مۋزەي قىزمەتكەرلەرىنىڭ ورتاشا جالاقىسى قانشا

 ەلىمىزدە مۋزەي قىزمەتكەرلەرىنىڭ ورتاشا جالاقىسى اتالدى، دەپ حابارلايدى Kazinform. 

«بۇگىندە ەلىمىزدە 270 تەن استام مۋزەي بار. مۋزەيگە قاتىستى ماسەلەنىڭ ءبىرى - كادر. مامان جەتىسپەۋشىلىگى بار، كادر دايارلاۋ كەرەك. مۋزەي ءىسىن تۇسىنەتىن، تاريحي، مادەني ەسكەرتكىشتەر مەن مۇرالاردى اجىرا الاتىن مامان بولعان ءجون. قازىرگى ۋاقىتتا مۋزەي قىزمەتكەرلەرىنىڭ ورتاشا جالاقىسى 200 مىڭ تەڭگە»، - دەدى ۇلتتىق مۋزەي ديرەكتورىنىڭ عىلىمي جۇمىستار جونىندەگى ورىنباسارى اقمارال يبرايەۆا ەلوردادا ءوتىپ جاتقان مۋزەي قىزمەتكەرلەرىنىڭ I كونگرەسى بارىسىندا.

ونىڭ ايتۋىنشا، ەلىمىزدە مۋزەي ءىسى جىل سايىن دامىپ كەلەدى.

«بۇگىندە مۋزەي ىسىنە جاستاردىڭ قىزىعۋشىلىعى ارتىپ كەلەدى. قازىر ءبىزدىڭ مۋزەيدە 20 دان استام جاس مامان بار. بۇل ەلوردا بويىنشا، ال وڭىرلەردە جاعداي باسقاشا. ۇلتتىق مۋزەيدە 300 دەن استام قىزمەتكەر جۇمىس ىستەيدى»، - دەيدى ول.

ايتا كەتەيىك، بۇگىن استانادا مۋزەي قىزمەتكەرلەرىنىڭ I كونگرەسى ءوتىپ جاتىر.