نارەندرا مودي ءۇندىستاندا بيلىكتە ەڭ ۇزاق وتىرعان ەكىنشى پرەمەر-مينيستر اتاندى

استانا. KAZINFORM - نارەندرا مودي ءۇندىستان ۇكىمەتىنىڭ باسشىسى قىزمەتىندە ۇزدىكسىز 4078 كۇن جۇمىس ىستەپ، ينديرا گانديدىڭ رەكوردىن جاڭارتتى. بۇل تۋرالى India Today باسىلىمى حابارلادى.

2025 -جىلعى 25 -شىلدەدەگى جاعداي بويىنشا مودي پرەمەر-مينيستر قىزمەتىندە ۇزدىكسىز 4078 كۇنىن وتكىزدى. بۇعان دەيىن ينديرا گاندي بۇل لاۋازىمدا 4077 كۇن بولعان (1966 -جىلدىڭ قاڭتارىنان 1977 -جىلدىڭ ناۋرىزىنا دەيىن).

وسىلايشا نارەندرا مودي ەل تاريحىندا ۇزدىكسىز قىزمەت ەتكەن پرەمەر- مينيسترلەر اراسىندا ەكىنشى ورىنعا شىقتى. ءبىرىنشى ورىندا - ءۇندىستاننىڭ تۇڭعىش پرەمەر- ءمينيسترى دجاۆاحارلال نەرۋ.

مودي ءوزىنىڭ ساياسي مانسابىن 2001 -جىلى گۋدجارات شتاتىنىڭ باس ءمينيسترى رەتىندە باستادى. سودان بەرى ول 24 جىل بويى - شتاتتىق دەڭگەيدە دە، ۇلتتىق دەڭگەيدە دە سايلاۋ ارقىلى كەلگەن ۇكىمەتتەردى باسقاردى. مۇنداي كورسەتكىشكە ءۇندىستاندا ودان باسقا ەشبىر پرەمەر-مينيستر قول جەتكىزبەگەن.

سونىمەن قاتار، نارەندرا مودي - ءۇندىستان تاۋەلسىزدىگىن العان 1947 -جىلدان كەيىن دۇنيەگە كەلگەن جالعىز پرەمەر- مينيستر.

ول باسقاراتىن «بحاراتيا دجاناتا پارتي» (ءۇندىستان حالىق پارتياسى) ءۇش بىردەي جالپى ۇلتتىق سايلاۋدا قاتارىنان جەڭىسكە جەتتى. مۇنداي ناتيجەگە بۇعان دەيىن تەك دجاۆاحارلال نەرۋ عانا قول جەتكىزگەن.

وتكەن جىلدىڭ ماۋسىم ايىندا ۇلتتىق دەموكراتيالىق اليانس (ن د ا) قۇرامىنداعى ءۇندىستان حالىق پارتياسى جەڭىسكە جەتكەننەن كەيىن نارەندرا مودي ءۇشىنشى مەرزىمگە پرەمەر-مينيستر قىزمەتىنە رەسمي تۇردە كىرىستى.