NASA مالىمەتىنشە، جۇلدىزداردىڭ قالىپتاسۋى گراۆيتاتسيانىڭ اسەرىنەن باستالادى. ول گازدىڭ وراسان زور ماسساسىن ءبىر جەرگە جيناقتايدى. الايدا بۇدان كەيىنگى ۇدەرىس كۇردەلەنە تۇسەدى: قالىپتاسىپ ۇلگەرگەن جۇلدىزدار قۋاتتى اعىندار مەن جەلدەر شىعارادى. كەيبىرى ۋاقىت وتە كەلە جارىلۋى دا مۇمكىن.
عارىشتىق سۋرەتتە جۇلدىزداردىڭ پايدا بولۋ ۇدەرىسى ايقىن بايقالادى. كادردىڭ سول جاعىنداعى التىن ءتۇستى گاز ايماعىندا ورنالاسقان جاس جۇلدىزدار وڭ جاقتاعى قىزىل ءتۇستى بولىكتە كورىنەتىن جۇلدىزدارعا قاراعاندا قالىپتاسۋ كەزەڭىنىڭ اناعۇرلىم جەتىلگەن ساتىسىندا تۇر.
قىزىل ءتۇستى گازداعى جىڭىشكە تالشىق ءتارىزدى قۇرىلىمدار دا نازار اۋدارادى. NASA ماماندارىنىڭ بولجامىنشا، ولار جاس جۇلدىزداردان تارايتىن قۋاتتى اعىندار مەن جۇلدىزدىق جەلدەردىڭ اسەرىنەن پايدا بولعان.
سۋرەتتە عارىشتىق شاڭنىڭ ءرولى دە كورىنەدى. تىعىز شاڭ كورىنەتىن جارىقتى بوگەپ، نىسانداردى كادىمگى وپتيكالىق سۋرەتتەردە انىق كورۋگە كەدەرگى كەلتىرەدى. مۇنداي شاڭ جۇلدىزداردىڭ سالقىن اتموسفەراسىندا دا ءتۇزىلۋى مۇمكىن. كەيىن ول قورشاعان كەڭىستىككە تارالادى.
عالىمدار جۇلدىزداردىڭ دامۋىنىڭ ءارتۇرلى كەزەڭدەرىن زەرتتەۋ ارقىلى ولاردىڭ قالىپتاسۋى كەزىندە قانداي فيزيكالىق ۇدەرىستەر ماڭىزدى ءرول اتقاراتىنىن جانە ولاردىڭ قاي ۋاقىتتا جۇرەتىنىن جاقسىراق تۇسىنۋگە مۇمكىندىك الادى.
NASA بۇل سۋرەتتى 2026 -جىلعى 16 -قاراشاداعى «كۇننىڭ استرونوميالىق سۋرەتى» (Astronomy Picture of the Day) ايدارىندا جاريالادى. كادردى NASA، ەۋروپالىق عارىش اگەنتتىگى (ESA)، كانادانىڭ عارىش اگەنتتىگى (CSA)، عارىشتىق تەلەسكوپ عىلىمي ينستيتۋتى (STScI) جانە دجەيمس ۋەبب تەلەسكوپى بىرلەسىپ ۇسىنعان.
ايتا كەتەيىك، بۇعان دەيىن NASA مارستا سۋدىڭ بىرنەشە رەت بولعانىن دالەلدەيتىن بەلگىلەر تابىلعانىن جاريالاعان.
سونداي- اق NASA ايعا جۇك جەتكىزۋ باعدارلاماسىنا قاتىساتىن سەگىز كومپانيانى تاڭداعانىن جازدىق.