«نەگە، نەگە» - «پازيك» اۆتوبۋستا تۋعان ءان بولاتىن - سازگەر بەكجىگىت سەردالى
تۇركىستان. KAZINFORM - كوپشىلىك ورتادا ءجيى ايتىلاتىن «نەگە، نەگە» ءانى تۇركىستاندىق كومپوزيتور بەكجىگىت سەردالىنىكى بولسا، ءسوزىن بۇگىندە جاسى 80 نەن اسقان اقىن راحىم بالابيەۆ جازعان.
«قازاقپارات» ءتىلشىسى ءان اۆتورلارىمەن جولىعىپ، ءاننىڭ شىعۋ تاريحيمەن تانىسىپ كەلدى.
«1998 -جىلدىڭ قىسى. كەنتاۋ قالاسىندا تۇراتىنمىن. سول جىلى قىس قاتتى بولىپ، قالادا جارىق تا، جىلۋ دا تۇگەل توقتاعان. ءۇي سۋىق، ەكى ادامدىق جالعىز كەرەۋەتتە ايەلىمىز ەكەۋمىز 4 بالانى ورتاعا الىپ، التى قابات الا كورپەنى جامىلىپ، بۇرسەڭ قاققان بوبەكتەردى تاڭ اتقانشا قۇشاقپەن جىلىتىپ، دەمبىل- دەمبىل ساۋساقتارىن ىستىق ەرىنمەن ۇرلەپ جاتاتىن زامان. تۇركىستانعا بارىپ جۇمىس ىستەۋگە تۋرا كەلدى. بۇگىنگىدەي ەمەس، تاكسيدىڭ قات كەزى. ەسكى شاھارعا ەسكى «پازيكپەن» باراسىڭ. بالا كەزدەن اۆتوبۋستىڭ تەرەزە جاعىنا وتىرىپ الىپ، ۇزاق جولدا ويعا باتقاندى جاقسى كورەتىنمىن. وسىندايدا كوبىنە ىڭىلداۋمەن ۋاقىت وتەدى. بىردە جۇمىستان قايتىپ كەلە جاتىپ، اۆتوبۋس ىشىندە كوكەيىمە اۋەن كەلە قالماسى بار ما! ۇيگە كەلدىم دە، نوتا بىلمەگەندىكتەن، ەسكى ادەتپەن الگى اۋەندى دەرەۋ ماگنيتوفونعا جازىپ قويدىم. جالپى، قاي ءاندى جازسام دا، وسىلايشا «نەگىزدەپ» الاتىنمىن. سودان ارادا بىراز ۋاقىت، شاشامەن التى ايداي مەرزىم ءوتىپ كەتكەن بولۋ كەرەك، الگى اۋەندى جازىپ قويعانىمدى ۇمىتىپ تا كەتىپپىن»- دەيدى كومپوزيتور بەكجىگىت سەردالى.
سودان ارادا ءبىراز ۋاقىت وتكەندە، بەكەڭ قۇلاعىنا كەلگەن تانىس اۋەنگە قايتا-قايتا ەلەگزي تۇسەدى. «قايدا ەستىدىم، بۇل كىمنىڭ ءانى؟» دەۋمەن ۋاقىت وتكىزەدى. ەسىنە تۇسىرە الماسا دا، كوپكە دەيىن ىشتەي «ىڭىلداپ» جۇرەدى.
«دەمالىس كۇنى ماگنيتوفوندى قوسىپ، شىعارماشىلىق جۇمىسپەن اينالىسپاققا بەكىندىم. الگى «بەلگىسىز» اۋەندى ىڭىلداپ قويامىن اراسىندا. ويپىرماي- اي دەسەڭشى، ماگنيتوفون ىشىندە مەن ىزدەگەن اۋەنىم تۇر! ەسىمە ساپ ەتە قالدى، اۆتوبۋستاعى اۋەن، مەن ىزدەگەن اۋەن! دەرەۋ جاڭا انىمە ءسوز جازار اقىن ىزدەي باستادىم. ماحاببات ءانى بولاتىنى ءسوزسىز. كەنتاۋدا اقىن كوپ، ءبىراق ماعان ءوزى اۆتوترانسپورت سالاسىندا قىزمەت ەتسە دە ماحاببات ليريكاسىن توگىلتىپ جازار راحىم بالابيەۆ ۇنايتىن. ول تۇستا راحاڭنىڭ 70 تەن اسىپ قالعان شاعى. ايتسە دە «ماحاببات تاقىرىبىنداعى انگە ءسوزدى عاشىقتىق دەرتىنە ماس بولىپ، كۇندە عاشىقتىق عازالدارىن تەربەپ جۇرگەن جاستاۋ اقىن جازۋ كەرەك شىعار» دەگەن كۇمانىم دە جوق ەمەس ەدى. دەگەنمەن، راحىم بالابيەۆكە توقتادىم. دەرەۋ تەلەفون سوعىپ، قارت اقىنعا بولاشاق ءاننىڭ يدەياسىن ايتتىم. ءان ءسوزىنىڭ ىشىندە ىنتىزار سۇيگەنىنە قولى جەتپەي قالعان ارماندى جاننىڭ جۇرەك لۇپىلىندەي بولىپ «نەگە، نەگە» دەگەن سوزدەر ءجۇرسىنشى دەپ قولقا سالدىم» - دەيدى كومپوزيتور.
ال، راحىم بازارگەلدى ۇلى جانىنا جاقىن تاقىرىپ بولعان سوڭ بولار، بىردەن كەلىسىم بەرگەن. ءتىپتى، ارادا جارتى ساعات وتكەندە تەلەفون سوعىپ، «جازىپ ال، ءان ءسوزى دايىن!» دەپتى.
«دەرەۋ جازىپ الدىم دا، اۋەنگە سالا قويدىم. قۇيىلىپ تۇر. ادەتتە اقىن ءسوزىن ءان يىرىمىنە كەلتىرۋ ءۇشىن ءبىردى- ەكىلى تۇسىنا ازعانا وزگەرىس ەنگىزەتىنسىڭ، بۇل جولى ولاي بولعان جوق. ءان وسى سوزگە، ءسوز وسى انگە ارنالىپ جازىلعانداي ۇيلەسە كەتتى»- دەيدى بەكجىگىت سەردالى.
اق كوڭىلدىم، اق ارمانىم،
نە بولىپ ءجۇر ساعان، جانىم؟
قانشاما رەت ويلانسام دا،
قۇپياڭدى تابا المادىم.
نەگە، جانىم، ۇندەمەيسىڭ؟
سەنسىز كۇنىم ءتۇن دەگەيسىڭ.
نەگە، نەگە قىزعالداقتاي،
اجارلانىپ گۇلدەمەيسىڭ؟
تۇسىمە دە جيى ەنەسىڭ،
سۇيەم دەيسىڭ، سەندىرەسىڭ.
نەگە، نەگە سەزىمىڭدى،
جانباي جاتىپ سوندىرەسىڭ؟
سەنسىز اتپاس قۇبا تاڭىم،
سەنسىز قالاي گۇل اتامىن.
جۇرەگىمنىڭ قالاۋى ما ەڭ،
نەگە سەنى ۇناتامىن؟
ءوزىڭ ەدىڭ ايبىنىم دا،
تۇسىرمەشى قايعى- مۇڭعا.
كەل، جۇزەيىك، كەلشى، قۇربىم،
ماحابباتتىڭ ايدىنىندا.
اۆتور
قايرات زاينيشيەۆ