ناۋرىزدا ازىق-تۇلىكتىڭ الەمدىك باعاسى ءبىرشاما ءوستى - ۇلتتىق بانك

استانا. KAZINFORM - بۇگىن ۇلتتىق بانكتىڭ اقشا- كرەديت ساياساتى كوميتەتى بازالىق مولشەرلەمەنى 14,75 پايىز دەڭگەيىندە ساقتاۋ جونىندە شەشىم قابىلدادى. ۇلتتىق بانك ءتوراعاسى تيمۋر سۇلەيمەنوۆ ب ا ق وكىلدەرىنە ارنالعان باسپا ءسوز ءماسليحاتىندا ورتالىق بانكتىڭ نەلىكتەن مۇنداي شەشىمگە كەلگەنىن ءتۇسىندىردى.

ۇلتتىق بانك ازىرگە اقشا-كرەديت ساياساتىن ۇستامدى قاتاڭ كۇيدە ساقتالىپ قالعانىنا مۇددەلى. بازالىق مولشەرلەمەنى ساقتاپ قالۋداعى ماڭىزدى دا العاشقى فاكتورلاردىڭ ءبىرى - ينفلياتسيالىق كۇتۋلەر مەن ينفلياتسيانىڭ ديناميكاسىنا ءمان بەرۋ.

- ناۋرىزدا جىلدىق ينفلياتسيا 9,1 پايىزعا دەيىن باياۋلاعانىمەن، ءبىزدىڭ بولجامدى تراەكتوريامىزدان ءبىرشاما جوعارى بولىپ شىقتى. وعان نەگىزىنەن رەتتەلەتىن قىزمەتتەردىڭ ءتاريفى ىقپال ەتتى. تۇرعىن ءۇي كوممۋنالدىق قىزمەتتەرىنىڭ ءتاريفى ءبىز كۇتكەن دەڭگەيدەن جوعارىراق قالىپتاستى. ناقتى ايتساق، ينفلياتسياعا ۇلەسى 0,43 پايىزدىق تارماققا تەڭ بولدى. رەتتەلەتىن تاريفتەرمەن بىرگە جالپى قىزمەت تۇرلەرىنىڭ قۇنى دا ءوستى. قىزمەتتەر ينفلياتسياسى ناۋرىزدا 13,2 پايىز دەڭگەيىندە قالىپتاستى. ياعني، قازىر ول باعانىڭ وسۋىنە ۇلەس قوسىپ وتىر، - دەيدى تيمۋر سۇلەيمەنوۆ.

ونىڭ ايتۋىنشا، ازىق-تۇلىك ينفلياتسياسى 6,9 پايىزعا دەيىن تومەندەپ، ازىق-تۇلىككە جاتپايتىن تاۋارلار باعاسىنىڭ ءوسۋ قارقىنى 8,2 پايىزعا دەيىن باياۋلاعان.

- ايلىق ينفلياتسيا اقپاندا كۇرت وسسە، ناۋرىزدا 0,7 پايىز بولدى. ونىڭ الدىندا 1,1 پايىز ەدى. بۇل ورتاشا جىلدىق ديناميكادان 0,6 پايىز جوعارى. بازالىق جانە ماۋسىمدىق فاكتورلار ەسكەرىلمەيتىن ينفلياتسيا كورسەتكىشتەرى ايتارلىقتاي تومەندەدى. اتالعان كورسەتكىشتەر بىرنەشە اي بويى ءبىر دەڭگەيدە قالىپ، اقپاندا بىردەن جەدەلدەدى. سوندىقتان، بۇل - جاقسى كورسەتكىش. دەگەنمەن، ءبىر ايدىڭ قورىتىندىسىنا قاراپ تۇبەگەيلى وزگەرىستەر تۋرالى ايتۋعا ءالى ەرتە. ينفلياتسيا بىرنەشە اي بويى سەنىمدى جانە ورنىقتى تۇردە تومەندەپ جاتسا، بازالىق مولشەرلەمەنى ودان ءارى تومەندەتۋگە مۇمكىندىك بولادى، - دەيدى تيمۋر سۇلەيمەنوۆ.

