نارىققا شەتەلدىك بانكتەردىڭ كەلۋىنە مۇددەلىمىز - قارجى نارىعىن رەتتەۋ اگەنتتىگى

استانا. KAZINFORM - قازاقستان اۋماعىندا فيليالىن اشقىسى كەلگەن شەتەلدىك بانكتەر اكتيۆىنە قويىلاتىن تالاپ 10 ميلليارد دوللارعا دەيىن تومەندەتىلدى. بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ولجاس قيزاتوۆ ايتتى.

و. قيزاتوۆتىڭ ايتۋىنشا، وڭتۇستىك-شىعىس ازيا مەن شىعىس ەۋروپا بانكتەرى تاراپىنان قىزىعۋشىلىق بار.

- بۇل بانكتەردىڭ اتاۋلارىن ناقتى ايتا المايمىز، سەبەبى ولار قازىر بانك نارىعىنا كىرۋ مۇمكىندىگىن قاراستىرۋ كەزەڭىندە تۇر. ازىرگە ەشقانداي تۇپكىلىكتى شەشىمدەر قابىلدانعان جوق، سوندىقتان مۇنداي اقپاراتتى جاريالاي المايمىز. ءبىراق بەلگىلى ءبىر قىزىعۋشىلىق بار. نەگە دەسەڭىز، ءبىز قازىرگى زاڭنامالىق نورمالار اياسىندا بانك فيليالدارىن اشۋعا قويىلاتىن تالاپتاردى تومەندەتىپ جاتىرمىز. ياعني، قازىر شەتەلدىك بانك قازاقستان اۋماعىندا ءوز فيليالىن اشقىسى كەلسە، ونىڭ اكتيۆتەرى كەمىندە 20 ميلليارد ا ق ش دوللارىن قۇراۋى كەرەك. بۇل نورما بەس جىل بويى قولدانىستا بولعانىمەن، بىردە-ءبىر شەتەلدىك بانك قازاقستاندا فيليال اشپادى. ءوزىمىزدىڭ قاداعالاۋ اياسىنداعى اقپاراتقا سۇيەنىپ، بىزبەن تىعىز ساۋدا جانە ەكونوميكالىق بايلانىستاعى ەلدەر تاراپىنان بانك اشۋعا قىزىعۋشىلىق بارىن بايقاپ وتىرمىز. ول ەلدەردەگى بانكتەردىڭ اكتيۆتەرى قانداي ەكەنىن زەرتتەدىك. سول زەرتتەۋلەر نەگىزىندە تالاپتى 20 ميللياردتان 10 ميلليارد ا ق ش دوللارىنا دەيىن تومەندەتۋ ۇسىنىلدى، - دەدى و. قيزاتوۆ سەناتتا وتكەن بريفينگتە.

ونىڭ ايتۋىنشا، تالاپتاردى تومەندەتۋ شەتەلدىك بانكتەردىڭ قازاقستان نارىعىنا كىرۋ پروتسەسىن جەدەلدەتەدى.

- شەتەلدىك بانكتەر قازىر بار مۇمكىندىكتى زەردەلەپ جاتىر. ءبىز ءىرى شەتەلدىك بانكتەردىڭ كەلۋىنە مۇددەلىمىز. ەگەر ولار قۇجاتتارىن تاپسىرسا، ءبىز ول قۇجاتتاردى مۇمكىندىگىنشە قىسقا مەرزىمدە قاراۋعا تىرىسامىز، - دەدى اگەنتتىك وكىلى.

ايتا كەتەيىك، بۇگىن سەنات تۇتىنۋشىلار قۇقىعىن قورعاۋ زاڭىنا 24 تۇزەتۋ ەنگىزىپ، ماجىلىسكە كەرى قايتاردى. زاڭدا قازاقستاندا شەتەلدىك بانكتەردى اشۋعا قويىلاتىن تالاپتاردى جەڭىلدەتۋگە باعىتتالعان تۇزەتۋلەر دە بار.