت جاساپ، توتەنشە جاعداي بولا قالعان جاعدايدا، شىعاتىن ەسىكتەرگە قولجەتىمدىلىكتى شەكتەيدى.

ادامدار سومكەلەرىن سورەلەردەن اسىعىپ الىپ جاتقاندا، ۇشاقتىڭ تەجەلۋى سالدارىنان سومكەلەر وتىرعان جولاۋشىلاردىڭ باسىنا ءتۇسىپ كەتۋى مۇمكىن.