ەكىنشى ماڭىزدى فاكتور - ىشكى ەكونوميكاداعى تەندەنتسيالار. قۇب مالىمەت بويىنشا، قاڭتار-اقپان ايلارىندا قازاقستان ەكونوميكاسى 4,2 پايىزعا وسكەن.

بۇل بولجامعا سايكەس كەلەدى. ەكونوميكالىق بەلسەندىلىكتىڭ ەداۋىر ءوسۋى ىشكى جانە سىرتقى سۇرانىسپەن بارلىق دەرلىك سەكتورلاردا قامتاماسىز ەتىلىپ وتىر.

- ىشكى سۇرانىستى سيپاتتايتىن سالالار تاۋارلار ۇسىنىسىن قامتاماسىز ەتەتىن سالالارعا قاراعاندا تەزىرەك ءوسىپ جاتقانىن دا اتاپ وتكەن ءجون. بۇل وسى ءوسىمنىڭ جەتكىلىكسىز بالانسىن كورسەتەدى. وسى باعىتتا جۇمىس ىستەۋ كەرەك بولادى. ىشكى سۇرانىس حالىقتىڭ ناقتى كىرىسىنىڭ وسۋىمەن، ينۆەستيتسيالىق بەلسەندىلىكتىڭ ارتۋىمەن جانە بيۋجەت شىعىستارىمەن قامتاماسىز ەتىلىپ وتىر. دەگەنمەن، ءۇي شارۋاشىلىعىنداعى تۇتىنۋ دەڭگەيى حالىقتىڭ ناقتى تابىسىنان تەزىرەك ءوسىپ كەلە جاتقانىن ايتا كەتۋ كەرەك. بۇعان تۇتىنۋشىلىق كرەديتتەۋ اياسىنىڭ ۇزدىكسىز كەڭەيۋى دە سەبەپ بولىپ وتىر، - دەپ اتاپ ءوتتى ق ۇ ب باسشىسى.

سونىمەن قاتار، تيمۋر سۇلەيمەنوۆتىڭ ايتۋىنشا، ىسكەرلىك بەلسەندىلىك يندەكسى ەكى اي قاتارىنان وندىرىستە دە، قىزمەت سالاسىندا دا وڭ ديناميكا كورسەتتى.

- كاسىپورىندار سۋ تاسقىنى باستالعانعا دەيىن سۇرانىس پەن بيزنەس ورتانىڭ جانە بيزنەس جاعدايدىڭ ايتارلىقتاي جاقسارعانىن اتاپ ءوتتى. بيزنەس-سيكل يندەكسى 2023-جىلدىڭ باسىنان ەكونوميكانىڭ ءوسۋ ايماعىندا بولىپ، بيىل ناۋرىزدا ەڭ جوعارى ماندەردە بايقالدى. بۇل - جاقسى ترەند، - دەپ مالىمدەدى ۇلتتىق بانك باسشىسى.

تيمۋر سۇلەيمەنوۆ ءۇشىنشى فاكتورعا - سىرتقى ەكونوميكالىق كونيۋنكتۋرانى جاتقىزدى. ونىڭ ايتۋىنشا، الەمدىك ازىق-تۇلىك نارىعىنداعى جاعداي، جالپى، تۇراقتى.

- استىق باعاسى ەكسپورتتاۋشى ەلدەردە توقتاۋسىز جينالعان استىق ءونىمىن ساتۋعا جانە تەڭىز ساۋدا جولدارىنىڭ ۇزدىكسىز جۇمىس ىستەۋىنە بايلانىستى تومەندەپ كەلەدى. سىرتقى اقشا- كرەديت شارتتارى ءالى دە قاتاڭ، - دەپ حابارلادى تيمۋر سۇلەيمەنوۆ.

سونىڭ ناتيجەسى كورسەتكەندەي، الەمدە ينفلياتسيا باياۋلاپ كەلەدى. ءبىراق كوپ ەلدەردە ءالى دە تارگەتتەن جوعارى.

ءسوزىنىڭ سوڭىن تيمۋر سۇلەيمەنوۆ ينفلياتسيا ودان ءارى باياۋلايتىن بولسا، ول بازالىق مولشەرلەمەنى تومەندەتۋگە جاعداي جاسايدى دەپ تۇيىندەدى.