NASA ايعا ۇشاتىن ميسسياعا كەرى ساناقتى باستادى

استانا. KAZINFORM - ا ق ش- تىڭ ۇلتتىق اەروناۆتيكا جانە عارىش كەڭىستىگىن زەرتتەۋ باسقارماسى - NASA - «ارتەميدا-2» اي ميسسياسىنىڭ ۇشىرىلىمىنا 50 ساعاتتىق كەرى ساناقتى باستادى.

ۇشىرىلىم 1-ءساۋىر كۇنى ا ق ش- تىڭ شىعىس جاعالاۋى ۋاقىتىمەن 18:24 كە (2 -ءساۋىر، ورتالىق ەۋروپا ۋاقىتىمەن 00:24) جوسپارلانعان، دەپ حابارلايدى Deutsche Welle.

«وريون» عارىش كەمەسىنىڭ بورتىندا ءتورت استروناۆت بولادى: ريد ۋايزمان، دجەرەمي حانسەن، كريستينا كوح جانە ۆيكتور گلوۆەر. ۆيكتور گلوۆەر اي ميسسياسىنا قاتىساتىن العاشقى افروامەريكالىق بولسا، كريستينا كوح - وسىنداي ميسسياعا قاتىسقان العاشقى ايەل استروناۆت اتانادى.

Space Launch System (SLS) زىمىران-تاسىعىشى «وريونمەن» بىرگە فلوريداداعى كەننەدي اتىنداعى عارىش ورتالىعىنىڭ 39A ۇشىرۋ الاڭىنا 20 - ناۋرىزدا ورناتىلعان. باستاپقىدا ۇشىرىلىم 2026 -جىلدىڭ ناۋرىزىنا جوسپارلانعان، الايدا زىمىرانعا گەلي بەرۋ جۇيەسىندەگى تەحنيكالىق اقاۋلارعا بايلانىستى كەيىنگە شەگەرىلگەن.

«ارتەميدا-2» ميسسياسى امەريكالىق اي باعدارلاماسىنىڭ ەكىنشى كەزەڭى بولماق. 10 كۇن ىشىندە ەكيپاج ايدى اينالىپ ۇشىپ، جەرگە قايتا ورالادى. باعدارلامانىڭ العاشقى كەزەڭى - «ارتەميدا-1» - 2022 -جىلدىڭ جەلتوقسانىندا اياقتالدى: «وريون» ايعا ۇشقىشسىز ساپار جاساپ، جەرگە امان قايتقان. ءۇشىنشى كەزەڭ - «ارتەميدا-3» - 50 جىلدان استام ۋاقىتتان كەيىن ادامداردى ايعا قايتا قوندىرۋدى كوزدەيدى.

2019 -جىلى جاريالانعان «ارتەميدا» باعدارلاماسى ايعا تۇراقتى ميسسيالاردى جولعا قويۋدى جانە بولاشاقتا مارسقا ۇشۋلار ءۇشىن ارالىق بازا قۇرۋدى ماقسات ەتەدى.

بۇعان دەيىن NASA ايعا قونۋ مەرزىمىن 2028-جىلعا شەگەرگەنى حابارلانعان. كەيىن اگەنتتىك ايدا بازا سالۋ جانە يادرولىق عارىش كەمەسىن ۇشىرۋ جوسپارىن جاريالاعان ەدى.

وسىعان دەيىن تۇرىك دارىگەرىنىڭ NASA استروناۆتارىنىڭ دەنساۋلىعىن تەكسەرەتىنى تۋرالى جازدىق.