نازاربايەۆ زياتكەرلىك مەكتەبى ءماجىلىس دەپۋتاتىنىڭ مالىمدەمەسىنە قاتىستى پىكىر ءبىلدىردى

استانا. KAZINFORM - «نازاربايەۆ زياتكەرلىك مەكتەپتەرى» د ب ب ۇ باسقارما ءتوراعاسى ءانۋار جانعوزين قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ماگەررام ماگەرراموۆتىڭ مالىمدەمەسىنە قاتىستى پىكىر ءبىلدىردى.

«كەشە ءماجىلىس دەپۋتاتى نازاربايەۆ زياتكەرلىك مەكتەپتەرىن قارجىلاندىرۋعا قاتىستى تاعى ءبىر مالىمدەمە جاسادى. ماگەررام ماگەرراموۆتىڭ ايتۋىنشا، 2011-2024-جىلدار ارالىعىندا نازاربايەۆ زياتكەرلىك مەكتەپتەرىنىڭ ءبىر وقۋشىسىنا جىل سايىن 27 ميلليون تەڭگە بولىنگەن. بۇل دەرەكتىڭ ناقتى قايدان الىنعانى بەلگىسىز، ءبىراق بۇل مۇلدەم شىندىققا جاناسپايدى جانە قوعامدى جاڭىلىستىرىپ وتىر.

2024-جىلى NIS- تە وقۋعا ارنالعان ءبىلىم گرانتىنىڭ سوماسى 2349191 تەڭگەنى قۇرايدى. وتكەن جىلدارى بۇل كورسەتكىش بۇدان دا تومەن بولدى. گرانت بويىنشا شىعىستار قاتاڭ رەتتەلەدى جانە وعان مەكتەپ قىزمەتكەرلەرىنىڭ جالاقىسى، وقۋشىلاردىڭ تاماقتانۋى جانە كوممۋنالدىق شىعىندار كىرەدى. زياتكەرلىك مەكتەپتەردى قارجىلاندىرۋ كولەمى جىل سايىن ورتالىق مەملەكەتتىك ورگاندار جانە ءماجىلىس دەپۋتاتتارى تاراپىنان ماقۇلدانىپ، رەسپۋبليكالىق بيۋجەت اياسىندا بەكىتىلەدى. سونىمەن قاتار ءبىز ۇيىمنىڭ قىزمەتى تۋرالى سەنىمدى ءارى تولىق اقپارات بەرۋگە ءارقاشان دايىنبىز.

جالپى مەكتەپتەردىڭ قارجىلاندىرۋ كولەمىن وڭىرلەردىڭ بيۋدجەتىمەن سالىستىرۋ مەندە ۇلكەن سۇراق تۋعىزادى. بۇل مۇلدەم دۇرىس ەمەس، ويتكەنى ول سالىستىرۋعا، ءبىر-بىرىنە پارا-پار كەلمەيتىن جاعدايلارعا نەگىزدەلىپ ولشەنەدى.

سونىمەن قاتار جاقىندا مىناداي دەرەككە تاپ بولدىم، ەگەر ءبىلىم ۇياسىنىڭ قىزمەتىن باسقا دۇنيەلەرمەن سالىستىرۋ قيسىنسىز بولسا، كەم دەگەندە سالىستىرۋ بارىسىندا مىنانى ەستە ساقتاۋ كەرەك. ماسەلەن، ءبىر زياتكەرلىك مەكتەپ وقۋشىسىن قارجىلاندىرۋ 2,3 ميلليون تەڭگەنى قۇراسا، وندا ءبىر تۇتقىندى قارجىلاندىرۋعا 2,7 ميلليون تەڭگە بولىنەدى (دەرەككوزگە سىلتەمە پىكىردە).

مەكتەپتەردەن اقشا ۇنەمدەيتىن ادام تۇرمەلەر سالادى دەگەن دايەكسوز بار.

قازىر مەملەكەت باسشىسى دا، ەل ۇكىمەتى دە ءبىلىم بەرۋ ساپاسىن ارتتىرۋ ءۇشىن بۇرىن-سوڭدى بولماعان جاعدايلار جاساپ جاتقانى انىق. مۇنىڭ ءبارى ءسوزسىز ناتيجە بەرەدى. تەك قوعام قاي باعىتتا جۇرگىسى كەلەتىنىن، نەندەي دۇنيەگە باسىمدىق بەرەتىنىن ءتۇسىنۋ عانا قالدى.

تاعى دا ايتا كەتكىم كەلەدى، ءبىز سىندارلى ديالوگقا اشىقپىز. رەسپۋبليكالىق بيۋجەتتى بەكىتۋ شەڭبەرىندەگى زياتكەرلىك مەكتەپتەردىڭ بارلىق شىعىستارى تالقىلانادى، اشىق ءارى باقىلاۋ جاساۋ قولجەتىمدى.

مەن تەك دالەلدەنگەن جانە ناقتى مالىمەتتەرمەن جۇمىس ىستەۋگە شاقىرامىن»، - دەدى ول.