ىرىكتەۋدەن وتكەندەر ايدا ءومىر ءسۇرىپ، جۇمىس ىستەۋ مۇمكىندىگىنە يە بولادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى CBS News-كە سىلتەمە جاساپ.
ۇمىتكەرلەر جوعارى بىلىممەن قاتار، ءتيىستى كاسىبي تاجىريبەگە يە بولۋعا ءتيىس. ىرىكتەۋدەن وتكەندەر حيۋستون قالاسىنا كوشىپ، ليندون دجونسون اتىنداعى عارىش ورتالىعىندا قىزمەت ەتەدى. جىلدىق ەڭبەكاقىسى - 164395 دوللار.
- ءبىز تاڭداعان ماماندار اي بەتىندە ەركىن ءجۇرىپ، اي بازاسىندا تۇرىپ، جۇمىس ىستەيدى. بۇعان قوسا بولاشاقتا ەكيپاجدى مارسقا جىبەرۋگە مۇمكىندىك بەرەتىن جۇيەلەر مەن وپەراتسيالاردى ازىرلەۋگە اتسالىسادى، - دەدى NASA اكىمشىسى دجارەد ايزەكمان.
ۇمىتكەرلەر تومەندەگى ءتورت ءبىلىم بەرۋ باعىتىنىڭ بىرىنە سايكەس كەلۋگە ءتيىس:
1. ينجەنەريا، بيولوگيا، فيزيكا، ينفورماتيكا نەمەسە ماتەماتيكا سالالارىنىڭ ءبىرى بويىنشا ماگيستر دارەجەسى.
2. وسى ماماندىقتاردىڭ ءبىرى بويىنشا دوكتورانتۋرادا كەمىندە ەكى جىل وقۋ.
3. مەديتسينا سالاسىنداعى ءتيىستى بىلىكتىلىك: مەديتسينا دوكتورى، دارىگەر كومەكشىسى نەمەسە تاجىريبەلى مەدبيكە ديپلومى.
4. 2027-جىلعى شىلدەگە دەيىن سىناقشى ۇشقىشتار مەكتەبىن اياقتاۋ.
بۇعان قوسا NASA ۇمىتكەرلەردىڭ وقۋىن اياقتاعاننان كەيىن بەلگىلى ءبىر كاسىبي تاجىريبەسى بولۋىن تالاپ ەتەدى.
ۇشقىشتار تومەندەگى ءۇش تالاپتىڭ بىرىنە ساي بولۋعا ءتيىس:
جوعارى ءونىمدى رەاكتيۆتى ۇشاقتى باسقارعان ۇشقىش رەتىندە كەمىندە 750 ساعات ۇشۋ؛
باسقا ۇشاقتارمەن 1500 ساعات ۇشۋ، ونىڭ ىشىندە 750 ساعاتى اۋە كەمەسىنىڭ كومانديرى رەتىندە بولۋى؛
تىكۇشاق جانە باسقا دا روتورلى اۋە كەمەلەرىمەن 1000 ساعات ۇشۋ، ونىڭ 300 ساعاتى اۋە كەمەسىنىڭ كومانديرى رەتىندە ءوتۋى كەرەك. باستاپقى ۇشۋ دايارلىعى مەن درونمەن ۇشۋ ۋاقىتى ەسەپكە الىنبايدى.
ۇشۋ سىناقتارى: ۇمىتكەرلەر 2027-جىلعى شىلدەگە دەيىن سىناقشى ۇشقىشتار مەكتەبىن ءبىتىرۋى نەمەسە وعان وقۋعا ءتۇسۋى جانە وسى باعىتتا كەمىندە ءۇش جىل جۇمىس تاجىريبەسى بولۋى كەرەك.
مەديتسينا: مەديتسينالىق ءبىلىم العاننان كەيىن ماماندىعى بويىنشا كەمىندە ءۇش جىل ەڭبەك ءوتىلى بولۋعا ءتيىس. NASA مالىمەتىنشە، رەزيدەنتۋرادا وقۋ مەرزىمى دە ەڭبەك وتىلىنە ەسەپتەلەدى.
جاراتىلىس تانۋ عىلىمدارى: بيولوگيا جانە مەديتسينا سالاسىنىڭ ماماندارى ءوز باعىتى بويىنشا كەمىندە ءۇش جىل جۇمىس تاجىريبەسىنە يە بولۋى كەرەك.
فيزيكا جانە ماتەماتيكا: ماماندىعى بويىنشا كەمىندە ءۇش جىل ەڭبەك ءوتىلى بولۋعا ءتيىس.
ينجەنەريا: ماماندىعى بويىنشا كەمىندە ءۇش جىل جۇمىس تاجىريبەسى تالاپ ەتىلەدى.
قوسىمشا تالاپ: ادام ءومىرى مەن ميسسيا قاۋىپسىزدىگىنە قاتەر تونەتىن كۇردەلى جاعدايدا جەدەل شەشىم قابىلداپ، كوماندامەن جۇمىس ىستەۋ بويىنشا كەمىندە ءۇش جىل تاجىريبەسى بولۋعا ءتيىس.
سونداي-اق ۇمىتكەرلەر مەديتسينالىق جانە پسيحياتريالىق تەكسەرۋدەن ءوتىپ، كورۋ قابىلەتىن تەكسەرتۋى، ءومىرباياندىق دەرەكتەرىن راستاۋى جانە ەسىرتكىگە تەست تاپسىرۋى كەرەك.
بولاشاق استروناۆتار اۋىر دەنە جاتتىعۋلارىن ورىنداۋعا، سونىڭ ىشىندە اۋىر زات كوتەرۋگە، وتىرىپ-تۇرۋعا، ەڭبەكتەۋگە جانە قولايسىز اۋا رايىنا توتەپ بەرۋگە دايىن بولۋى قاجەت. بۇدان بولەك ولار ومىرىنە قاۋىپ تونەتىن جاعدايدا جۇمىس ىستەۋگە، شالعاي ءارى وقشاۋ جەردە، تار نەمەسە جابىق كەڭىستىكتە ۇزاق ۋاقىت تۇرىپ، ەڭبەك ەتۋگە ءازىر بولۋعا ءتيىس. بۇعان قوسا ۇمىتكەرلەر ءجۇزۋ سىناعىنان وتەدى.
سونىمەن قاتار ۇمىتكەرلەر عارىشتا 12 اي نەمەسە ودان دا ۇزاق ۋاقىت بولۋعا، تولىق وقشاۋلانۋعا، تۇرمىستىڭ اۋىر جاعدايىنا جانە جاقىندارىنان ۇزاق ۋاقىت قول ۇزۋگە دايىن بولۋى كەرەك.
بۇعان دەيىن NASA- نىڭ 4 عارىشكەرى «مارستاعى بازادا» 1 جىل تۇرعانى حابارلانعان بولاتىن.