نەگە ءبىز ارابتار سياقتى ءومىر سۇرمەيمىز؟ ساراپشى جاۋاپ بەردى

مۇنايدىڭ ايتارلىقتاي قورى بار ەلدەردىڭ كوبىسى ءوز ازاماتتارىنا اراب امىرلىكتەرىندەگىدەي جوعارى ءومىر ءسۇرۋ دەڭگەيىن قامتاماسىز ەتە المايتىنى كوپ ادامداردى قىزىقتىرادى.

بۇل ماسەلەنى قازاقستان مىسالىندا دا قوعام كوپ تالقىلاپ ءجۇر. دەسە دە ءار قازاقستاندىقتىڭ كوكەيىندە جۇرگەن ساۋالعا تاۋەلسىز ەكونوميكا ەكسپەرتى اندرەي چەبوتارەۆ جاۋاپ بەردى دەپ حابارلايدى Massaget.kz.

ەكسپەرت، بىرىنشىدەن، قازاقستاندا ايتارلىقتاي مۇناي قورى بولسا دا، ونىڭ كولەمى ساۋد ارابياسى، بىرىككەن اراب امىرلىكتەرى جانە كاتار سياقتى جەتەكشى مۇناي ءوندىرۋشى ەلدەرمەن سالىستىرعاندا ايتارلىقتاي از ەكەنىن اتاپ ءوتتى.

"قوعامدا "بىزدە مۇناي كوپ، ءتىپتى مەندەليەۆ كەستەسىندەگى بۇكىل ەلەمەنت اياق استىندا، ءبىراق نەگە ارابتار سياقتى شالقىپ ءومىر سۇرمەيمىز" دەگەن ساۋالدار تۋىنداپ جاتادى. دەسە دە، بۇل سۇراقتاردىڭ ءبىر عانا جاۋابى بار: ءبىز ولاي جاساي المايمىز! بۇنداي قورىتىندىعا مۇناي تابىسى مەن حالىق سانىنا تالداۋ جاساپ كەلۋگە بولادى"، - دەيدى اندرەي چەبوتارەۆ.

"بايقاپ تۇرعاندارىڭىزداي قازاقستان تىزىمدە بار. دەگەنمەن ەڭ تومەنگى قاتاردا. قازاقستاننىڭ بارلانعان مۇناي قورى مەن تاياۋ شىعىس ەلدەرىنىڭ بارلانعان مۇناي قورى اراسىندا ۇلكەن ايىرماشىلىق بار. بۇل مۇنايدان تۇسەتىن قوماقتى كىرىستىڭ وزىندە قازاقستاننىڭ قورلارى ونىڭ اراب ەلدەرىمەن ۇزاق مەرزىمدى پەرسپەكتيۆادا باسەكەلەسۋگە مۇمكىندىك بەرمەيدى دەگەندى بىلدىرەدى. ەندى حالىق سانىنىڭ كەستەسىن اشايىق. ءبىز 20 ميلليوننان كوپپىز. بىزگە اراب ەميراتتاعىنداي ءومىر ءسۇرۋ ءۇشىن بىزدە بار مۇنايمەن، حالىق سانىن 15-20 ەسەگە قىسقارتۋ كەرەك بولادى. وسىعان ءسىز دايىنسىزسىز با، مەن جوق!"، - دەيدى اندرەي چەبوتارەۆ.

ەكسپەرت ونىمەن قوسا ەلىمىزدەگى مۇناي ءوندىرۋ قۇنى اراب امىرلىكتەرىنە قاراعاندا قىمباتىراق ەكەنىن جەتكىزدى. جانە قازاقستاننىڭ قازىرگى مۇناي ونىمدەرىنەن تۇسەتىن پايدانىڭ قايدا جۇمسالاتىنىمەن ءبولىستى.

"مۇناي پايداسىنىڭ ءبارى بىرەۋدىڭ قالتاسىنا كەتىپ جاتىر دەگەننەن اۋلاق بولۋ كەرەك. ەلىمىزدە بيۋدجەت تابىسىنىڭ 58 پايىزىن مۇناي تابىسى قۇراپ وتىرعانىن ەستەن شىعارماۋ كەرەك. مەملەكەتتىك قىزمەتكەرلەردىڭ 3/2 ءسىنىڭ جالاقىسىندا وسى مۇناي تابىسىنان الىنادى. ناقتىراق ايتقاندا كەدەندىك باجدار بويىنشا ەكسپورت جانە جەر قويناۋىن پايدالانۋشىلار ءۇشىن سالىناتىن سالىقتار. سوندىقتان مۇناي ەل - ەكونوميكاسىنا جۇمىس جاساپ جاتىر دەپ نىق ايتا الامىن"، - دەيدى اندرەي چەبوتارەۆ.